Esta2
Enam Esta Abọọñanwaan
1Akema ke ini ifiobesịd Adidem Seeses amaakesuuhọ, anye amaatoiyo Fasti ye se anye akenam ndin ye se anye akewuuk abaña anye.2Akem asaña-asaña ayịnufọk adidem amaabo, “Yak eyeem mme uyaiya mboppo abọikpa enọ adidem.3Yak adidem amek mme akamautom ke afịd idak ukara amọ adiben afịd mme uyaiya ubọikpa ami ndi ke esịd akwere adidem ke sitadeel Susa. Yak esịn ammọ ke idak ukpeme Hekai, itọ adidem, a-aseeghe ñkpọ abaña ibaan; ndin yak esịn ammọ ke ñkʌhọ uyai.4Ndin yak ayịn abọikpa ake anemme adidem esịd ado abọọñanwaan ke itie Fasti.” Item ami amaanem adidem esịd, ndin anye amaadat item ami.5Ndin awo Yuu amaaba ke sitadeel Susa aketooho aduuk Benyamin, anyịñ amọ akedo Mọdekai ayịn Yai, ayịn Simei, ayịn Kisi,6ake Nebukadnesa adidem Babilọn akebenne nte afʌn akpọñ Yeruselem ke atu mbon se ekeben ye Yehoiyakịn adidem Yuda.7Mọdekai amaanie ayakka a-akekereke Hadasa, ake anye akekamake sia anye ikinieghe ete me eka. Ayịn abọikpa ami, a-akenyʌññọ akere Esta, amaanie uyaiya idem ndin amaayaiya eti-eti. Mọdekai akedat anye nte ayịn amọ ke ini ete ye eka amọ emaekekpa.8Ke ini emaekesian ewʌhọ adidem ye mbed amọ, emaeben ataa uwak ubọikpa edi ke abio Susa enyʌñ esịn ke idak ukpeme Hekai. Emaeben Esta ñko ekaa ke akwere adidem enyʌñ eyaak anye esịn ke ukpeme Hekai, a-akeseeghe ñkpọ abaña ubeed ibaan.9Esta amaanem Hekai esịd ndin anye amaanie mfọn ato Hekai. Ke usọp-usọp anye amaasịn anye ke ñkʌhọ uyai anyʌñ anọ anye asaña-asaña ndidia. Anye amaamek nditọufọk ibaan itiaba e-ekesioho ke akwere adidem anọ Esta anyʌñ aben anye ye nditọufọk amọ asịn ke itie a-afọnnọ akan ke esa ibaan.10Esta ikiyaarake abio ye ubon amọ, sia Mọdekai amaakpan anye adinam ntoro.11Afịd usen Mọdekai amaasisaña akaa iso ye edem ke ñkpere akwere ufọk ibaan adise me abadie ye Esta ye se itịppe ye anye.12Mbemiso akem ini a-anaaha nte abọikpa adʌk akeba ye Adidem Seeses, ana anye abeeñe idem ñkʌhọ uyai ke afiọñ duob mme iba naña ekenịm enọ ibaan, ana akama afiọñ itiokeed ayie adan mee anyʌñ adat afiọñ itiokeed ayie pefium ye mme ñkpọ mbanaidem.13Ndin naña anye adiika ibịne adidem ado ami: Ñkpọ keed akeedodo anye akeyemme adiben nto esa ibaan ñkaa akwere adidem ado se ekenọọ anye.14Ndubiayio anye ayaakaa do ndin ke ubakusen anye anyọñ akaa akeba ke ufọk ubeed ibaan mfen ake Saaskas, itọ adidem a-akeseeghe ñkpọ abaña ibaan esa adidem. Anye idiikaaha aba ibịne adidem ibọhọke adidem ayʌkkọ ye anye anyʌñ adọñ ekoot anye ke anyịñ.15Ini a-akenaaha nte Esta (abọikpa ake Mọdekai akedatta abon, ayịn ayakka ete amọ Abihel) aka abịne adidem akekem, anye ikiyemme ñkpọ ndomokeed ibọhọke se Hekai, itọ adidem akesiak. Ndin Esta amaakịt mfọn ato afịd awo se ikikịt anye.16Emaeben Esta esọk Adidem Seeses ke ufọk ubọọñ ke ayọhọ afiọñ duob, afiọñ Tebed, ke ayọhọ isua ukara amọ itiaba.17Adidem amaama Esta akan afịd mme ibaan mfen, ndin anye amaabọ mfọn adidem ye unyịmme akan afịd mme ubọikpa mbon ñko. Ndin adidem amaadot anye anyanya ubọọñ ke iwuod anyʌñ anam anye abọọñanwaan ke itie Fasti.18Ndin adidem amaanam ekamba usọrọ, usọrọ Esta, anọ afịd mme ikpọawo ye mme adaaha amọ. Anye amaasian usen nduọkadudu ke afịd abio ukara amọ anyʌñ adeeme mme enọ asañake ye idiọọñọ mfọọnubọk ubọọñ.Mọdekai Ayaara Idiọọk Adu abaña Adidem
19Ke ini mme ubọikpa ekebonoke ayọhọ akañ iba, Mọdekai aketie ke inuaatob adidem.20Ado Esta amaadịp ntịppe abio ye ufọk anye aketooho kpa naña Mọdekai akedọkkọ anye, sia anye amaakaa iso anịm mme item Mọdekai naña anye akekpeep anye.21Ke idaha Mọdekai aketieghe ke inuaatob adidem, Biktana ye Teres, mme adaaha adidem iba e-ekesikpemeke inuausʌñ, emaekop iyadesịd enyʌñ etọọñọ edidʌk idiọọk udu ediwot Adidem Seeses.22Ado Mọdekai amaayaara adiọọñọ abaña uduak ami anyʌñ adọkkọ Abọọñanwaan Esta, a-akebenne akedọkkọ adidem, ate ke Mọdekai akekop adu ami.23Ke ini ekeduuñọke ñkpọ ami ekịt ke ado akpanikọ, emaeyịt mme adaaha iba ami ke abọbọọk. Afịd ñkpọ ami emaewet ke ñwed ñkpọntịppe ke iso adidem.Biblica, Inc.