Akpa Ñwed Samwel21
Defid ke Nọb
1Defid amaakaa Nọb, abịne Ahimelek a-akedooho aku. Ahimelek amaadịkke ke ini anye akịtte Defid amaanyʌñ abịp, “Nsoo inam afo asaña ikpọọñ? Nsoo ido awo imiisañake ye afo?”2Defid amaabọọrọ Ahimelek a-akedooho aku abo, “Adidem andọñ miin utom anyʌñ ambo, ‘Inaaha awo adiọọñọ abaña utom ami udọññọ fiin mi.’ Akpedo ideen mmi, mmebo ammọ yak edi embịne ke itie keed.3Ndin idahami, nsoo ke afo anie ke ubọk? Nnọ miin ebok uyo ition, me ñkpọ keed akeedodo se iba.”4Ado aku amaabọọrọ Defid ate, “Ami nnieghe ñkaña uyo ke ubọk; ado naña adodo adisana uyo mmọdo aba mi, ado yak ado ke ideen ado inaaha ye ibaan.”5Defid amaabọọrọ aku, “Ke akpanikọ esiben ibaan ikpọñ ñnyịn ini keed akeedodo ami ñwuọhọ. Ideen edo ndisana akpekọm ammọ eka utom i-imiisanake. Nwaanwa dise ndin ke utom usen mfịn!”6Ke ntoro aku amaanọ anye adisana uyo, sia uyo mfen imiikibaaha do ibọhọke Uyo Iso Abasi ekebenne esio ke iso Abọọñ ekenyʌññọ enịm ufiob uyo ke usen ekebenne esio.7Ndin ayịnufọk Sọọl keed mmọdo akeba usen ado, ekekọp anye enịm ke iso Abọọñ; anye akedo Dook awo Edọm, etubom mme akpemeedọñ Sọọl.8Defid amaabịp Ahimelek, “Afo unieghe eduad me akañkañ mi? Ami ñkikamake akañkañ mmi me ñkpọ ekọñ mfen ndomokeed ndi, sia adooho utom adidem akedo usọp-usọp.”9Aku amaabọọrọ, “Akañkañ Koloyad awo Filistia a-afo akewotto ke Abedeñ Ela mmọ mi; e-ewañ anye ke afọñ enịm ke edem afọñ aboditọñ. Akpedo afo ameyem anye, ben; akañkañ mfen ibaaha mi ke imiibọhọke anye ado.”Defid amaabo, “Ibaaha se iba nte anye ado; ben anye nnọ miin.”
Defid ke Kad
10Usen ado Defid amaafeghe abọkkọ Sọọl adibịne Akis adidem Kad.11Ado nditọufọk Akis emaebo anye, “Idooho Defid ido ami, adidem isọñ ami? Idooho anye ke ammọ ekwọ ebaña ke unek ammọ:“ ‘Sọọl awot ake amọ ke mme tọsịn keed,ado Defid awot ake amọ ke mme tọsịn duob’?”12Defid amaaben ikọ ami asịn ke esịd ndin idem anyeñ anye abaña Akis adidem Kad.13Ke ntoro anye amaanam ñkpọ nte awo iwuod imiifọnnọ ke iso ammọ; ndin ke idaha anye asịneke ke ubọk ammọ anye anam nte ido idaad, aduut ñkpọ ke inuaatob ado anyʌñ anam etab atọi anye ke ñwaebek.14Akis amaabo nditọufọk amọ “Sese ete ami! Iwuod amọ ifọnnọ! Nsoo inam eben anye ensọk miin?15Ado nte ami mmenekke nnana mme idaad yak ado se ndufo eben awo ami edi yak adinam utọ ñkpọ ami ke iso mmi? Ana nte awo ami adʌk adi ufọk mmi?”Biblica, Inc.