1 تھِس1
1بہٕ پولُسؔ چھُس یہِ نامہٕ لیٚکھان۔ سلوانسؔ تہٕ تیمُتھیس چھِ مےٚ سٟتؠ۔ أسؠ چھی یہِ نامہٕ توٚہہِ تھِسلُنِیکا شہرس منٛز مسیحؔ یس پیٚٹھ ایمان تھاون والیٚن سوزان، یِم بب خدایس بیٚیہِ خداوند یسوع مسیحسؔ سٟتؠ متحد چھِ۔ خدا روزِن توٚہہِ پیٚٹھ فضل تہٕ سلامتی سوٗزن۔ 2أسؠ چھِ اکثر تُہنٛدِ باپتھ دُعا کرن۔ أسؠ چھِ توٚہہِ سارنےٕ ہنٛدِ باپتھ خدایہِ سُنٛد شکُر ادا کران۔3أسؠ چھِ پننِس ببَ خدایس تُہنٛزِ تتھ کامہِ پیٚٹھ شکُر گُزار یِس توٚہؠ کرن چھیو تکیازِ توٚہہِ چھِ تس پیٚٹھ پژھ۔ أسؠ چھِ تمس تُہنٛدس تتھ طریقس پیٚٹھ شکُر گزار زِ توٚہؠ چھیو ہمتہٕ سان لوٗکن مدد کران تکیازِ توٚہؠ چھیو لول بران۔ أسؠ چھِ تمس تتھ تُہنٛدس طریقس پیٚٹھ شکُر ادا کران زِ توٚہؠ چھیو صبرٕ سان برداش کران تکیازِ توٚہؠ چھِ اعتماد سان امید زِ توٚہہِ روزیٚو سٲنس خداوند یسوع مسیحؔ سُنٛد وعدٕ پالان۔4أسؠ چھِ بییٚہِ خدایس شکُر ادا کران تکیازِ اسہِ چھِ پتاہ زِ سُہ چُھ توٚہہِ مسیحؔ ہس پیٚٹھ ایمان تھاون والین سانؠن باین لول بران، تہٕ توٚہؠ ژٲرؠ نو تمؠ سٕنٛدؠ لوٗکھ بننہٕ خٲطرٕ۔ 5اسہِ چھِ پتاہ زِ خداین ژٲرؠ نو توٚہؠ تکیازِ ییٚلہِ اسہِ توٚہہِ نِشہٕ یسوعسؔ متعلق رٕژ شیچھ واتنٲوؠ، سۅ ٲس نہٕ صرف لفظو سٟتی، بلؠ کہِ پاک روح اوس طاقتہٕ سان سانہِ دسؠ کٲم کران۔ تمؠ دِیتُ اسہِ پوٚرٕ بھروسہٕ زِ تمؠ ٲسوٕ توٚہؠ ژٲرمٕتؠ۔ أتی ترِ توٚہہِ فِکرِ زِ أسؠ کٔم لوٗکھ چھِ، تکیازِ ییٚلہِ أسؠ توٚہہِ سٟتؠ ٲسؠ، یہِ کینٛژھا اسہِ کوٚر تہِ اوس توٚہہِ فٲیدٕ واتناوُن۔6یوٚت تام زن تُہنٛد طٲلق چُھ، توٚہہِ تہِ کٔروٕ زندگی سٲنی پٲٹھؠ بسر کرنؠ شروع یتھٕ پٲٹھؠ یسوع خداوند زندگی بسر کٔر۔ ییٚلہِ توٚہہِ رٕژِ شیچھِ پیٚٹھ ایمان أنوٕ، لوٗکو واتنوو توٚہہِ تکلیف۔ مگر تمہِ پتہٕ تہِ تھٲوٕ توٚہؠ پاک روحن خوش۔7تکیازِ مکدُنیہ تہٕ اخیہ صوبن منٛز مسیحؔ ہس پیٚٹھ ایمان تھاون والیو ساروےٕ لوٗکو بوٚز زِ توٚہؠ کٔتہٕ پٲٹھؠ رودِو خوش ییٚلہِ لوٗکو توٚہہِ تکلیف واتنٲو، تِمو تہِ یوٚژھ تُہنٛدِ پٲٹھؠ زندٕ روزُن۔8حقیقتن، واریاہو لوٗکو بوٚز خداوند یسوعسؔ متعلق تُہنٛد سُہ پٲغام وُنان۔ پتہٕ کوٚر تِمو تہِ مکدُنیہ تہٕ اخیہ صوبن منٛز روٗزن والیٚن سارنے لوٗکن تمہِ پٲغامُک تبلیغ۔ تمہِ نیٚبر دوٗر دراز جاین پیٚٹھ بسن والیو لوٗکو تہِ بوٚز زِ توٚہہِ کوتاہ ایمان چُھ خدایس پیٚٹھ۔ تمیٛک نتیجہ دراو زِ ووٚنؠ چھنہٕ اسہِ لوٗکن کینٛہہ وننٕچ ضرورت زِ خداین کیاہ چُھ تُہنٛدِ باپتھ کوٚرمُت۔9توٚہہِ نِشہٕ دوٗر بسن وٲلؠ تِم لوٗکھ چھِ باقی لوٗکن ونان زِ توٚہؠ کتھٕ پٲٹھؠ چھُو جوشہٕ سان اسہِ خوش آوے کران۔ تِم چھِ باقین لوٗکن یہِ تہِ ونان زِ توٚہہِ کٔروٕ پۅتلیٚن، بُتن تہٕ اپزین خداین ہنٛز عبادت کرنؠ بند تہٕ کٔروٕ زندٕ خدایہِ سٕنٛز عبادت یُس پوٚز خدا چُھ۔10تِم چھِ باقی لوٗکن یہِ تہِ ونان زِ توٚہہِ کٔروٕ اپزین خداین ہنٛز عبادت کرنؠ بند یُتھ زن توٚہؠ خدایہِ سنٛدِس گوٚبرؠ سُنٛد آسمان پیٚٹھ زمیٖنس پیٚٹھ واپس یِنُک ہیکیو بے تٲبی سان انتظار کٔرِتھ۔ توٚہہِ چھِ پتاہ، خداین کوٚر یسوع مرنہٕ پتہٕ بییٚہِ زندٕ، تہٕ یسوع چُھ سُہ اکھ یُس اسہِ تمہِ وِزِ بچاوِ ییٚلہِ خدا گناہگار لوٗکن سزا دِیہِ۔
Bridge Connectivity Solutions Pvt. Ltd.