2Korentiyawa6
1Tunde mu ma nsu yi anki Mirikisi na mua ologba ku kede ku keleba aniyeri ni Mirikisi a wopi ba.2Ema rubuta a siki takada Mirikisi nkye,<<A kwanki ni aniyeri. Ni zi ku,a nana sila nku ni sua ku nto.>>Mma gye ku, kuzukam na e ma kwanki aniyeri Mirikisi, kuzukam na e ma nana sila!3Kede mu ma delili mbo de yaa sa nse da e titimi ba, sobon kede mu lesa samu nani wuta ANKI mu ba.4A kiya yomu, guru mbo de mua yi mu nana ntani mu ma nsu yi ANKI Mirikisi a siki turiki gaskye: ni kadishiya; ni ngala; ni wuya nja Genbeki;5su dukwa mu, su samu a siki jaru nja dege ankeli; mu yi ANKI wuya, ba kwana ndederi nja nyunwa;6a siki zunwa sere, a siki shina de mu man shi, nja kadishiya nja kiriki; a siki Aworo Mirikisi mu nana nkye mu ma nsu ANKI Mirikisi la a siki so nja gaskye;7a siki beta ni gaskye nja sori ni Mirikisi; nja keyi yanki ni gangasi a nani dama nja ni guni;8a siki girima nja rishi beyi girima, sua ba mu takaasi nja yobo mu; sua yi beta ni bebeta mu seni; su la mu ma nsu yaruwa; ari kuzukam mua pala gaskye;9su shina mu sere, sede sua yi kankye su shina mu ba; mu ma kankye a baki muntu, ari kuzukam mu man leyi, su dukwa mu sede su kisa mu ba;10A siki Genbeki, mua yi peri siki; kode nkye mu ma potoruwa ari kuzum mu ma nsu mbo nani na nyowa, mu mani mbo da ba, sede ari kuzum mu mani mbo guru.11Oku ntani korentiyawa, mu boyi ku mbo da ba, mu bure dishiya amu ba ku.12Omu la mu ki ku ba, sede oku la ku yeda mu ba.13Mma yi ku beta kankye Adaa nja yaya e yi la, oku du ku bure dishiya aku.14Kede ku gama kiya nja worede de sua ki Yesu. Mina gama gangasi nja mungu? Ko mina gama asikye nja dopuwa?15Mina ma a sisika Kiristi nja obiri? Mina yada nsubiya Yesu nja worede de suabiya Yesu ba?16Mina gama laki lepa Mirikisi nja kunguni boka? Omu muma kankye laki lepa Mirikisi nsu leyi na. Yiri de Mirikisi pala nkye: <<Na zunwa nja su nja Na yi tepiya a siki asu, nja Na ma Mirikisi asu, nja osu sua ma ntani na.>>17<<Nkayomu Mirikisi pala nkye, ku butu a siki asuku laba kiya aku,Nzi Obagizi.Kede ku kpa mbo de e man dola ba,Yomu na E ni na keleba ku.>>18Na ma Adaa aku,Oku kwa ma yaya na menza nja mata,Nzi Obagizi nsu yiko.>>
The Word for the World International