2 Akolinto8

1Itɨ gwa anyandʉgʉ ane, ndoilwe ʉnyenye mʉlɨnge ʉkende ʉwo Itunda nʉakendepile milʉndo nʉwa antʉ nɨamʉhʉɨɨe ʉ Kilisito nɨakʉ Makedonia.2Palʉng'wɨ nɨ mageng'wa angulu nʉlwago nɨɨkɨɨla, ingɨ aɨaloilwe lʉkʉlʉ, palʉng'wɨ kɨna aɨahimbɨ kʉkɨlɨnkɨɨla, nɨanso aɨakete nkolo nza.3Kʉmʉɨla kʉlʉ kʉʉlʉ kɨna aɨapumilye maintʉ ɨdʉ kʉkɨla ingulu yao. Hangɨ aɨapumilye kʉ ʉlowa wao, kʉtilɨ ʉmʉntʉ naɨ ʉatambʉɨe,4ɨkakinena kʉagombye kitʉmania nʉsese mʉmʉlɨmo ʉwʉ nʉwakʉaɨɨlya antʉ ang'wi Itunda nɨakolɨ kʉ kɨsalɨ ka Yelusalemu.5Aɨapumilye kʉkɨla naɨkʉsɨgɨɨe, nɨanso ɨkandya kipumya hanza kʉng'wi Isekʉlʉ, sʉnga ɨkipumya hangɨ kʉng'witʉ, anga Itunda nʉloilwe.6Kʉlʉlo, kɨkaminena ʉ Tito naiwandilye mʉlɨmo nʉwanso, waze wamʉaɨɨlye mʉkodeelye mʉlɨmo ʉwʉ nʉwa ʉlowa mʉng'wanyu7Ʉnyenye mʉkete maintʉ ɨhi. Mʉkete ʉhʉɨɨli nʉ ʉhumi nʉ ʉlɨngi ni ngulu yɨhi nɨyakitʉma makani nɨmaza, nʉ ʉlowa wanyu kʉng'witʉ. Kʉlʉlo kʉsɨgile mʉtule mɨakamatɨku nɨ nkolo nza mʉ mʉlɨmo ʉwʉ nʉwa ʉlowa.
8Shanga kʉmʉsinja, ingɨ ndoilwe kʉmʉlagɨɨla antʉ ang'wɨ nɨakete ngulu niyakʉaɨɨlya nɨhume kʉlɨnga ʉlowa wanyu nʉwatai wɨʉlɨ.9Ndogoelyo mʉlɨngile ʉkende Isekʉlʉ witʉ Yesʉ Kilisito ʉmʉkendepile ʉkende wakwe, mʉlɨngile kɨna aɨʉkete maintʉ ɨhi, wakitendisa mʉhimbɨ kʉnsoko anyu, ingɨ kʉkɨɨla ʉhimbɨ wakwe wamʉgolɨpye ʉnyenye.
10Itɨ gwa ndoilwe kʉmʉɨla kɨna, yɨnonee itungo ɨlɨ kʉmaɨɨlya makani ayo naɨ mandilye ʉng'wakazo. Ʉnyenye aɨmandilye kitʉma itɨ.11Itɨ gwa, anga naɨmʉkete nkolo akʉaɨɨlya, ʉʉgwa pumyi anga nʉkete ʉmʉntʉ, kondeelyi ʉmʉlɨmo ʉwʉ kʉnkolo anga naɨmandilye.12Kʉnsoko angaze mʉntʉ ʉkete nkolo akʉaɨɨlya, Itunda wɨsɨngɨɨlya kɨntʉ kɨhi nʉʉhumile kʉpumya, shanga wɨgoza kɨntʉ mʉntʉ nɨmʉgila.
13Ʉnyenye shanga mʉtakɨwe magigwe nʉ kʉtula nʉmʉligo nʉwa kʉaaɨɨlya antʉ nɨangɨɨza, itakɨwe mʉleke kikɨlankɨla.14Itungo ɨlɨ mʉkete maintʉ ɨdʉ kʉkɨlɨnkɨɨla mʉhumile kʉaaɨlya antʉ nɨagila. Ingɨ nɨenso anga alije maintʉ ɨdʉ kʉkɨlɨnkɨɨla, ahumile kʉmʉaɨɨlya ʉnyenye anga mʉhiɨlwe, kʉlʉlo shanga mʉkikɨlankɨla,15anga Wandɨkwa wang'wi Itunda nʉwandɨkile kɨna, “Naɨ wilingile yɨdʉ aɨmʉgila anga ʉsago, Nʉyo naɨwilingɨɨe pikeehʉ shanga wɨkakepelwa.”
16Nʉmʉlʉmbile Itunda naɨʉmʉpee ʉ Tito nkolo akʉmʉaɨɨlya ʉnyenye anga nɨnkete ʉnene.17Shanga kɨna ʉ Tito aɨʉgombile ilompi litʉ, ingɨ aɨʉloilwe kʉmʉaɨɨlya kʉpikɨɨla kʉlamʉla ʉng'wenso kɨza kʉng'wanyu.18Palʉng'wɨ nʉ Tito kʉʉmʉlagɨɨlya mʉntʉ ʉng'wɨ nʉwa lʉkumo lʉza mʉ milʉndo nʉwa antʉ nɨamʉhʉɨɨe ʉ Kilisito kʉ mʉlɨmo wakwe nʉwa kʉatanantɨlya antʉ Nkani Nza.19Shangaʉ du, nʉwanso ʉhoilwe nʉ milʉndo nʉwa antʉ nɨamʉhʉɨɨe ʉ Kilisito wakʉɨlanie nʉ sese mʉ mʉhɨnzo itungo nɨkʉʉtala mʉlɨmo witʉ ʉwʉ nʉwa ʉlowa, mʉlɨmo nikʉitʉma kʉnsoko aʉkʉlʉ wang'wa Isekʉlʉ Itunda nʉkʉlagɨla isɨgo litu niza.
20Shanga kʉloilwe kʉmelwe nʉ mʉntʉ mʉwimɨɨli witʉ nʉwakʉtala maintʉ napumigwe nɨantʉ kʉ nkolo nza.21Ʉsese shanga kʉloilwe kitʉma iza pang'wi Isekʉlʉ du, ingɨ nʉ mʉantʉ ga.
22Itɨ gwa, kʉʉmʉlagɨɨlya mʉluna witʉ mʉngɨɨza palʉng'wɨ nɨaluna nɨanso, mʉntʉ ʉyʉ kamʉgemile nkʉa yɨdʉ nʉkʉmʉona kɨna ʉkete nkolo nza nakʉaɨɨlya antʉ angɨɨza, nɨtungo ɨlɨ ga ʉkete nkolo nza nakʉaɨɨlya ɨantʉ kʉnsoko ʉmʉhʉɨɨe ʉnyenye.23Anga ɨze ʉkolɨ mʉntʉ ʉloilwe kʉmʉlɨnga ʉ Tito ingɨ mɨane, kitʉmania mʉlɨmo kʉnsoko akʉaɨɨlya ʉnyenye, hangɨ anga ɨze ʉkolɨ mʉntʉ ʉloilwe kʉlɨnga anyandʉgʉ awa nɨakʉɨlanilye, antʉ nɨanso ingɨ amilʉndo nʉwa antʉ nɨamʉhʉɨɨe ʉ Kilisito, nɨenso ɨmʉkʉlya ʉ Kilisito.24Kʉlʉlo, ʉlowa wanyu wingeeleke kʉng'wao, ingɨ milʉndo nʉwa antʉ nɨamʉhʉɨɨe ʉ Kilisito alɨnge kɨna kilolya kʉnsoko anyu.

The Word for the World International

https://app.library.bible/content/a61fa9a81f3a5fa3