ABIRANIYAWA3
1Nkayomu, yayuwa na nsubiya Yesu, de Mirikisi sukwa ku! ku turunwa Yesu, de ma Yamanki Mirikisi, nja tolense pirisi ni beigaskye de mua sheeda e yi.2Yesu yi aminshi nja nsude sakye yi, yiri de Musa ma nsu aminshi a siki ankiyi a gizi Mirikisi.3Sede girima ni Yesu pi ni Musa, yiride nsu gini gizi pi gizi nkiya yi girima.4Sobon kowoni gizi e mani nsude gina yi, sede nsude gina guru mbo ma Mirikisi.5Musa ma bunwa kyakyawu nsu aminshi a siki ankiyi a gizi Mirikisi, e sheeda mbode Mirikisi nkye yaa paru a geba;6Sede Kiristi e ma Yaa nsu aminshi a gizi Mirikisi. Omu la muma gizi yi, nde mu mani ja sori guyam nja sadishiya ni dege dolo.7Akayomu, yiride Aworo nsuseki pala:<<Yawu nde ki zi murinya Mirikisi,8kede ku yi rishi zi,yiride nsu adaatolo ku su yi rishi zi nja Mirikisi,woto a kwanki de su gwade yi a siki denka,9Mirikisi nkye, anya de nsu adaku gwada nishekera aribeni su geni mbode ni yi.10E shiya sa ni yi anwashi nja ntani Ni nkye,<Kowon kwanki su ma Ki ni a dishiya su,su ki su biya turiki na.>11Se a siki anwashi Ni yi anikowori nkye:<Sua taba yuru a kesa de Ni yi su anikowori ba.> >>12Yayuwa na, ku yi ankeli kede nseda ku e mani mungu dishiya ni rishi yeda de sa ku juyi bila Mirikisi nsu leyi.13Sede ku ja nkiyaku sori guyam kowon nana, sobon kede nseda ku e man nsu tori kiya te anya shirigye ni lepi.14Muma nsu zunwa nja Kiristi na nde mu sakisi nsori ari karishe a kiya yeda de mu yi dege pari.15Da mu nama mbode beta Mirikisi pala:<<Nde ku zi murinya Mirikisi yawu,kede ku yi tori kiyayiride ku yi rishi zi.>>16Nsu waa zi beta Mirikisi de su ki zi? Osu na ma worede Musa butu su a kesa Masa bo?17nja nsu waa Mirikisi yi anwashi nsu shekera aribeni? Nja worede su yi lepi, de su puari muntu a siki denka?18Nsu waa Mirikisi melese nkye, <<Sua yuru a siki pushe yi ba, ba worede su yi lesa zi na bo?19Se mu geni su yuru ba, sobon rishi beigaskye.
The Word for the World International