1 KORINTIYAWA8
1Kuzukam Bulusu yi beta a kiya mbosi de su ba boka sedeka: Mu shina nkye guru amu muma nsu shina. Shina zo ni dege kiya, sede so yaa gina.2Guru nsude geni nkye e shina mbodaa, ari kuzukam e tuku shina mbode e kamata shina woba.3Sede nsude ma so Mirikisi Mirikisi shina yi.4Beta A kiya mbosi de su ba boka sedeka: Mu shina nkye boka ma mbodaa na a durinya mu ba, sobon mu mani Mirikisi daa kin na.5Ko de nkye muma ni boka nyowa, ko a bisi ko a durinya mu mani <<boka>> nja <<obagizi>> nyowa,6nzun yomu mu mani Mirikisi daa kin na, de ma Adaa, nsude mbo guru e shiya ba mu la yi; yomu na mu mani Obagizi daa e shiya ma Yesu Kiristi, e shi de mbo guru butu anya yi nja sobon e shi mu mani la yi.7Sede ba konse na shina yomu ba. Ari kuzukam worosu su ntani de su saba bowuta boka su nkye ko su suku mbode su yanka ba boka e mani boka na, tunde su mani tunani nsu sori ba a kiya mbosi ni, e sa su ma nsu ribi.8Sede mu shina nkye mbosi yaa ja mu mala Mirikisi ba; ko mu si mbosi ba yaa rigye mu mbodaa ba, ko mu si yaa ja mu mbodaa ba.9Sede ku yi ankeli, sobon, kede yenshi de ku samu ema turiki ni sa worede su mani sori a beigaskye ba na su puari.10Sobon worede dishiya asu yi sori ba su geni ku, oku de ku shina kwa suku nama a laki boka, yaa sa worede su mani sori dishiya ba de su suku mbode su munka ba boka bo?11Sobon shina ke mu yaama puari ba yayuwa worede Kiristi muntu sobon su.12Nde ku yi nsu yayuwa ku lepi a turiki mu de ki sa su ma mere sori a tunani, ku yi Kiristi lepi naka.13Nkayomu, nde mbode ni suku yaa sa yayiwa na puari a siki lepi, Na suku nama gagaba, sobon kede Ni sayi de e puari.
The Word for the World International