ISANZU Bible Version10

1Naɨwakondya kitʉma nanso, Isekʉlʉ akaahola nɨaʉya makʉmi mʉpungatɨ na abɨɨlɨ, akaalagɨɨlya alongole abɨɨlɨ abɨɨlɨ mʉisalɨ nʉanso naɨʉlomee kʉlongola.2Amanyisigwa awa naɨakɨlɨ kʉhega akaatambʉɨla, “Niyakʉogolwa yɨdʉ, ingɨ ɨaogoli asheenyʉ. Mʉlompi Isekʉlʉ nʉa ʉogoli wanɨɨle ɨaogolɨ nɨakwɨɨe mʉmʉgʉnda wakwe.3Ʉʉgwa longoli. Mʉlɨnge kɨna kʉmʉlagɨɨlya ʉnyenye anga ɨanaankolo mʉmbugi.4Leki kikenkeelyi ɨmbogoshi ang’wɨ nkapu ang’wɨ makwasa akʉkaɨla, leki kilamʉshi nʉ mʉntʉ wɨhi mʉnzɨla.5Nyʉmba ɨhi anga mʉsɨngɨɨligwe, alamʉshi itɨ, ‘Ʉtɨgi wang’wi Itunda ʉtule ʉmolɨ mʉakola nyʉmba.’6Anga itule ʉmolɨ mʉntʉ nʉloilwe ʉtɨgi mʉnyʉmba nanso, ʉʉgwa mʉkʉsʉkɨlwa nʉ ʉtɨgi wanyu, anga itule wɨkʉtilɨ mʉkʉsʉkɨlwa nʉʉtɨgi wanyu.7Ikii mʉnyʉmba nanso mʉzelya nʉkʉng’wa kɨhi nɨakʉmʉpa, kʉnsoko mitʉmi wɨpegwaa ɨkɨpegwa kakwe. Leki kʉhamambyi nyʉmba yɨdʉ.8Anga mingɨle mʉkɨsalɨ nɨkanso lyii kɨhi nɨakʉmʉpa,9aponyi ɨalwae nɨamolɨ mʉng’wanso, hangɨ atambʉɨlɨ ɨantʉ, ‘Ʉtemi wang’wi Itunda wahumbeela.’10Ingɨ anga mingɨle kɨsalɨ kɨhi ahite kʉmʉsɨngɨɨlya, pumi napa nɨmʉkʉkɨɨla mʉnzɨla yao tambʉli kɨna,11‘Nʉlʉnkʉndɨ nʉla kɨsalɨ kanyu nʉlʉkamantɨɨe mʉmɨgʉlʉ itʉ kʉʉpunʉnta. Ingɨ mʉlɨnge kɨna ʉtemi wang’wi Itunda wahumbeela.’12Kʉlʉ kʉʉlʉ kʉmʉɨla kɨna, ɨantʉ akɨsalɨ nɨkanso akagigwa kʉkɨla naɨagigwe ɨantʉ nɨakʉ Sodoma.”
13“Yʉkʉtula lwago kʉ antʉ akʉ Kolazini. Nʉnyenye nɨmɨkiɨ kʉ Betisaida kʉnsoko maona ilɨngasɨɨlyo yidʉ. Kʉnsoko ɨmɨʉkʉɨlwa ɨyɨ nɨkitʉng’wa kʉng’waanyu ɨze ɨtendilwe kʉ antʉ akʉ Tilo nʉkʉ Sidoni, antʉ akwe kalɨ ɨze apeile kitʉmaa ʉʉbɨ, hangɨ ɨze itungilee magʉnɨla nʉkisensela mau anga ʉkɨa nʉa mɨlandʉ ao.14Lʉhikʉ Itunda nʉkʉlamʉlwa, yʉkʉtula bahu Tilo nɨ Sidoni kʉgimya ʉpɨsɨɨligwa wao kʉkɨla ʉnyenye.15Nʉnyenye antʉ akʉ Kapalinaʉmu, itɨɨ, mʉkʉkʉligwa kʉpikɨɨle kilunde ne? A, a! Mʉkʉsimigwa kʉpikɨɨla kʉʉlʉngʉ”
16Yesʉ akalongoleka kʉatambʉɨla amanyisigwa akwe, “Mʉntʉ wɨhi nʉkʉtula nʉ lwijo kʉng’wanyu, mʉntʉ nʉanso ʉkʉtula ʉkete lwijo kʉng’wane. Nʉ mʉntʉ wɨhi nɨmʉgila anga lwijo kʉng’wane mʉntʉ nʉanso ʉkʉtula mʉgila lwijo kʉng’wa Tata nʉndagɨɨye ʉnene.”
17Panyambele awo nɨ makʉmi mʉpungatɨ na abɨɨlɨ naɨalagɨɨgwe akatʉlya iloile, akalʉnga, “Isekʉlʉ, ahɨng’wɨ akʉhega mʉantʉ anga kʉakenele kʉngulu nʉʉhumi wako.”
18Yesʉ akaasʉkɨɨlya, “Azanʉmʉine shetani ʉtʉngʉkile kʉpembelya kilunde anga lʉpɨto.19Yesʉ akaatambʉɨla amanyisigwa akwe namʉpeza ʉnyenye ʉhumi nʉa kʉpambata nzoka ni nkʉmɨ nʉʉhumi nʉakʉahuma nɨalʉgʉ anyu ɨhi, kʉtilɨ anga kɨntʉ kɨhi nɨkɨkʉmʉlemaalya.20Nɨitɨga leki kiloi kʉnsoko ahɨng’wɨ akete lwijo kʉng’waanyu, ingɨ iloi kʉnsoko ɨmina anyu andɨkilwe kigʉlʉ.”
21Itungo lɨlo lɨɨlo Yesʉ akaze ʉkete Ng’wahʉ wang’wi Itunda akiloa, wazelʉnga, “Kʉʉlʉmbɨɨlya Tata, Isekʉlʉ nʉigʉlʉ nihɨɨ, kʉnsoko ɨmakani aya ʉapɨhile anyamahala nɨalɨngi amakani, waapihʉɨla ɨang’ɨnya nianiino, kʉnsoko nanso yayo akʉloile.”
22Sʉnga akatambʉla, “Tataane ʉmpee ʉhumi nʉa kitʉma maintʉ ɨhi. Kʉtilɨ mʉntʉ wɨhi nʉmʉlɨngile Ʉng’wana kwaala Ʉtata ʉdu, ang’wi nʉmʉlingɨle ʉ Tata kwaala Ng’wana wakwe, nʉyo wɨhi ʉ Ng’wana nʉloilwe kʉakʉmʉɨla.”
23Sʉnga akaagozeela amanyisigwa akwe akaatambʉɨla, “Akembetilwe mʉntʉ ʉyo nʉkʉmaona ɨmakani aya nɨmʉkʉmaona ʉnyenye.24Kʉlʉ kʉʉlʉ kʉmʉɨla, amanga ang’wi Itunda ɨdʉ nɨatemi aɨakete nsʉla akʉmaona aya nɨmʉkʉmaona ingɨ shanga aɨamaine, nʉkija aya nɨmʉkija ʉnyenye shanga akija.”
25Lʉhikʉ lʉng’wɨ mʉmanyisi nʉa malagɨɨlyo wɨkimɨka wamʉgeme ʉ Yesʉ, “Mʉmanyisi nʉmʉkende, ntende ʉlɨ nihume kʉlija ʉpanga mahikʉ ɨhi nɨmagila ɨmpelo?”
26Yesʉ akamʉkolya, “Wɨlɨnga ntʉni anga ʉsome mʉmalagɨɨlyo ang’wa Musa?”
27Mʉmanyisi nʉa malagɨɨlyo akasʉkɨɨlya, “Mʉlowe Isekʉlʉ Itunda ako kʉnkolo ako ɨhi nʉ Ng’wahʉ wako wɨhi ningulu yako yɨhi nɨmahala ako ɨhi,’ hangɨ ‘Mʉlowe nʉ mʉnyakɨsalɨ nʉako anga nʉiloilwe ʉewe.”’
28Yesʉ akamʉɨla, “Wasʉkɨɨlya iza, itʉme ʉʉ, nʉewe ʉkikiɨ ni Itunda mahikʉ ɨhi nɨmagila ɨmpelo.’’
29Ingɨ mʉmanyisi nʉamalagɨɨlyo ʉyʉ akatulikumʉsha kɨna nʉanso mʉnyamahala, akamʉkolya ʉ Yesʉ, “Mʉnyakɨsalɨ wane nyenyu?”
30Yesʉ wɨkamʉsʉkɨɨlya, “Mʉntʉ ʉng’wɨ aɨʉkʉhulumʉka ʉpembeeye kʉ Yelusalemu ʉlongoe kʉ Yeliko, mʉnzɨla wɨkaambwa nɨantʉ nɨabɨ wɨkamʉtugʉla ɨngʉo, wɨkamʉkʉa nʉkʉmʉlemaalya, wɨkamʉleka ʉkʉhiya kʉsha.31Kʉlyoa lakwe wɨkapembya Mʉpolyi wang’wi Itunda ʉkɨɨe nzɨla yɨyo, naɨʉmʉine ʉdu wɨkamʉhʉga wɨkakɨɨla ipande.32Itungo ʉdu wɨkapembya mʉntʉ ʉng’wɨ nɨmʉhemba waapolyi, naɨʉpikile pang’wanso naɨwamʉona, nʉng’wenso wɨkamʉhʉga wɨkakɨɨla ipande.33Ingɨ mʉntʉ ʉng’wɨ kʉpuma kɨsalɨ ka Samalia aɨʉkolɨ mʉmʉhɨnzo ʉkɨɨe nzɨla yɨyo yɨɨyo, naɨwapika pang’wanso nʉkumʉona ʉmʉntʉ ʉyʉ, wɨkamʉaisɨɨlya.34Wɨkalongola naɨʉkolɨ wɨkamʉhola wɨkoja inkomele yakwe nʉkʉpaka makʉta nɨdibai, wɨkamʉtungɨlya inkomele, sʉnga wɨkamʉkenka mʉndogwe akwe, wɨkamʉtwala Mʉnyʉmba nɨɨlala ɨazɨɨla, nʉkʉmʉkela.35Naɨwela mʉdaʉ akwe, wɨkamʉlekela ʉmʉkola nyʉmba ʉnyinyʉ ʉbɨɨlɨ nʉa nangʉ apeza wɨkamʉlagɨɨlya, ‘Mʉlwalye ʉmʉntʉ ʉyʉ, kɨhi nɨkɨkʉkɨlɨnkɨɨla anga ngomoke nzee kʉsʉkɨɨlya.”’
36Sʉnga ʉ Yesʉ akamʉkolya, “Ʉsɨgile mʉantʉ awa nɨataatʉ, ʉmʉnyakɨsalɨ nʉa mʉntʉ ʉyʉ naɨʉkʉilwe nɨantʉ nɨabɨ nʉʉli?”
37Mʉmanyisi nʉa malagɨɨlyo akasʉkɨɨlya, “Ʉyʉ naɨʉmʉaisɨɨye yʉyo mʉnyakɨsalɨ wakwe”
Yesʉ akamʉtambʉɨla, “Longola nʉewe witʉme ʉʉ.”
38Yesʉ nɨamanyisigwa akwe naɨakolɨ nʉmʉhɨnzo, akapika kɨsalɨ kɨng’wɨ, mʉsʉngʉ ʉng’wɨ witangwaa Malita, akamʉsingɨilya mitolakwe.39Malita aɨʉkete mʉluna nʉakɨsʉngʉ witangwa Maliamu, Maliamu akikiɨ pang’wa Yesʉ umʉtengeeye.40Ingɨ ʉ Malita nʉanso aɨʉkikɨza nɨmɨlɨmo ɨdʉ. Sʉnga ʉ Malita akamʉɨla ʉ Yesʉ, “Isekʉlʉ, shanga ʉkee kɨna ʉmʉluna wane ʉndekeeye ɨmɨlɨmo? Mʉɨle wanzaɨɨlye.”
41Yesʉ akamʉɨla ʉ Malita, “Malita, Malita, nɨkɨ ʉkʉnyomeka nɨmakani ɨdʉ,42ingɨ kɨntʉ kɨng’wɨ du nɨkɨza nɨkɨtakɨwe. Maliamu wihoeeye kɨntʉ kɨza, hangɨ kʉtilɨ anga mʉntʉ nʉʉkʉmʉhegelya.”

The Word for the World International

https://app.library.bible/content/a61fa9a81f3a5fa3