2Korentiyawa5
1Kuzukam mu shina nkye gizi amu ni durinya mu e ma kankye rugwa de yaa bebeta la, Mirikisi yaa ba mu nki daa sabuwa dege bisi de yaa bebeta ba, ba nani nsebeki na gina yi ba.2Kode mua yi beki siki a dishiya amu, mua yi memeri de mu bila nkimu de mu sa nki ni bisi.3sobon nde mu sa keikei, mua taba ma totombolo gagaba.4Sobon de mu ma a siki nki de ma kankye rugwa durinya mu, mu yi beki siki nja Genbeki, sobon mua yi memeri de ma totombolo ba sede mu sa keikei ni bisi, sobon mbode ma ni nki nsu leyi yaa sha kiya ni muntu.5Kuzukam Mirikisi la yi mu sobon ni delili ni sabuwa leyi mu nja de e ba mu Aworo de e nana mu mbode yaa yi mu nshi a geba.6Nkayomu kowon kwanki mu mani sori dishiya, kode mu shina nkye nde mu ma a siki nki nsum yaa laba mu nja Obagizi.7Sobon yomu mua yi zunwa beigaskye la ba ni geni ndani ba.8Mu mani sori dishiya, nja mu yeda de mu bila nki mu, de mu te zunwa nja Obagizi a bisi.9So amu na de mu yi mbo de yaa jima Mirikisi, ko mu ma a siki durinya mu nja shi ko mu ma nja shi a bisi.10Sobon ema dole la konwawa yaa sakisi a geba kingbolo shiriya Kiristi de yii shiriya. Konse yaa keleba nani wuta ni mbo de e yi a siki nki e yi ko kyakyawu la ko mumungu.11Tunde mu shina womba Obagizi a dishiya amu nja mua yi kokori de mu lelebe ntani de su beigaskye te nja Mirikisi. Mbode mua yi Mirikisi shina nja yomuna oku ma du e ma a dishiya ku.12Mua yi kokori de mu yobo kiya amu naba, sede mma ba ku delili de ku dukwa geba nja mu, sobon ku samu manki de kwa gye worede sua dege kiya momoko dishiya daa a geba Mirikisi.13Nde e ma kankye mua yi somiya na, e ma sobon Mirikisi la. nde mu ma a siki ankeli amu, e ma nani wuta ku la.14Guru mbo de mma yi, e ma sobon so ni Kiristi na yaa biya mu. Tunde mu beigaskye nkye Kiristi muntu sobon konwawa, sobon yomu e ma kankye guru amu mu muntu nja shi.15E muntu sobon konwawa nde worede su keleba sabuwa la yi sua yi zunwa ni geni dama gagaba. Sede, sua yi zunwa de Kiristi yaa so, Yesu de muntu sobon oku e kwa dege.16Dege kuzukam ta geba mua taba kone nseda te anya shina nsebeki ba, kode mu taba kone Kiristi a siki yiri tunani nsebeki, mua saki kone yi yomu kuma gagaba.17Nkayomu guru nsude ma a siki Kiristi, e ma sabuwa yapu la; mbo wuri guru e bila, mbo guru e ma sabuwa!18Guru mbo mu e ma dege anya Mirikisi na, de shiriya mu nja kiya e yi te anya Kiristi nja ba mu ANKI ni shiriya ntani nja Mirikisi:19Manki amu e shiya ma Mirikisi ma shiriya nsebeki nja kiya yi a siki Kiristi, yaa kiriga lepi ni ntani a kiya asu ba. Mirikisi ba mu ANKI ni shiriya ntani nja shi.20Nkayomu mu ma ndani ntani la anya Kiristi, Mirikisi yaa bila ntani anya amu. Mirikisi yaa ologba ku amomoko Kiristi: Ku shiriya nja Mirikisi.21Yesu taba yi lepi ba sede Mirikisi sayi de ma nsu lepi. Sobon anya e yi la mua samu gangasi ni Mirikisi.
The Word for the World International