Luke4
1elweqθes yeδwel yesuwε seg ellurdun unette iεebbe s erruwH elqudus, erruwH elli igewwetti etwali essewweθ.2erbεiyn yuwm wecciyĎan yedjerreb δiys. yerni welyeči δiysneθ Hette cey. max i δuqaneθ liyyametdiyn yHus yelez.3yennayes ecciyĎan: «iδekan cexdiyn δmemmis nrebbi, ennes yeθγaγette eθeδwel δeγrum.»4yerre yesuwε felles yennayes: «rahu yemmari, elεebδ liθedderc seg weγrum berk, yemenni yθedder seg tufleyθ nrebbi.»5welbeεδ ysuliyθi ecciyĎan yeddehreθ teεle, yeg sah ysexnes timuwre neddunyeθ elkul fiyseε fiyseε.6yennayes: «exedje eθeHkmeδ f timuwraye elkul delli δiysneθ, rahu nihenti elkul seddu efusiyw uneč egedde entuwce yelli exse.7lukan eyθerkεeδ yneč, exentuwce elkul.»8yerre f elles yesuwε yennayes: «yemmari kan yrebbi eθerkεeδ ha elεebδ, ukan δrebbi eθeεbδeδ.»9welbeεδ yiwiθi etwali elquds, yesbeddi f eccafeθ nesqef nelHuwc nelqudus yennes: «iδekan cexdiyn δmemmis nrebbi, Ďeyyec imenex esyah.10rahu yemmari, rebbi δeyweSSe elmlayxeθes bac e ttelhen essix.11usinc exqamen s ifesnensen bac e ltεeθrec g elkurδ.»12yerre felles yesuwε yennayes: «elxθab yenne, ejjerbec rebbi δrebbix.»13max i ykemmel ecciyĎan s ujerreb nyesuwε yebεeδ felles unette yetraje g tikkelt xlaf bac e yεaweδ eθijerreb.14yeδwel yesuwε yecciyreθ neljliyl s elquδreθ nrebbi, eslen essis leεbaδ ntimuwrediyn elkul.15ykan yetseqre g eljwameε nuδayen uleεbaδ elkul etsebbeHnes.16welbeεδ yemreq yennaSreh meni iyekker. yaδef yeljameε nuδayen as nessebθ emelεaδeθ, ybed δeyeqre.17ucines elxθab nenbi icεiyya welqulli ymiyri yufe eSSefHeθ elli yemmari δiys,18erruwH nrebbi iyδi lexaTer nette yexθari bac e sefrHe iqelliylen, yuzeniyδ bac e seybe imeHbas usinc edje ileεemyen ezren usinc emenεe imeĎlam s essellesθ,19yexθari bac e ntsefrHe s usukkes elli δeymenneε δiys rebbi leεbeδes.20welbeεδ isekker elxθab, yuwci yuxeddam, yeqqiym. elweqθes kanneθ TiTTawin nelli HDeren diyn nedziyneθ δiys.21yebδe iδukkeyasen yeqqar: «asse yeδwel edwiye wahen belHeq.»22kanen leεbaδdiyn elkul sellen δiys unihnin ferHeniyn, umesθeγrbiyn zade s edwiye emebruwx elli iθeffeγ s imiys. ebδen eqqaren: «wahen belHeq δmemmis nyuwsef!»23yenneyasen: «yemenni xenyum δeyθennem asse uneγ eyeče, ha eĎbiyb, sebre imenex! tegeδ dahen g temurθex δmat iθegiδ qebl g kefernaHuwm.»24welbeεδ yenne: «exennenne elHeq, eHebbec enbi yemmeqbel g temurθes.»25rahu belHeq, ykan g israYiyl egget ettidjalin g elweqθ nenbi iliyya, bellemare elweqθes yewweθ elez elqeεεeθ elkul lexaTer amzer yeqqiym elyewwiyθc tlaθe sniyn dwezyen.26urebbi elyuziync iliyya yHette icθ essisneθ, yemenni yuzenti ytemeTTuwθ g Serfeh nSeyda.27w ykan g israYiyl g elweqθ nenbi eliyceε egget δleεbaδ δimuwDan s elbreS, yemenni nette welysebri Hette iyjen essisen kan δnuεman esuwriy.»28max i sliyn leεbaδdiyn elli diyn edwiye eθγececen elkulhum egget.29ekren essufγenti elberre ntemuwreθ elmi itsiywδen yeccafeθ neddehreθ elli temmebne felles θemurθensen bac e θsendren essin.30yemenni nette yeθεedde jerasen yemreq f imenes.31yeggez ykefernaHuwm g eljliyl, w ykan yetseqre g leεbaδ as nessebθ diyme.32kanen imewnensen miyren seg eseqriys lexaTer edwiys δemeqqar uyečaθ g uwl.33ykan g eljameε nuδayen eryaz γers erruwH necciyĎan. yezge s eSSuwθ yeεle:34«δmat iθexseδ γenne ha yesuwε ennaSriy, yendre tusiyd bac e xentenγeδ? neč essenγex δwiyn, cex δmemmis n rebbi eTTaher.»35yeθγeccec felles yesuwε yennes: «essuwsem, ha ecciyĎan! tefγeδ essis.» elweqθes ysenderθi ecciyĎan g wemmesdiyn yeffeγ essis. yemenni wesyegi Hette cey.36esθeγerben leεbaδdiyn elkul diyn eδwlen dukken jerasen unihnin eqqaren: «δmat tufleyθe θahen? wahen γers elquwweθ ettemeqqarθ, unette yetged yetsuwfeγ g erruwH necciyĎan s elεebδ.»37eslen essis leεbaδ ntimuwre tiddiyn elkul g eljliyl.38max i yekker s ezzaθ nleεbaδdiyn, yemreq yelHuwc nsemεan. elweqθes eĎlben essis δeysebre yemmes nliwec nsemεan lexaTer netteθ eθkan etmaDunt egget s esxaneθ.39ibed ezzaθ numeTreHes, yeg sah <ibeεεeδ felles esxenetdiyn>. yemreq eTTen felles, tekker netteθ eθxeddem δiysen.40max i θeggez tefuwθ uγeδnes leεbaδ elkul imuDenensen. yeg sah iHuT ifesnes f kul iyjen essisen, ebren elkulhum.41ysuwfeγ lerwaH necyaĎen zade unihnin tεeyĎen eqqaren: «cex δmemmis nrebbi!» yemenni nette ykan yetgelleb δiysen wentiθedjiyc eδufleyen lexaTer uxzenti elli nette δelmesiyH.42elweyče talji bekri yeffeγ yesuwε yemreq yelxle. ebδen leεbaδ etHewmen felles elmi tufiyn elweqθes eTfenti bac e yeqqiym iyδsen diyme.43yemenni yenneyasen: «yelzemni emerqe ytimuwre tiddiyn neč emmazne bac e ntxebre f ejjenneθ nrebbi.»44yemreq yetsefreH g leεbaδ g eljwameε nuδayen.
Chutney Media Agency Limited