Luke23
1ekkeren eljmaεeθensen elkul, ewyen yesuwε ibiylaTus elwali nerruwman.2ebδen tettehmen δiys: «enfaq elli eryaze yetheyyej g leεbeδenne, wexenyedjiyc enuc lefluws yelqeySer uyeqqar elli ennette elmesiyH elmlek.»3yenceδt biylaTus: «endre cex elmlek nuδayen?» yer felles: «δcex tenniyδ.»4yen biylaTus yimeqqaren nelkuhhan dleεbaδ: «ellufiyγ felles Hette cey.»5yemenni eTfen eSHiyH: «yetheyyej g leεbaδ, yetseqre g yehuwdiyye elkul, seg eljliyl eldah.»6max i yesle biylaTus tuθleyθ neljliyl, yenceδten: «endre eryaz seg eljliyl?»7max i yesle elli nette iθebbeε elHkum nhiyruwdus, yuzent yhiyruwdus, elli ykan nette biyδe g uwrceliym g liyyametdiyn.8hiyruwdus max i yezre yesuwε yefreH egget, εlexaTer ykan yetteθmenne seg bekri eθyezer, εlexaTer yesle felles egget, uyexs eyzer ellayeθ seg ifesnes.9yenceδt f elHajaθ egget, welyerriyc felles.10ekren imeqqaren nelkuhhan dimufesren necceriyεeθ ettehmenti eSbiyH.11yeHqerθ hiyruwdus delεsakres, eSSen felles, yirDes edbac lemεen, yerri ibiylaTus.12g wesses biylaTus dhiyruwdus eδwlen δimeddukal, uqebl eθkan mabinathum elεδaweθ.13inabe biylaTus imeqqaren nelkuhhan delHukkam dleεbaδ.14yennasen: «tuγeδmiyδ eryaze εlexaTer yetheyyej g leεbaδ. utay jerbaθ ezzeθennum wellufiyγ δiys Hette cey.15heδake εlac Hette δhiyruwdus zade elli yrejεenaθ. utay elyegi Hette cey yettesθHeqqe enγe.16tay δeθejlde seybaθ.»17w ykan yetseybasen g kul elεiyδ iyjen seg imerbaT.18yaxi zeεwgen elkulhum ennen: «awi eryaze eθseyyebδane barabas.»19wediyn ykan yemmeqqen g elHebs εlexaTer iheyyej θemuwreθ w yenγe texrumt.20inebaθen biylaTus tikkelt xlaf εlexaTer yexs eyseyyeb yesuwε.21yemenni zeεwgen felles xlaf: «δuggemti g eSliyb! δuggemti g eSliyb!»22yenceδten tikkelt teθθalet: «δmette eccer elli yegi? elleTTife felles Hette cey yettesθahel enγe, δeθejelde seybaθ.»23yemenni ebδen etzeεwgen felles exsen eyemmeSleb. yeγleb ezeεwgensen.24yeHkem biylaTus emmax i xsen.25iseyyeb elli ykan g elHebs f elxaĎer nuheyyej nleεbaδ dwenγe, elli enceδen felles. emme yucasen yesuwε emmax i xsen.26unihnin etgewδen δiys, eTTefen eryaz seg elqiyrwan ellesmes semεan ykan mrewweH seg ejiymi, HuTTen felles eSliyb bac e θiyqem δeffer yesuwε.27eθbεent leεbaδ egget seg midden delwacun elli kanneθ etεeyyeĎneθ uneddebneθ.28yebrnasneθ yesuwε yen: «eθifrax nuwrceliym, eθεeyyeĎmec felle, εeyyeĎmeθ f imenennexmeθ didrarinnexmeθ.29εlexaTer δeyeddes elweqθ ennen δiys leεbaδ: <SeHHe liyhum telεuggar elli tiδiswinnesneθ elliriwnec wiδmerrennesneθ ellessesfenc!>30elweqθes δennen yedhari, <uDameθ fellane!> uyeθHecruwfin, <ireDmtane!>31εlexaTer iδekan egiyn wahen yuqecquc eziyzew, elli yeqquwr δmette δesyejre?»32eγδen sen δimujermen xlaf bac e nnenγen dyesuwε.33max i θiwDen ywemxan elli ellesmes eljumjmeθ eSlbent diyn nette δimujermendiyn lessen, iyjen f elymiyn wiyjen f elysar.34yen yesuwε: «sameHθen edda, ellessinenc δmette ittegen.» qerεen f uzuwni nedbeces.35bedden leεbaδ reqben, welHukkam eSSiyn felles ennen: «imenneε elγires, edj eymenneε imenes kan nette mbelHeq δelmesiyH nrebbi, elli yexθari!»36delεsaker zade eSSiyn felles unihnin ettesδen ettečnes g elxel,37weqqarnes: «kan δcex elmlek nuδayen, menneε imenex!»38weθkan δenyes elblakeθ yemmari felles s leHruwf f elyuwnaniyyeθ deruwmaniyyeθ delεibriyyeθ: «wahen δelmlek nuδayen.»39yebδe iyjen seg imujrmendiyn elli emmeSlben yetbehber felles: «muc δcex elmesiyH? menneε imenex eθmenneεδene!»40yemenni yenzer felles wissen: «Hette δcex ettekkiδc seg rebbi ucex δeθemεaqbeδ m nette?41nečin s elHeq εlexaTer niwi elli nettesθehali f elεmeylenne, emme eryaze elyegi Hette cey δelγaleĎ.»42yen: «yesuwε, esfekriyδ max eθewDeδ g elmemlexθex.»43yer felles yesuwε: «exenne elHeq: asse δeθebδiyδ iyδi g ejjenneθ.»44elweqθes ykan εuddi δessette (ezyen nwas), tessulles eddunyeθ elettesεe (maDi tlaθe ntisemsiyn),45tens tefuwθ, yemcuq ecεer n elheykel f sen.46elweqθes izeεweg yesuwε eSbiyH yen: «erruHiyw g ifesnex edda!» max i yenne wahen tuwli erruHes.47eDDabeT nerruwman max i yezre elli ySar, imejjeδ rebbi yen: «mbelHeq, eryaze elyegi Hette cey.»48leεbaδ kanen emlaymen bac e zren eSlab, max i zriyn elli ySar, rewHen ettewθen g iδmernensen.49welli esnent elkul delwacun elli useδneθ iyδes seg eljliyl, bedden reqben seg lebεiyδ.50ykan yelle eryaz ellesmes yuwsef, seg elmejles, δeryaz yebhe w δ eHeqqi,51lykanc δimwafeq f elli egint iyh nelmejles, unette seg errameθ icθ seg timuwre nuδayen, w ykan yetraje g elmelx nrebbi.52yexDem ibiylaTus yeĎleb ejjeθθeθ nyesuwε.53emmale yessuggezθ ikeffent g eθkettent yessuggezθ g wenil yemmeHfer g elHegfeθ elyemmerδem δiys Hette Hed.54esses ykan δas nuHeDDer yessebθ elli yeqreb.55elwacun elli effeγneθ dyesuwε seg eljliyl eθbeεneθ yuwsef ezrneθ enil meniy, umax i θemHuT ejjeθθeθ,56ubeεεeδ δwelneθ HeDDerneθ elwfaHaθ derriyHeθ yejjeθθeθ. erθaHneθ as nessebθ emmax i yemweSSe g ecceriyεeθ nmuwse.
Chutney Media Agency Limited