1 AKOLINTO7

1Itungo ɨlɨ, tɨgi nʉmʉsʉkɨɨlye nkani naɨmʉnandɨkɨe.
Aɨmʉnkoiye izane mitʉnja anga waleke kʉtɨna.
2Ingɨ kʉnsoko aʉgoolyi, ʉgwa, mitʉnja wɨhi nʉwatule nʉ mʉsʉngʉ wakwe ʉng'wenso nʉ mʉsʉngʉ wɨhi nʉwatule nʉ mʉgoha wakwe ʉng'wenso.3Mʉgoha nʉwamʉtendeele ʉmʉsʉngʉ wakwe anga mʉitakɨwe nʉ mʉsʉngʉ nʉwamʉtendeele ʉmʉgoha wakwe anga mʉitakɨwe.4Mʉsʉngʉ nʉtɨnilwe shanga ʉhumile kʉʉtendeela mʉɨlɨ wakwe anga mʉtakɨe ingɨ mʉgoha wakwe nʉ mʉgoha nʉtɨnile shanga ʉhumile kʉʉtendeela mʉɨlɨ wakwe anga mʉtakɨe ingɨ mʉsʉngʉ wakwe.5Mʉleke kiima, ingɨ anga migombye kʉleka kitungo ʉdu mʉhume kʉlija lyoma nɨlakʉmʉkʉlya Itunda. Panyambele misʉkɨle hangɨ ingɨ shetani waleke kʉmʉgema kʉnsoko akʉleng'wa kʉgimya.
6Ntambʉe itɨ ingɨ kʉmʉsɨja ʉdu shanga kʉmʉsinja.7Azandoilwe antʉ ɨhi atule anga nene, ingɨ mʉntʉ wɨhi ʉkete kɨpegwa kakwe kʉpuma kʉng'wi Itunda, mʉntʉ mʉya ʉpewe kɨpegwa ɨkɨ nʉ mʉya ʉpewe kɨpegwa kɨko.
8Itungo ɨlɨ, kʉaɨla awa nɨshanga atɨnile nʉmʉsʉngʉ nʉshɨɨwe nʉmʉgoha aza iza ishiɨ anga ʉnene nɨnɨlɨ.9Mʉntʉ anga waleng'we kʉgimya itɨ, nʉwatɨne nʉkʉtɨnwa. Ingɨ bahu kʉtɨna ang'wɨ kʉtɨnwa kʉkɨla kʉhung'wa nsʉla.
10Kʉ mʉntʉ nʉtɨnile nkete ilagɨɨlyo, hangɨ shanga ilagɨɨlyo lane, ingɨ ilagɨɨlyo lang'wi Isekʉlʉ, mʉsʉngʉ nʉwaleke kileka nʉmʉgoha wakwe,11ingɨ anga ileke nʉng'wenso, nʉwasigeʉ waleke kʉtɨnwa kʉngɨɨza, anga ɨza shangaʉ wigombye nʉkisʉkɨla nʉmʉgoha wakwe, mʉgoha nʉng'wenso nʉwaleke kʉmʉleka ʉmʉsʉngʉ wakwe.
12Itungo ɨlɨ kʉligitya nɨantʉ nɨangɨza naɨatɨnile azeakɨlɨ kʉmʉhʉɨla ʉ Yesʉi, aya nɨkʉtambʉla shanga Isekʉlʉ ʉtambʉe ingɨ masigo ane ʉdu, mʉgoha nɨmʉhʉɨɨli wang'wa Yesʉ nʉtɨnile mʉsʉngʉ nɨshanga mʉhʉɨɨli wang'wa Yesʉ nʉ mʉsʉngʉ nʉwanso ʉgombile kishiɨ nʉng'wenso, nʉwaleke kʉmʉleka.13Hangɨ, mʉsʉngʉ ang'wɨ mʉhʉɨɨli wang'wa Yesʉ ʉtɨnilwe nʉmʉgoha shanga mʉhʉɨɨli wang'wa Yesʉ nʉmʉgoha nʉwanso ʉgombile kishiɨ nʉng'wenso, itɨ gwa, nʉwaleke kʉmʉleka ʉmʉgoha wakwe.14Ndogoelyo ʉmʉgoha nʉwanso nɨshanga mʉhʉɨɨli wang'wa Yesʉ wɨgombwa ni Itunda kʉkɨɨla mʉsʉngʉ wakwe, nʉ mʉsʉngʉ nɨshanga ʉhʉɨɨe wɨgombwa ni Itunda kʉkɨɨla mʉgoha wakwe. Anga ɨze shangaʉ ana anyu shanga akʉsɨngɨɨligwa ni Itunda, katɨ itungo ɨlɨ ɨana ana ang'wi Itunda.15Nɨ itɨ ga, ang'wɨ ʉyʉ nɨshanga mʉhʉɨɨli wang'wa Yesʉ ʉloilwe kileka nʉyʉ nɨ mʉhʉɨɨli wang'wa Yesʉ, nʉwa mʉleke ʉdu. Pang'wanso mʉhʉɨɨli wang'wa Yesʉ ʉyʉ shanga ʉgiɨigwe nʉ witɨni nʉwanso. Ndogoelyo Itunda ʉmitangile ʉnyenye mishiɨ kʉ matiliga.16Ʉewe mʉsʉngʉ nʉmʉhʉɨɨe ʉ Yesʉi, shanga ʉhumile kʉlɨnga kɨna ʉhumile kʉmʉguna ʉmʉgoha wako. Ang'wɨ ʉewe mʉgoha nʉmʉhʉɨɨe ʉ Yesʉi, shanga ʉhumile kʉlɨnga kɨna ʉhumile kʉmʉguna ʉmʉkɨmako kʉnsoko aʉhʉɨɨli nʉwako.
17Mʉntʉ wɨhi nʉishiɨ anga Isekʉlʉ naɨʉmʉpangɨe naɨwakɨlɨ kitangwa ni Itunda. Ɨlɨ lɨlɨ ilagɨɨlyo lane kʉ maumbɨ ɨhi na antʉ nɨamʉhʉɨɨe ʉ Yesʉi.18Anga ɨze mʉntʉ aɨwitangilwe waze wakɨlɨ kʉtalwa kiganda, nʉwaleke kisɨngɨɨla kɨna wakɨlɨ kʉtalwa kiganda, ang'wɨ mʉntʉ naɨʉkitangwa aɨwatawe kiganda, nʉwaleke kʉtalwa kiganda.19Kʉtalwa kiganda ang'wɨ kʉhita kʉtalwa kiganda shanga kɨntʉ, nɨkɨkʉlʉ ingɨ kʉamba malagɨɨlyo ang'wi Itunda.20Itɨ gwa, mʉntʉ wɨhi nʉwasage anga naɨwɨlɨ itungo naɨʉkitangwa.21Itɨɨ, ʉewe itungo naɨwitangilwe ni Itunda aɨwɨmʉtʉʉng'wane? Ʉzaʉ, leka kʉkela, ingɨ anga ʉlije ɨlyoma, litʉmɨle.22Ndogoelyo mʉntʉ nʉitangilwe ni Isekʉlʉ anga ɨze mʉtʉʉng'wa witula mʉntʉ nʉwidesile kʉng'wa Isekʉlʉ. Nʉyʉ ga naɨwitangilwe waze widesile, witula mʉtʉʉng'wa wang'wa Kilisito.23Mɨhi mʉgʉilwe nʉ Kilisito kʉ nsaɨlo, kʉlʉlo mʉleke hangɨ kʉtula mɨatʉʉng'wa amʉntʉ.24Anyandʉgʉ ane, mʉntʉ wɨhi nʉwishiɨ anga naɨwɨlɨ apo naɨʉkitangwa ni Itunda.
25Itungo ɨlɨ kʉaandɨkɨla ananso nɨakɨlɨ kʉtɨnwa, ʉnene nɨmʉgila anga ilagɨɨlyo kʉpuma kʉng'wi Isekʉlʉ, ingɨ nene kʉmʉsɨja kʉkɨaisa kang'wi Isekʉlʉ mʉtakɨwe kʉhʉɨɨla ʉlʉkani lane.
26Kʉnsoko alwago nʉlʉkolɨ, nsɨgile kɨna iza mʉntʉ wasage anga nʉwɨlɨ.27Itɨɨ, anga ɨze ʉtɨnile. leka kileka nʉmʉsʉngʉ nʉwako. Ʉewe nɨshanga ʉtɨnile. Itɨ gwa, leka kʉtɨna.28Ingɨ anga ʉtɨne shanga witʉmile anga mʉlandu, nʉmʉnanso anga watɨnwe shanga witʉmile anga mʉlandu. Antʉ nɨakitɨna akʉtula nʉlwago nʉla mʉnkumbigʉlʉ ʉwʉ, ʉnene ingɨ azandoilwe ʉlwago nʉlanso lʉleke kʉmʉhanga ʉnyenye.
29Anyandʉgʉ ane, ndoilwe nʉnge itɨ, matungo makʉpɨ nasagile, kʉpuma itungo lɨlɨ antʉ nɨatɨnile nɨishiɨ anga shanga atɨnile,30antʉ nɨakʉlɨla atule anga shanga akʉlɨla, nɨantʉ nɨaloilwe atule anga shanga aloilwe, antʉ nɨakʉgʉla atule anga agila anga kɨntʉ,31nɨantʉ nɨakete ɨmɨlɨmo mʉnkumbigʉlʉ ʉwʉ atule anga agila mɨlɨmo lʉkʉlʉ. Kʉnsoko ʉnkumbigʉlʉ ʉwʉ anga nɨkʉine ʉkʉkɨla.
32Ndoilwe ʉnyenye mʉleke kogopa. Mʉntʉ nɨshanga ʉtɨnile wipumya kitʉma mʉlɨmo wang'wi Isekʉlʉ wahume kʉmʉloeelya Isekʉlʉ.33Mitʉnja nʉtɨnile witʉma makani amʉnkumbigʉlʉ ingɨ wahume kʉmʉloeelya mʉsʉngʉ wakwe,34hangɨ ɨkolɨ nsuta kʉ mʉsʉngʉ nʉtɨnilwe nʉ mʉnanso. Mʉnanso witʉma makani ang'wi Isekʉlʉ wipumya mʉɨlɨ nɨ nkolo akwe wahume kʉmʉloeelya Isekʉlʉ, ingɨ mʉsʉngʉ nʉtɨnilwe witʉma makani amʉnkumbigʉlʉ ʉwʉ wahume kʉmʉloeelya mʉgohakwe.
35Kʉmʉtambʉɨla nkani izi nihume kʉmʉaɨɨlya shanga kʉmʉgilya. Ingɨ ndoilwe mishiɨ iza ingɨ mʉhume kʉmitʉmɨla Isekʉlʉ kʉ nkolo ɨng'wɨ.
36Anga ɨze mʉgoha ʉkʉona kɨna shanga ʉkʉmʉtendeela iza mʉnanso nʉmʉligilye anga wahite kʉmʉtɨna, nɨ myaka akʉtɨnwa ɨlongolekile, nʉng'wenso nsʉla akwe ɨkʉmʉlema, nʉwatende mʉloewe ingɨ nʉwatɨne ʉdu. Pang'wanso shanga ʉkʉtula witʉmile mɨlandʉ.37Anga mʉgoha nʉwanso walamʉle mʉnkolo kʉhita kʉtɨna hangɨ ang'wɨ ʉhumile kigilya nsʉla akwe nʉkʉlamʉla witʉme ntʉni, itɨgwa, ʉkʉtula witʉma iza anga wahite kʉmʉtɨna ʉmʉnanso ʉyʉ.38Kʉlʉlo, mʉgoha ʉyʉ nʉkʉlamʉla kʉtɨna ʉkitʉma iza, nʉyu nʉkʉlamʉla kʉhita kʉtɨna ʉkitʉma izambele.39Mʉsʉngʉ nʉtɨnilwe ʉkʉtula ʉtungilwe nɨmalagɨɨlyo awitɨni ʉmʉgoha nʉwakɨlɨ kʉsha, ingɨ mʉgoha wakwe anga washe ʉmʉsʉngʉ widesa, anga walowe ʉkʉtɨnwa nʉ mʉgoha wihi, ingɨ watule mʉntʉ nʉmʉhʉɨɨe ʉKilisito.40Ingɨ ʉnene mine, iza mbele anga mʉsʉngʉ nʉshɨɨwe nʉ mʉgoha wishiɨ waleke kʉtɨnwa. Nanso masɨgo ane, hangɨ kʉsɨga kɨna nkete Ng'wahʉ wang'wi Itunda.

The Word for the World International

https://app.library.bible/content/a61fa9a81f3a5fa3