AGALATIA2
1Sʉnga naɨyakɨla myaka ikʉmi na ɨnnɨ, kɨkanankɨla hangɨ kenda kʉ kɨsalɨ ka Yelusalemu kɨze kɨpalʉng'wɨ nʉ Balinaba kɨkamʉhola nʉ Tito.2Aɨnendile kʉng'wanso kʉnsoko aɨnkunʉkʉɨwe ni Itunda kɨna nende, nɨatambʉɨle kɨmpelo atongeeli impola niya Nkani Nza nɨkʉitantya kʉ antʉ nɨshanga Ayahudi. Aɨntendile itɨ ingɨ mʉlɨmo wane naɨnitumaa nʉ mʉlɨmo ʉwʉ nɨkitʉma itungo ɨlɨ, ɨleke kʉtula kitʉma mʉlɨmo wanakanda.3Ɨkigombya nʉnene kɨna ʉ Tito nɨɨza Mʉyunani shanga aɨamʉsingilye kʉtalwa kiganda,4palʉng'wɨ nɨ kɨna anyandʉgʉ angɨza naɨitendisilye kɨna amʉhʉɨɨe ʉ Kilisito naɨhangilye nʉsese kɨwipiho ahume kʉpeela ʉwidesi witʉ nɨkʉkete mʉng'wa Kilisito Yesʉ, ahume kʉ ʉtenda ʉsese kɨatʉng'waa a malagʉʉlyo ang'wa Musa,5ʉsese shanga kɨkigombya lʉkʉlʉ nɨenso, ingɨ Nkani Nza yilongoleke kʉtula nʉ nyenye ɨkalɨ na kalɨ.6Ingɨ atongeeli awa nɨakʉigwe aɨagila ikani ipya nɨlakʉntambʉɨla. kʉng'wane agila kɨntʉ nɨkakʉntambʉɨla, Kʉlʉ kʉʉ nɨkanso kʉng'waane shanga kɨntʉ, kʉnsoko Itunda shanga wɨkʉɨɨla.7Kɨmɨkɨɨli kakwe antʉ nɨanso ɨkalɨnga kɨna Itunda ʉmpee mʉlɨmo nʉwa kʉtanantya Nkani Nza kʉ antʉ nɨshanga Ayahudi, anga ʉ Petelo nʉpewe mʉlɨmo nʉwa kʉatantɨlya Ayahudi,8Itunda naɨʉmʉpee ʉ Petelo ʉhumi nʉwa kʉtula mitʉmi kʉ Ayahudi, yʉyo ʉmpee nʉnene ga ʉhumi nʉwa kʉtula nɨmitʉmi kʉ antʉ nɨshanga Ayahudi.9Itɨ gwa, Yakobo nʉ Petelo nʉ Yohana, naɨatuile anga atongeeli nɨakʉlʉ, ɨkalɨnga ʉkende naɨnkendepilwe ni Itunda ɨkakʉgombya ʉnene nʉ Balinaba kʉlongole kʉ antʉ nɨshanga Ayahudi, nɨanso alongole kʉ Ayahudi.10Ɨkakʉlompa kʉlongoleke kʉaalya ɨahimbɨ nɨamolɨ mʉ antʉ nɨamʉhʉɨɨe ʉ Kilisito, ʉnene nongolekile kʉlɨtenda nangalu.11Petelo naɨwapika kʉ kɨsalɨ ka Antiokia, ʉnene nɨkamʉkenela pa antʉ kʉnsoko awalimangɨɨla.12Ng'wandyo ʉ Petelo aɨʉkendalya ndya palʉng'wɨ nɨ antʉ nɨshanga Ayahudi, naɨapika ɨantʉ naɨalagɨigwe nʉ Yakobo, nʉwanso wɨkatuliheja nʉ kikoma nɨ antʉ nɨshanga Ayahudi, kʉnsoko akʉogopa antʉ nɨatawe kiganda.13Nɨ Ayahudi ang'wɨ naɨahʉɨɨli ɨkigombya nʉ Petelo mʉ ʉteele ʉwʉ, Balinaba nʉyo wɨkihanja mʉteele ʉwʉ.14Naɨnaona kɨna shanga akitʉma anga tai a Nkani Nza, nɨkamʉɨla ʉ Petelo pa antʉ ɨhi, “Ʉewe wɨ Mʉyahudi, ingɨ wishiɨ anga mʉntʉ nɨshanga Mʉyahudi, yatula ʉlɨ mʉʉmɨɨlye antʉ nɨshanga Ayahudi atyate ntendo niya Ayahudi?”15Ʉsese ingɨ kɨ Ayahudi kʉʉtugwa, shanga anga antʉ amahɨɨ mangɨza Ayahudi nɨɨaɨla, “Anyamɨlandʉ.”16Ingɨ kʉlɨngile ɨkʉlʉ kʉʉlʉ kɨna ʉmʉntʉ shanga ʉhumile kʉgombwa ni Itunda kʉtyata malagɨɨlyo, ingɨ kʉnsoko akʉmʉhʉɨɨla Yesʉ Kilisito, nʉsese ga Ayahudi kʉmʉhuɨɨe ʉ Kilisito Yesʉ ingɨ kʉhume kʉgombeka kʉng'wi Itunda kʉkɨɨla nɨkʉhʉɨɨe ʉ Kilisito shanga kʉnsoko akʉtyata malagɨɨlyo ang'wa Musa, kʉnsoko mʉntʉ shanga ʉkʉaɨɨligwa kɨna ʉgombekile kʉng'wi Itunda kʉtyata malagɨɨlyo.17Anga kʉlowe kʉgombwa ni Itunda kʉʉkamɨnkani nʉ Kilisito, ʉsese kʉʉtula kɨanyamɨlandʉ, itɨɨ lɨkʉlagɨɨla kɨna ʉ Kilisito wɨsasha kitʉme mɨlandʉ ne? Shangaʉ.18Ʉnene anga ndeke kʉtyata malagɨɨlyo nihume kʉgombeka pang'wi Itunda, nandye hangɨ kʉsʉkɨla kʉtyata malagɨɨlyo naɨnɨmahitile, pang'wanso kʉtula nɨ mɨlandʉ.19Kʉnsoko ʉnene kʉtyata malagɨɨlyo nanso ʉnene nkule, malagɨɨlyo yayo ambʉlagile nihume kishiɨ kʉnsoko ang'wi Itunda. Ʉnene nkomilwe mʉ mʉsalaba palʉng'wɨ nʉ Kilisito,20nitungo ɨlɨ nɨmʉpanga, ingɨ shanga nene, ingɨ Kilisito wishiɨ mʉng'wane. Likalo ʉlʉ nɨnishiɨ itungo ɨlɨ ingɨ kʉʉhʉɨɨli nʉwa Ng'wana wang'wi Itunda, ng'wenso naɨʉndoilwe sʉnga wɨkapumya ʉpanga wakwe kʉnsoko ane.21Shanga kʉʉhita ʉkende wang'wi Itunda. Anga itule ʉmʉntʉ wɨtendwa wagombwe ni Itunda kʉtyata malagɨɨlyo, kʉlʉlo kʉsha kʉng'wa Kilisitoyɨkʉtula nakanda.
The Word for the World International