1 AKOLINTO8

1Ndoilwe nʉmʉandɨkɨla kʉndya niyipumigwe mipolyo.
Kʉlɨngile kɨna, “Kɨhi kʉlɨngile,” Ʉlɨngi wɨleta wiketi, ʉlowa ingɨ wʉwo wɨkʉsasha kʉaaɨɨlye antʉ nɨamʉhʉɨɨe ʉ Yesʉi.
2Mʉntʉ nʉwiine kɨna ʉlɨngile kɨntʉ, kʉtai shanga ʉlɨngile kɨntʉ kɨhi anga nʉtakɨwe kʉlɨnga.3Ingɨ mʉntʉ nʉmʉloilwe Itunda ʉlɨngɨkile kʉng'wi Itunda.
4Kʉlʉlo, ndya niyipumigwe ipolyo kʉ alʉngʉ, kʉlɨngile kɨna alʉngʉ shanga kɨntʉ mʉʉnkumbigʉlʉ, kʉine kɨna Itunda ingɨ ʉng'wɨ du.5Anga itule kɨna amolɨ maintʉ nitangwa “alʉngʉ,” mihɨɨ ang'wɨ kigʉlʉ, anga ɨze amolɨ “alʉngʉ” ɨdʉ nɨ “Isekʉlʉ” ɨdʉ,6nɨitɨga ʉsese ʉmolɨ Itunda ʉng'wɨ du. Nʉyo Tata witʉ, intʉ yɨhi yitundilwe nʉng'wenso, kʉnsoko akwe ʉsese kʉkolɨ, hangɨ ʉkolɨ Isekʉlʉ ʉng'wɨ du, Yesʉ Kilisito, kʉng'wakwe intʉ yɨhi aɨyitundilwe, nʉsese kishiɨ kʉnsoko akwe.
7Ingɨ, shanga mʉntʉ wɨhi ʉlɨngile iza ʉlʉ, kʉnsoko akolɨ antʉ ang'wɨ aɨakete ntendo akipolya kʉ adʉdʉ. Antʉ nɨanso nitungo ɨlɨ ga nɨakʉlya ndya niyanso ɨiona anga akʉlya ndya nɨyipoigwe kʉ adʉdʉ, kʉnsoko akɨlɨ kʉhʉɨɨla mʉitakɨwe, mʉnkolo yao iona kɨna akʉtenda makani nɨshanga agombekile kʉng'wi Itunda.8Ingɨ indya shanga yɨkʉhumbeelya kʉng'wi Itunda, anga kʉleke kʉlya shanga kʉʉkepelwa anga kɨntʉ, hangɨ anga kʉlye shanga kʉongeligwa anga kɨntʉ.
9Ingɨ ihambi, ʉlɨngi wanyu ʉwʉ ʉleke kʉtula kɨnkwatya kʉ antʉ awa nɨakɨlɨ kʉhʉɨɨla.10Kʉnsoko mʉntʉ nʉwaʉhʉɨɨli ʉnino anga wakʉone ʉewe nʉlɨngile ʉkʉlya indya niyanso mʉnyʉmba niya adʉdʉ, itɨɨ, mʉnkolo akwe shanga ʉkʉsɨgane kɨna nʉyo ʉtakɨwe walye indya nipoeigwe kʉ adʉdʉ?11Mʉntʉ ʉyʉ nʉwaʉhʉɨɨli ʉnino Kilisito naɨʉkule kʉnsoko akwe ʉkʉlimɨla kʉnsoko aʉlɨngi wako.12Anga mʉagazɨɨlye anyandʉgʉ anyu nɨaʉhʉɨɨli ʉnino mʉkʉasasha itʉme mɨlandʉ nʉkʉalemalya ʉhʉɨɨli wao, pang'wanso mʉkʉtula magaza kʉng'wa Kilisito.13Kʉlulo anga itule ndya nɨkʉlya yikʉmʉsasha ʉmʉhʉɨɨli mɨane watende mɨlandʉ, pang'wanso shanga kʉlya ɨnyama kwee, ndeke kʉmʉsasha mʉhʉɨɨli mɨane witume mʉlandʉ.

The Word for the World International

https://app.library.bible/content/a61fa9a81f3a5fa3