Gen35
1yen rebbi yyeεquwb: «ekker ali ibiytiyl teεmreδ diyn, tebniyδ diyn elmeδbeH y rebbi elli yeffeγex max i θerwleδ seg uwδem n enjex εiysuw.»2yen yeεquwb y midnes delli iyδes elkul: «lewHeθ leSneb elli γerwem elkul tneĎfem imenennum tbedlem edbecennum.3tekrem enali ibiytiyl, diyn δebniyγ elmeδbeH y rebbi elli yεawniyδ as elli HSele, w ykan iyδi uggebriδ elli uyuwre δiys.»4ucnes y yeεquwb leSneb tiγriybin elli g ifesnensen etbelluwTin elli g timedjinensen, yerδemθent yeεquwb seddu eccejreθ n eSnuwber elli g eckiym.5erHlen, isuggez rebbi elxuwf s γers f timuwre elli enneDneθ fellasen elkul, usahen enyeθbiyε Hette Hed.6yeseδ yeεquwb dleεbaδ elli iyδes elkul y luwz, elli esmiθes biytiyl, g elqeεεeθ n kenεan.7yebne diyn elmeδbeH ysemme emxandiyn iyl biytiyl εlexaTer rebbi yeffeγes diyn max i yerwel seg enjes.8eθjaf debbuwre θehelli tessesfe irifqeh erδment seddu eccejreθ n eSnuwber seddu biytiyl, yemsemme emxandiyn eluwn bakuwt meεnahe eSnuwber n uεeyyeĎ.9usahen yeffeγ rebbi y yeεquwb elmerreθ xlaf max i yedduwse seg teHmiylt n eram ibarex δiys.10yennes rebbi: «ellesmex yeεquwb, seg ture meεεač eθemsemmiyδ yeεquwb, δeθemsemmiyδ israYiyl.» eyendeγ ysemmaθ israYiyl.11yennes rebbi: «neč δerreb elqader. aru texθreδ. θemuwreθ ettimuwre egget δeffeγneθ essix, lemluwk δefγen essix,12elqeεεeθ elli uciyγet y ibrahiym disHaq δettuwce icex didreriyx beεδex.»13y ali rebbi seg emxan elli yuθlayes δiys.14yeg yeεquwb ezeεnuwn n elkurδ diyn, yenγel felles ecrab duwδi y rebbi.15y semme emxandiyn elli yuθlayes δiys rebbi biytiyl.16erHlen seg biytiyl. nihnin elluciyn bεeδen f efrat tebδe raHiyl ettaru yuεer felles arew.17max i yuεar felles arew tennayes θehelli tessaru δiys: «eθukδec, wahen δefruwx xlaf.»18qebl eθali erruHes tsemmaθ raHiyl ben uwniy (meεnahe memmis n weHzeniyw). yemenni daddes ysemmaθ benyamiyn.19eθjaf raHiyl erδment uggebriδ n efrat elli netteθ dbiytleHm.20yeg yeεquwb ezeεnuwn f weniles, yeqqiym elture δezeεnuwn n wenil n raHiyl.21yerHel yeεquwb esyiyn yenSeb texyemtes g teme tissent n mejdel n εidr.22elweqθelli nette iεemmer g elqeεεetdiyn yexDem rawbiyn yenεes dbelheh, texeddamt elli yuγit daddes, yesl essis yeεquwb yeθγeccec felles egget. idrari n yeεquwb kanen eθnac:23idrari n leyye: rawbiyn, emenzu n yeεquwb dcemεuwn dlawi dyehuwδa dyessaker dzebuwluwn,24widrari n raHiyl: yuwsef dbenyamiyn,25widrari n belheh texeddamt n raHiyl: dan dneftaliy,26widrari n zelfeh texeddamt n leyye: jad daciyr. iyhen kanen idrari n yeεquwb elli emmeruwnes g teHmiylt n eram.27yeseδ yeεquwb y daddes isHaq g memra y etwali qeryeθ erbεe elli netteθ δHebruwn meni iεemren ibrahiym disHaq.28isHaq ykan elεemres miyye uθmenyiyn sne.29tali erruwH n isHaq yjaf δewesser δimeθhenni yeweD f midnes, erδment idreriys εiysuw dyeεquwb.
Chutney Media Agency Limited