Akpa Ñwed Samwel20
Defid ye Yọnatan
1Ndin Defid amaafeghe akpọñ Naiyọd ke Rama adibịne Yọnatan akebịp, “Nsoo ke ami nnam? Nsoo ido ndudue mmi? Ndue die ete mfo yak ado se anye ayem adiñwot miin?”2Yọnatan amaabọọrọ, “Tutu amama! Afo uduukpaaha! Se, ete mmi isinamma ñkpọ ndomokeed, ekamba me etək, ke anye imiinamma yak ami ndiọọñọ. Ntaha anye akpendịppe miin anye ami-e? Idooho ntoro!”3Ado Defid amaata unwọñọ abo, “Ete mfo adiọọñọ mfọn-mfọn ke ami mmekịt mfọn ke iso mfo, ndin anye abo idem amọ ‘Inaaha Yọnatan adiọọñọ abaña ami imiidooho anye ayaafʌhọ.’ Ado adaña nte Abọọñ aduuho uwem afo anyʌñ adu uwem, ikpad keed aba ke ufọọd mmi ye ñkpa.”4Yọnatan amaabo Defid, “Se adodo ake afo ayemme ami nam unọ, ami ñyaanam unọ.”5Ke ntoro Defid amaabo Yọnatan, “Sese, ñkpọñ ado usọrọ Ufa Afiọñ, ndin akpena nte ami ndia udia ye adidem; ado yak ñka ñkedịbe ke inwañ tutu ndubiayio edem ñkpọñ amaaboiyo.6Adieke ete mfo añyemme miin ke usʌñ ndomokeed, bo anye, ‘Defid amaanekke añkpeiye miin abo yak ikaa Betlehem, abio amọ, sia adooho esʌk enam uwa afịd isua do enọ afịd ubon amọ.’7Adieke anye abooho ‘A-anekke afọn,’ awuọñọ ayịnufọk mfo a-abọkkọ. Ado adieke anye awọttọ iyadesịd, afo ayaadiọọñọ ke anye a-abiide adinnọmọ miin.8Amaado afo, wọt ayịnufọk mfo mfọn, sia afo amedʌk edioomo ye anye ke iso Abọọñ. Adieke adooho ami mmedue, ñwot miin ke idem mfo! Ntak a-afo añyaaha miin anọọ ete mfo-o?”9Yọnatan amaabo, “Tutu amama! Akpedo ami mmaanie ataa etək ifiọk mbaña ke ete mmi abiide aduwot fiin, nte ami ñkpudọkkọke fiin?”10Defid amaabịp Yọnatan ate, “Anie adindọkkọ miin adieke ete mfo ubọọrọke fiin uyad-uyad?”11Yọnatan amaabo Defid, “Di! Yak ñnyịn isaña keed ika inwañ.” Ndin ammọ emaesaña ntoro ekaa inwañ.12Ndin Yọnatan amaabo Defid, “Ami mmenwọñọ ke anyịñ Abọọñ Abasi Isrel, mbo ke akpanikọ ke ami ñyaatañ esịd ete mmi unọ fiin idaha ntom edem ñkpọñ! Adieke anye adiifọn ye afo, ado nte ami ndiinọọhọ etob ñnyʌñ nnam afo adiọọñọ?13Ado adieke ete mmi ayemme adunam fiin ibak, yak Abọọñ amia Yọnatan ufen, ekamba, adieke ami mmennamma yak afo adiọọñọ ñnyʌñ nnam yak afo anyọñ ke emem. Yak Abọọñ aba ye afo kpa naña anye aba ye ete mmi.14Ado ñwọt miin mfọnido nte mfọnido ake Abọọñ adaña ini nte ami mbaaha ke uwem, mbaak ediñwot miin,15kuunyʌñ utre mfọnido mfo ye ekpək mmi, akpọkọm idaha Abọọñ amaakpịkke afịd mme asua Defid isio ke iso isọñ.”16Ke ntoro, Yọnatan amaanam edioomo ye ufọk Defid, abo, “Yak Abọọñ asio usiene ye mme asua Defid.”17Ñko Yọnatan amaanam Defid amaana asọọñọ unwọñọ amọ ke ima anọ anye, sia adooho anye amaama anye nte naña anye akema idem amọ.18Ndin Yọnatan amaabo Defid, “Ñkpọñ ado usọrọ Ufa Afiọñ. Eyauyem fiin, sia ñkpọitie mfo adiina ukpọk.19Edem ñkpọñ, ke idaha ndubiayio, kaa itie a-afo akedịbeke ke ini mfịna ami aketọọñọke, nyʌñ kaa kebet ke itie itiad Esel.20Ami ñyaatop idañ ita ke mben amọ nte ntop ñkpọ se ñkịt.21Ndin ami ñyaadọñ etəkayịn awodeen mbo, ‘Kaa keyem mme idañ ado.’ Adieke mbooho anye, ‘Se ke idañ ado aba ke mbeñ ubọk mfo umi,’ ndin di, sia adooho adaña ini nte Abọọñ aduuho uwem afo amebọkkọ, ikọ inyʌññọ iba.22Ado adieke mbooho akparawa ado ‘Se ke idañ ado uboiyo fiin,’ ana afo aka sia adooho Abọọñ ubịne fiin asio.23Ndin ke abaña ñkpọ se ami ye afo ikineme, toiyo ke Abọọñ ado ntiense ñnyịn ke nsi-nsi.”24Ke ntoro Defid amaadịbe ke inwañ, ndin ke ini usọrọ Ufa Afiọñ amaakedi, adidem amaasuuk atie adidia ñkpọ.25Adidem amaatie ke itie a-anye asitieghe ke mben ndibene a-asakkaiso ase Yọnatan, ndin Abna amaatie adiana Sọọl, ado itie Defid akena ukpọk.26Sọọl ikitañña ikọ nte keed usen ado, sia anye akekere ke anie se itịppe inọ Defid a-anamma yak anye imiisanake, ke akpanikọ, ana ado anye isanake.27Ado edem usen ado, ayọhọ usen iba ke afiọñ, itie Defid akesʌk ana ukpọk. Ndin Sọọl amaabo Yọnatan ayịn amọ, “Nsoo inam yak ayịn Yesi imiidieghe usọrọ, mfịn me ñkpọñ a-akeboiyoke?”28Yọnatan amaabọọrọ Sọọl, “Defid amaanekke ambeeñe miin abo yak imọ ika Betlehem.29Anye amaabo, ‘Yak ami ñka, sia adooho ekpək ñnyịn eyem inam uwa ke abio ñko ayịneka mmi awodeen abo ke ana ami mba do. Adieke ami ñkịtte mfọn ke iso mfo, yak ami ñka ñkekịt nditọeka mmi ideen.’ Ntak ado anam anye idiighe ididia ñkpọ ke akpokoro adidem.”30Sọọl amaabịmme iyadesịd ye Yọnatan ndin anye amaabo anye, “Afo ayịn ukwañ ye atreutọñ awonwaan ami! Ado nte ami ndiọọñọke ke afo ada ye ayịn Yesi adat ndọk asọk idem mfo ye eka a-akumanna fiin?31Adaña nte ayịn Yesi aduuho ke ederimbod, afo me abioubọọñ mfo idiisọọñọke ida. Idahami dọñ awo yak aben anye ansọk miin, sia ana anye akpa!”32Yọnatan amaabịp Sọọl, ete amọ, abo, “Nsoo ido ntak afo ayemme adiwot anye? Nsoo ke anye anam?”33Ado Sọọl amaatop eduad amọ ayem adiwot anye. Do ke Yọnatan adiọọñọ ke ete imọ ayem adiwot Defid.34Yọnatan amaadakka akpọñ akpokoro ado ke akpọsọñ ifiobesịd; ke usen usọrọ ado ayọhọ iba anye ikidiaha ñkpọ, sia anye amaafʌhọ abaña naña ete amọ akenam ñkpọ ndọk-ndọk ye Defid.35Ke ubakusen, Yọnatan amaawuọ akaa inwañ adikisoobo ye Defid. Anye amaaben etəkayịn awodeen asaña keed,36ndin anye amaabo etəkayịn awodeen ado, “Feghe kaa keyem mme idañ ake ami antoppo do.” Naña ayịn ado afeghe aka, anye amaatop idañ abọhọ anye.37Ke ini ayịn ado akesịmme itie idañ Yọnatan akeduọhọ, Yọnatan amaada akoot anye, “Nte idañ ado inaaha ke iso mfo?”38Ndin Yọnatan amaabọñ “Sọsọp! Sọp kaa! Kuutre!” Ayịn awodeen ado amaaben idañ atịmme abịne eteufọk amọ.39(Ayịn awodeen ado ikidiọọñọke ñkpọ ndomokeed ibaña afịd ami; Yọnatan ye Defid ikpọọñ ekediọọñọ.)40Ndin Yọnatan amaanọ ayịn ado mme ñkpọ ekọñ amọ anyʌñ abo, “Ben ammọ tịmme nyọñ abio.”41Ke ayịn ado amaakenyọñ, Defid amaadakka ada ke usuuk-usuuk edem itiad anyʌñ anuuk iwuod anọ Yọnatan akañ ita, iso amọ ase isọñ. Ndin ammọ emaetʌm emọ-emọ inua enyʌñ etua, ado Defid aketua akan.42Yọnatan amaabo Defid, “Kaa ke emem, sia adooho ñnyịn awo iba iminwọñọ adido ufan ke anyịñ Abọọñ, ibo, ‘Abọọñ ado ntiense ke ufọọd mmi ye afo, ñko ke ufọọd emana mmi ye emana mfo ke nsi-nsi.’ ” Ndin Defid amaakpọñ, ñko Yọnatan atịmme anyọñ abio .Biblica, Inc.