ISANZU Bible Version19

1Yesʉ akingɨla kʉ Yeliko, akiʉmba ʉmba mʉnzɨla niyakɨsalɨ nɨkanso.2Mʉkɨsalɨ nɨkanso aɨ ʉkolɨ mʉntʉ ʉng’wɨ witang’waa Zakayo, mʉntʉ ʉyʉ aɨ mʉtongeeli waahangʉlwa kodi, nʉyo aɨ mʉgolɨ.3Zakayo aɨ wɨduma wamʉone ʉ Yesʉ wɨʉli, ingɨ aɨ wɨleng’wa kʉmʉona, kʉnsoko aɨ mʉkupi nɨantʉ aɨ ɨdʉ.4Itɨ gwa akamanka kʉntongeela, akanankɨla mʉmʉkʉyʉ naɨ ʉkolɨ pampelo anzɨla wahume kʉmʉona Yesʉ, kʉnsoko aɨ ʉlɨngile kɨna ʉ Yesʉ ʉkʉkɨɨla nzɨla yɨyo.5Itɨ gwa, ʉ Yesʉ naɨ wapika pamʉkʉyʉ nʉanso, akalangamila migʉlya, akamʉɨla, “Zakayo kayanga sima, kʉnsoko lelo ɨyɨ kʉʉgenipa.”
6Zakayo akipatɨɨlya akasima, akamʉsingɨilya ʉ Yesʉ kʉʉkende.7Antʉ ɨhi naɨaona nanso, akatula nang’ana azelʉnga, “Wamʉgenipa mʉnyamɨlandʉ!”
8Ingɨ ʉ Zakayo akimɨka, akamʉɨla, “Isekʉlʉ tegeelya! Ʉnene kʉgalania mʉmaganda abɨɨlɨ na nsao yane ɨganda ɨng’wɨ kʉapa aʉla, hangɨ anga ɨze ai nʉmiɨe mʉntʉ wɨhi kɨntʉ kakwe, kʉmʉsʉkɨɨlya kanɨ.”
9Yesʉ akamʉɨla, “Lelo ɨyɨ ʉguni wingɨla mʉnyʉmba ɨyɨ, kʉnsoko ingɨ nʉyʉga mʉhʉmba wang’wa Ibulahimu.10Kʉnsoko ʉnene Ng’waa Mʉntʉ nzileduma nʉkʉguna ɨkɨ nɨkɨlimɨe.”
11Matungo naso antʉ aɨ akɨlɨ ategeeye ʉ Yesʉ, aɨ asɨganɨɨye kɨna itungo nɨlang’wi Itunda kʉtema lapika. Kʉnsoko aɨ ahumbeela kʉpika kʉ Yelusalemu, Yesʉ akaatambʉɨla mpyani ngɨɨza.12Itɨ gwa akaatambʉɨla, “Aɨ ʉkolɨ mʉntʉ wandʉgʉ akɨtemi akatunga mʉhɨnzo akalongola kihɨɨ akʉli wande watemigwe ʉtemi, ʉʉ gwa watʉlye.13Itɨ gwa naɨ wakɨlɨ kʉhega, akaitanga itʉmɨ akwe ikʉmi, ɨhi akaapa mpia nʉkʉaɨla, ‘Itʉmɨlɨ ʉsʉlʉja kʉpikɨɨla kʉnzɨɨzatulya.’
14Ingɨ antʉ a mihɨɨ akwe aɨ amʉbɨpɨwe, nɨitɨ ga akaalagɨɨlya antʉ alongole kihɨɨ nʉinzʉtemigwa ende aatambʉɨle ɨantʉ ihɨɨ iyo nʉlongoe kɨna, ‘Shanga kʉmʉloilwe ʉmʉntʉ ʉyʉ wakʉteme ʉsese.’
15“Nɨ itɨ ga mʉgolɨ ʉyʉ akatemigwa akatulya kitolakwe nʉkʉtula mʉtemi, sʉnga akaitangaa itʉmɨ akwe naɨʉapee mpia, ingɨ wahume kʉlɨnga atugisilye ʉli mʉʉsʉlʉja nʉao.16Mitʉmɨ wang’wandyo akaza akʉmʉɨla, ‘Isekʉlʉ, ntugisilye ninzʉya ikʉmi kʉpuma miganda lɨng’wɨ nɨla mpia naɨ ʉmpee.’17Mʉgolɨ ʉyʉ akamʉɨla, ‘Songela mitʉmi nʉ mʉhʉɨɨli. Kʉnsoko wɨmʉhʉɨɨli kikani niniino, kʉʉɨka ʉtule wɨmʉkʉlʉ mʉisalɨ ikʉmi.’18Mitʉmɨ nʉakabɨɨlɨ akapembya nʉkʉlʉnga, ‘Isekʉlʉ, ntugisilye ninzʉya itaano kʉpuma mʉganda ʉng’wɨ nʉa mpia naɨ ʉmpee.’19Mʉgolɨ ʉyʉ akamʉɨla, ‘Songela, nʉewe ʉkʉtula wɨmʉkʉlʉ mʉisalɨ ɨtaano.’
20“Mitʉmɨ mʉya akapembya, nʉkʉlʉnga, ‘Mpia ako naɨʉmpe sɨyɨ, aɨ nɨmɨtungile misongolo nʉkʉpiha iza.21Kʉnsoko aɨ nogopile kɨna ʉewe shanga wɨkapwa. Ʉewe wɨholaa maintʉ nɨshanga ako, wɨogolaa nɨshanga ʉtemee.’22Mʉgolɨ ʉyʉ akamʉɨla, ‘ʉewe wimitʉmi nʉmʉbɨ kʉʉpɨsɨɨlya kʉntambʉ ako. Ʉnɨngile kɨna shanga nɨkapwa, nɨholaa maintʉ nɨshanga ane, nʉkʉogola nɨshanga ntemee.23Kʉnɨkɨgwa shanga waapa ɨmpia ane kʉasʉlʉja? Ingɨ lʉhikʉ nɨkʉtulya nihole mpia ane nɨkɨtugisigwa.’
24Ʉʉgwa akaatambʉɨla awa naɨakolɨ pang’wanso, ‘Mʉhegelyi ʉyʉitɨ impia mʉmʉpe ʉyʉ nʉtugisilye maganda ikʉmi.’25Antʉ awa akamʉtambʉɨla mʉgolɨ ʉyʉ ‘Isekʉlʉ mitʉmi ʉyʉ wakondilye kutugisa anga zizo maganda ikʉmi.’26Mʉgolɨ ʉyʉ akaasʉkɨɨlya, ‘Ʉyu nʉkete maintu ʉkongeeligwa. Ʉyu nimugila ukuhegeligwa ganiki nikiniino nʉkɨkete.27Ingɨ, kʉalʉgʉ ane awa nɨshanga aɨ aloilwe ʉnene ntule nɨmʉtemi wao, aleti apa mʉabʉlage pantongeela ane”’
28Yesʉ naɨ wakondya kʉtambʉla inkani izi, akaatongeela kʉlongola kʉ Yelusalemu.29Naɨ ahumbeela kʉpika kʉ Betipage ni Betania, pakupi nʉlʉgʉlʉ nʉlitangwa mizeituni, akaalagɨɨlya amanyisigwa akwe abɨɨlɨ,30akaaɨla, “Longoli kʉkɨsalɨ nɨkɨkolɨ pa ntongeela itʉ. Anga maakingɨla mʉkɨsalɨ, mʉkʉmʉhanga ng’waa ndogwe nʉakɨlɨ kʉmʉpakɨla nʉ mʉntʉ wɨhi. Mʉtungʉɨli mʉmʉlete apa.31Mʉntʉ nʉkʉmʉkolya nɨkɨ mʉkʉmʉtungʉɨla ʉng’waa ndogwe, mʉɨli, ‘Isekʉlʉ ʉmʉtakile.”’
32Amanyisigwa awa naɨalagɨɨigwe akalongola akahanga anga ʉ Yesʉ naɨʉatambuie.33Naɨ akʉmutungʉɨla ʉng’waa ndogwe, mukola ndogwe ankaakolya, “Nɨkɨ mʉkʉmʉtungʉɨla ʉng’waa ndogwe ʉyʉ?”
34Akamʉsʉkɨɨlya, “Isekʉlʉ ʉmʉtakile.”35Itʉ gwa, akamʉtungʉɨla ʉng’waa ndogwe ʉyʉ akamʉtaila ʉ Yesʉ. Akaila ingʉo ao mʉmʉgongo nʉa ng’waa ndogwe, akamʉpakilya ʉ Yesʉ mʉng’waa ndogwe.36Yesʉ akalongoleka nʉmʉhɨnzo, ɨantʉ akaɨla ngʉo ao mʉnzɨla.
37Nai wahumbeela kʉ Yelusalemu kʉ nzɨla nɨhulumʉkile mʉlʉgʉlʉ nʉla mizeituni, iumbɨ lɨhi nɨamanyisigwa akwe akandya kʉkʉa ngɨligɨlɨ nʉkitunta azemukʉmʉkʉlya Itunda kʉnsoko amɨʉkʉɨlwa ɨhi naɨ aʉine.38Akatula lʉnga, “Itunda ʉmʉkembetile Mʉtemi ʉyʉ nʉzile kʉlina lang’wi Isekʉlʉ, migʉlya kigʉlʉ itule nʉʉgila minyomo nikʉlyo ʉko kigʉlya nangaluu.”
39Papo Apalisayo ang’wi naɨ akolɨ mʉmilʉndo nʉanso akamʉɨla ʉ Yesʉ, “Mʉmanyisi akɨlaje ɨamanyisigwa ako.”
40Yesʉ akaatambʉɨla, “Kʉmʉɨli, anga awa anga akɨlaje, kʉlʉ kʉʉlʉ magwe aya itɨ akitʉnta.”
41Nai wahumbeela nʉkʉkɨona kɨsalɨ ka Yelusalemu, Yesʉ akakɨlɨɨla,42wazelʉnga, “Aza bahu ʉlinge lelo ɨyɨ makani nɨlɨletaa ʉgila minyomo. Ingɨ itungo ɨlɨ lɨpɨhilwe pamiho ako.43Kʉnsoko apembilye mahikʉ alʉgʉ ako akʉʉkitɨɨla ikito, akʉʉgɨlɨnkɨɨlya nʉ kʉʉkʉa mpande yɨhi.44Sʉnga akʉʉtaga pihɨ ʉewe palʉng’wɨ nɨantʉ nɨakolɨ mʉkatɨ amakiligo ako, shanga akʉlekeela igwe likoligo lako lɨsage migʉlya igwe lʉlya, kʉnsoko shanga aɨ ʉlingɨle itungo Itunda naɨ ʉzile kʉʉponya.”
45Sʉnga ʉ Yesʉ akingɨla mʉnyʉmba ang’wi Itunda, akatula azunsa agʉlyi apume kʉnzi,46wazelʉnga, “Yandɨkilwe, ‘Nyumba ane ɨkʉtula nyʉmba amalompi,’ ingɨ ʉnyenye mamɨtenda kʉtula ikʉlʉngu lakʉtankanɨla ii.”
47Yesʉ akatula manyisa mahikʉ ɨhi mʉnyʉmba ang’wi Itunda. Ingɨ akʉlʉ aapolyi nɨamanyisi amalagɨɨlyo ang’wa Musa nɨatogeeli aantʉ akahiya kʉmʉbʉlaga,48ingɨ aɨ agila nɨkakʉtenda, kʉnsoko antʉ ɨhi aɨ ɨmʉtegeelya kɨsa.

The Word for the World International

https://app.library.bible/content/a61fa9a81f3a5fa3