ABIRANIYAWA2
1E shiya sa e ma dole na mu sakisi nkyawu, a kiya gaskye de mu zi, sobon kede mu bila turiki.2Sobon manki de meleku ba nsu adaatolo mu e ma gaskye, se guru nsude ki zi yi, ko e ki yeda nshi yaa keleba poro.3Yaya na mua butu nde mu ki kula ni totolo sila mu? Mirikisi nkiyeyi la pala sila mu npari, worede su zi yi npari su tabata mu nshi.4A kwanki ni jaja Mirikisi ja sheeda e yi te anya alama, ni anki mamanki ni mbo yiri yiri, nja laba kyawuta ni Aworo mbombom ni nupi yi.5Mirikisi taba sa meleku yi de su yi solota durinya nsu zo ba, nsude mua yi beta a kiya yi.6Sede nseda taba sheeda anya daa a siki beta Mirikisi nkye,<<Waa ma nsebeki, Mirikisi, de ka da mu nshi;ko Yaa nsebeki de ka kula nshi?7Ki sa yi a kwanki piri pi meleku;ki domuna e yi lende ni dereja nja girima,8Mirikisi sa yi ma nsu solota a kiya guru mbo.>>Beta Mirikisi pala nkye, Miriksi sa su ma seleki a kiya guru mbo>>; Da mu ma nzun mbo guru. Sede a kuzukam, mu geni nsebeki mayi solota a kiya mbo guru ba.9Sede mu geni Yesu, de a kwanki piri Mirikisi sa meleku pi yi. Kuzukam su yi lende ni dereja nja girima sobon Genbeki ari e muntu, sobon te anya aniyeri Mirikisi e muntu sobon konwawa.10Sobon yomu e ma kyakya na Mirikisi, de yi guru mbo paru sobon nshi, te anya e yi la sua samu guru mbo, Yesu e shiya ma pari ni sa sila su ma kyakya te anya Genbeki.11Sobon nsude sa ntani ma nsuseki nja worede su sa su ma nsuseki guru su ma daa. Sobon yomu Yesu yaa zi kumnya ni sukwa su yayuwa e yi ba.12E pala gye Mirikisi nkye,<<Na gye ntani na mbode ki yi;Na yobo ke a siki tala su.>>13Ari kuzukam nkye,<<Na sadishiya nja Mirikisi.>>E kwa pala nkye,<<E ni naka anya mu, nja yaya de Mirikisi ba ni.>>14Tunde yaya mu su ma ntani nsu nama nja zini, e shi ma du e ma kankye nsebeki. Sobon te anya muntu e yi e juru sori ni muntu, wato obiri, de man sori a kiya muntu,15de kunshe worede su ma bunwa muntu tunde su yapu su sobon womba.16Sobon meleku na Yesu sua su nto ba, sede juriya ni Abireyi.17Sobon yomu, e yi kyawu de e ma kankye yayuwa yi a kowon turiki, de e ma pirisi nsu toseyi nja aminshi a siki anki Mirikisi, de e munka sedeka de yaa la lepi ntani.18Sobon e shi nkiyeyi Genbeki a kwanki de su gwada yi, yomu la yaa sua worede sua gwada su nto.
The Word for the World International