1 KORINTIYAWA7

1Kuzukam a kiya mbode ku rubuta ni nshi: E yi kyawu de nsebeki zunwa ba amere.2Sede sobon gudu nungwe berikete, kowon nse minzi e mani mata e yi, nja kowoni mase e man minzi e yi.3Nseminji e sika anki amere ba mata e yi, yomuna, kuma mase e sika anki amere ba Minji e yi.4Mase e mani yiko a kiya nki e yi ba sede minji e yi. yomuna, nseminji e mani yiko a kiya nki e yi ba sede mata e yi.5Kede nseda aku e nana nseda nki e yi ba, sede nde ku yeda ni worosu su kwanki, sobon de ku bayi kiya aku de kwa yi lepa. se ku kuma gomu kede mungu nse e gwada ku sobon rishi ka kiya ku.6Na ba ku shewura na ba doka aba.7Ni so konse e ma kankye E ni. Sede konse mani kyawuta e yi de Mirikisi bayi; nseda mani yiri kyawuta nsu mu, nseda mani yiri kyawuta nsuni.8kuzukam Na yi nja worede su yi amere ba sede nja worede su ma mata makeyi: Yaa mani kyawu de su zunwa ba amere, yiride Ni ma.9Sede nde sua yi yaa ka nkiasu ba, su yi amere, sobon yaa pi su kyawu de su yi amere nja de kede memeri nungwe e sha kiya e yi.
10Oku nsu amere Na ba ku doka mu, Ba E ni na ba, Obagizi na yaa ba ku doka mu nkye: Mase yaa taba bila Minzi e yi ba.11Sede nde mase te butu bila minzi e yi, kede e yi amere ba sede e shiriya nja minzi e yi. Nseminji ma du yaa shika mata e yi ba.
12Worosu su ku Na pala, <E ni, nkiya na, ba Obagizi na ba>: Nde yayiwa nsubiya Yesu daa mani mase de ma nsubiya Yesu ba se mase ni yeda de e ma nja shi, kede e bila yi ba.13Nde mase de mani minji de ma nsubiya Yesu ba se e yeda de ma nja shi, kede e bila yi ba.14Sobon Minji de ma mere beigaskye ba yaa sa mata yi e man nsuseki, se mase de minji e yi mani beigasikya ba yaa sa minji e yi man nsuseki. Nde e ma yomuna ba yaya ku sua ma nsuseki ba, sede sobon yomu sua ma nsuseki.
15Sede nsude beigaskye ba yaa bila de te mayi, se e te mayi. Nseminji ko mase nsubiya Yesu e ma dole a kiya su ba a kowon turiki; sobon Mirikisi sukwa mu de mu yi zunwa selema la.16Yaya na ki shina e ke mase ko eke na ka sila minji ake? ko, yaya na ki shina, e ke nseminji ko e ke na ka sila mata ake?
17Sede kowon nse e yi mbode Obagizi gye yi, de Mirikisi sukwa yi a kiya yi. Da mu nama doka de Ni kapa ba guru nsubiya Yesu.18Guru nsude Mirikisi sukwa yi, de e rigye yi yanka de e keleba Yesu kede e sakye ologba de su yi yanka, nsude kwa keleba Yesu de su yanka ba, kede nkye su yi yanka gagaba.19Yanka, ko mere yanka e ma mbodaa ba, sede biya doka Mirikisi e shina e ma kyakyawu.20Kowon nse e ma yiri de e ma kapi de Mirikisi sukwa yi.21Nde ki ma bunwa na kapi de Mirikisi sukwa ke, kede e dama ke ba. Nde ki samu yenshi, ki yi anpani ni yenshi ni.22Sede guru nsude ma bunwa, de su sukwa yi te anya Obagizi, e ma bunwa na gagaba, e mani Obagizi la. Yomu na nsude a beyi e mani yenshi, e ma bunwa ni Kiristi.23Mirikisi see ku de sa Yesu muntu a kiya gidiri, kede kuma bunwa ni ntani ba.24Sobon yomu, yayuwa, guru yiri ali de ki ma a siki e yi kapi de Mirikisi e sukwa ke, se ki ma yomu yiri ali de ki ma de Mirikisi sukwa ke.25Kuzukam a kiya mata de su puari yaaminji ba: Obagizi ba ni doka a kiya su ba, sede ni beyi showura kankye nsu de samu yeda Obagizi .26Sobon Ni geni yaman kyawu de nsebeki e ma mayi yomu sobon kwanki mu e ma kwanki ni wuya na.27Nde ki yi amere kede ki shika mata ke ba, nde ki yi amere ba, kede ki yi amere ba, zunwa ma ke kede ki yi amere gagaba.28Sede nde ki yi amere ki yi lepi ba, nde yaa mase de shina minzi ba yi amere, e kwa ma lepi na ba. sede worede su yi amere a kwanki mu sua sha Genbeki, sobon yomu mma so tele a kiya yomu.
29Yayuwa mbode Ni yi nupi e shiya ma, kwanki de Mirikisi sa e rigye piri de eya. Dege kuzukam worede su yi amere su ma kankye su yi amere ba.30Worede sua yi beki siki; su ma kankye sua yi beki siki ba, worede sua yi peri siki su ma kankye sua yi peri siki ba; worede su se keikei e ma kankye su se mbodaa ba.31Worede sua yi anpani ni keikei durinya, kede su sa dishiya nja shi, sobon durinya mu yiride e ma kuzukam yaa bise.32Mma so de ku samu yenshi kede mbodaa e dama ku ba, nsude yi amere ba memeriyi e sha de e yi mbode jima Obagizi soseyi, yiride yaa sa Obagizi yi peri siki.33Sede nseminji de yi amere yaa da mu ni mbo durinya mu, yiride yaa kula ni mata yi.34Sobon nseminji ankeli e yi laba bi. Mase de yi amere ba ko yaa mase de puari nseminji ba damuwa e yi ma de e jima Obagizi la: Yiride yaama seki a siki nki nja aworo. Sede mase nsu amere damuwa e yi ma durinya, nja de yi mbode yaa jima minzi e yi de zi dadi.35Ni pala yomuna de zunwa ku e yi kyawu, ba sobon de Ni masa ku ba, sede kede ankili ku e laba bila bawuta Mirikisi ba.36Nde nsude yi anikowori ni yi amere nja nsude deta amere, de yaa yi mbo de e yi kyawu ba, nde e geni ema dole la de yi se e yi amere nja shi. E ma lepi naba de su yi amere.37Sede nseminji de yi tunani beta amere a dishiya yi, ema dole na ba de yi amere sede nde yaa yi yaa ka nki yi de nkye yaa yi amere ba. Da mu ema kyakya na.38Sobon yomu nsude amere yaa mase de puari nseminji ba, e yi kyakya. E shi de amere yi ba e pi kyakya.39Mase yaa bila minzi yi ba nde e mani leyi, sede nde minzi yi muntu, yaa te yi amere nsude yaa so, sede e ma nsubiya Obagizi.40Sede showura na Bulusu e shina ma, mase yaa pi yi peri siki nde e ma mayi yomu. Anya na Ni mani Aworo Mirikisi.

The Word for the World International

https://app.library.bible/content/14c608286b5b94d2