Akpa Ñwed Pita4
Adidu Uwem Nnọọ Abasi
1Sia Krais akebọọhọ ufen ke abʌkidem, ndufo ñko idat ukem akikere ami isịne nte ñkpọekọñ, sia awo abọọhọ ufen ke abʌkidem inieghe ewuana aba ye idiọọkñkpọ.2Ke ntoro, ammọ idatta ini a-asʌhọke anọ ammọ idu uwem ke idiọọkitọñ abʌkidem, ado edu uwem asañake akekem ye uduak Abasi.3Sia ndufo emaebiat uwak ini ke mme usen edem enam se mbon i-imiidiọọñọke Abasi enam, adidu atịme-atịme uwem, idiọọkitọñ abʌkidem, ukpa mmịn, ukpono ndem ye adinam abʌd-abʌd ido.4Ndin idem akpa ammọ sia ndufo imiikeneke ammọ idu atịme uwem ye uwem afai, ndin ammọ isueñ ndufo.5Ado ammọ eyaenọ Abasi a-abeeñeke idem adikpe ikpe mme aduuwem ye mme akpañkpa ibọọrọ.6Sia ntak ado ke ekekwọrọ eti etob enọ mbon a-adooho ekpañña idahami, nọ ato do ediikpe ikpe ammọ nte mbon ekebaaha ke abʌkidem, ado ammọ edu uwem ekeene Abasi ke sịbidịd.7Ado, utịd afịd ñkpọ asʌk akpere. Ke ntoro ndufo inie eti iwuod, inyʌñ ifat idem, nọ ekan ebọñ akam.8Ke akanna ado, inie ataa ima inọ keed ye aken, sia ima afọfʌk uwak idiọọkñkpọ.9Idaara emọ-emọ ke ufọk ndufo, ikiidukuunọ.10Yak awo keedekeed adat enọ a-anye abọọhọ anam ñkpọ anọ emọ-emọ nte mme anam utom Abasi ke afịd akpanikọ, ye nte mbon e-ebọọhọ nsio-nsio mfọn Abasi.11Adieke awo ndomokeed a-atañña ikọ, yak anye anam ntoro nte anye a-atañña ataa ikọ Abasi. Adieke awo ndomokeed anamma ñkpọ anọ emọ-emọ awo, yak anye anam ntoro ato adudu A-Abasi anọọhọ, nọ ato do ke afịd ñkpọ Abasi abọ itooro ato Yisọs Krais. Ubọọñ ye adudu enie anye ke nsi-nsi nsi-nsi, Amen.Ufen A-asañake ye Adido Awo Krais
12Ndima mme ufan, ikiiyak idem ikpa ndufo ke ikañ-ikañ ufen i-isịmme ndufo, nte ebo ke asen ñkpọ atịppe inọọ ndufo.13Ado idaara ke naña ndufo ekeene ewuana ke ndutʌhọ Krais, nọ idaara ndufo adiinekke ikpon ke emaeyaara ubọọñ amọ.14Adieke mme awo isọññọ ndufo anyen ke ntak anyịñ Krais, afọfọn inọ ndufo, sia Sịbidịd ubọọñ ye Sịbidịd Abasi i-idoro ndufo ke idem.15Adieke ndufo ebọọhọ ndutʌhọ, yak ke ado nte awodawo, me nte inọ, me nte idiọọk awo, me nte andisịn anyen ke ndubeghe awo mfen.16Ado, adieke ndufo ekịtte ndutʌhọ nte mme andikeene Krais, ikiikop abuud, ado itooro Abasi ke ndufo emekere anyịñ ado.17Sia ini a-akem i-ikpe adiitọọñọ ye ubon Abasi; ndin adieke atọọñọke ye ñnyịn, adiiba die ye mbon i-imiinamma eti etob Abasi?18Ndin,“Adieke asọññọ adinyaaña ndinen awo,adiiba die ye mbon i-imiidiọọñọke Abasi ye mme anam idiọọkñkpọ.”19Ke ntoro, mbon e-ekịtte ndutʌhọ akeene naña uduak Abasi ado akpena eyaak uwem ammọ esịn ke ubọk Andibod ammọ, a-adooho anam akpanikọ, ndin ekaiso enam nti ñkpọ.Biblica, Inc.