AGALATIA1
1Ʉnene Paulo nɨ mitʉmi kʉmʉandɨkɨla ɨbalʉa ɨyɨ, shanga nitangilwe ang'wɨ kʉlagɨɨligwa nɨ antʉ, ingɨ nitangilwe nʉ kʉlagɨɨligwa kʉ ʉhumi wang'wa Kilisito nʉ kʉ ʉhumi wang'wi Itunda Tata naɨʉmiyʉkilye ʉ Yesʉ.2Nɨ anyandʉgʉ ɨhi nɨɨpalʉng'wɨ nʉnene kʉʉmʉlamʉsha milʉndo nʉwa antʉ nɨmʉmʉhʉɨɨe ʉ Kilisito nɨmʉkolɨ kʉ Galatia.3Kʉʉmʉlompa Itunda Tata witʉ nɨ Isekʉlʉ witʉ Yesʉ Kilisito wamʉkembete nʉ kʉmʉpa matiliga ʉnyenye mɨhi.4Kilisito aɨʉpumilye ʉpanga wakwe kʉnsoko akʉheja mɨladʉ itʉ, ingɨ wahume kʉʉguna ʉsese nɨkishiɨ mʉ ʉnkumbigʉlʉ ʉwʉ, anga mʉloewe Itunda hangɨ Tata.5Itunda nʉwakʉligwe ɨkalɨ na kalɨ. Ɨtai.6Nakʉɨlwa nangalu kɨna itungo iniino ʉnyenye mamʉleka Itunda naɨ ʉmitangile kʉ ʉkende wang'wa Kilisito, masɨngɨɨlya mpola ngɨɨza antʉ ang'wɨ nɨitanga Nkani Nza.7Ingɨ kʉtilɨ, “Nkani Nza ningɨɨza,” Kʉlʉ kʉʉlʉ akolɨ antʉ akʉmʉzuga, hangɨ aloilwe kʉpɨʉla ɨtai a Nkani Nza niyang'wa Kilisito.8Palʉng'wɨ nɨ kɨna anga itule mʉntʉ ang'wɨ malaɨka kʉpuma kigʉlʉ wamʉtanantɨlye mpola ngɨza kʉleka ɨyɨ nɨkʉtanantilye, mʉntʉ nʉwanso Itunda nʉwamʉzume ɨkalɨ na kalɨ.9Anga naɨkakondya kʉtambʉla, kʉsʉkɨɨla hangɨ, mʉntʉ wɨhi anga wamʉtanantɨlye Nkani Nza ngɨza, niyihutanile nɨyi naza mahʉɨɨla, mʉntʉ nʉwanso nʉwazʉng'we ni Itunda.10Itɨɨ, itungo ɨlɨ ndoilwe kʉgombeka kʉng'wa nyenyu, ndoilwe kʉgombeka kʉ antʉne ang'wɨ kʉgombeka kʉng'wi Itunda? Anga itule nkɨlɨ ndoilwe kʉaloeelya antʉ, shanga aza nzeetula nɨ mitʉmi wang'wa Kilisito.11Anyandʉgʉ ane, ndoilwe mʉlɨnge kɨna Nkani Nza naɨ nʉmʉtanantɨɨye shanga ipumile kʉ antʉ.12Ʉnene shanga aɨmpewe Nkani Nza nɨ antʉ, ang'wɨ kɨna aɨmanyisigwe nɨ antʉ. Ingɨ Yesʉ Kilisito ng'wenso aɨʉnkunʉkʉɨe.13Ʉnyenye mʉlɨngile ʉnene naɨnɨlɨ pakalɨ naɨtyatile ntendo niya Kɨyahudi. Hangɨ aɨmigulye naɨnɨaja antʉ nɨamʉhʉɨɨe ʉ Kilisito nʉ kʉgema kʉlimansɨɨlya ʉhʉɨɨli wao.14Ʉnene aɨnɨalemilye anyilika ɨane ɨdʉ kʉkʉɨɨla ntendo yitʉ niya Kɨyahudi. Aɨnkomanɨɨye kɨsa kʉtyata ntendo niya atata itʉ.15Ingɨ Itunda kʉ ʉkende wakwe, aɨʉnkomile kandɨɨlya naɨnkɨlɨ kʉtugwa, wɨkanintanga nʉmitʉmɨle,16itungo ʉdu naɨʉlamʉe kʉnkʉnʉkʉɨla ʉng'waakwe nʉwɨlɨ nihume kʉitanantya Nkani Nza niyakwe kʉ antʉ nɨshanga Ayahudi. Ʉnene shanga kɨsɨgilye nʉ mʉntʉ wɨhi,17ang'wɨ shanga aɨnankɨe kenda kʉ kɨsalɨ ka Yelusalemu kʉaona antʉ naɨantongee ʉnene kʉtula itʉmi, aɨnendile hanza kʉ kɨsalɨ ka Alabia sʉnga nɨkatulya kʉ kɨsalɨ ka Damesiki.18Naɨakɨla myaka ɨtaatʉ papo nɨkalongola kʉ kɨsalɨ ka Yelusalemu kione nʉ Petelo . Nɨkishiɨ nʉyo mahikʉ ikʉmi naɨtaano,19shanga aɨkiine nɨ itumi nɨangɨza ingɨ Yakobo du nɨɨza mʉniino wang'wi Isekʉlʉ Yesʉ.20Nkani nɨnʉmʉandɨkɨe, Itunda ʉlɨngile kɨna shanga kʉtambʉla anga ʉteele, ʉine.21Panyambele nɨkalongola nkɨka niya isalɨ niya kʉ Shamu nʉkʉ Kilikia.22Matungo nanso ʉnene shanga aɨmanyɨkile kʉ antʉ nɨamʉhʉɨɨe ʉ Kilisito nɨakolɨ kʉ isalɨ niya Ʉyahudi.23Antʉ nɨanso aɨigulye impola yane kɨna, “Mʉntʉ ʉyo naɨwɨkaja pakalɨ, itungo ɨlɨ wainatanantya mpola niya ʉhʉɨɨli wʉwo wʉʉwo naɨʉgemile kʉʉlimansɨɨlya.”24Ahʉɨɨli nɨanso ɨkamʉkʉlya Itunda kʉnsoko ane.
The Word for the World International