Angaramɔ (Genèse)4
Kain gbɛa Abel
1Adam dungɔ hinɛ ko pɛa Ɛvɛ, nɛ wɛnɛ baa zang. A bhɛa Kain. Ɛve tɔa: «Mi bhɛa ma bewei ka Wankpoo haa mi.»2Hapata, a bhɛa Abel, bebe ya mɛ Kain.Abel dungɔ nɛ̂ zaoro sami, nɛ Kain nɛ̂ wan-gɔmfɔ.3Hapata ma ngimɔ, Kain kuo hio wayamɔ mɔ fɔ pɛa tuka haa-mɔkɔ̂ ha Wankpoo.4Abel fin kuo hio bosi besari pɛa ka dung nɛ nɔ pentɛ tɛ̂ nɛ̂ ha Wankpoo. A zɔka Abel nɛ hio sari pɛa nɛ totɛ,5maa, Sɔ tɛ̂ zɔk haa-mɔkɔ̂ Kain nɛ dedea na. Kain dea ngambi, nɛ wɛnɛ kaya Sɔngsi wa nɛ ngɔtɛ.6Wankpoo tɔa ha Kain: «Ha wen ge mɛ dea ngambi, nɛ mɛ kaya Sɔngsi mɛng nde?7Ka mɛ de mɔ nɛ dedea, mɛ begu zu mɛ nɛ ngɔn, maa, ka mɛ de mɔ nɛ dedea na, sɛmbɔ be ɔnu ha nûtwa pɛ mɛ, nɛ wɛnɛ nɛ hɛl mɔ buy baa mɛ. Pɛ mɛ, lɛma nde, mɛ pen zu wa.»8Mɛgi, Kain tɔa wen ha ya wa Abel nde: «Ɔ gbo nɛ̂ ha fɔ.» Nɛ ha ngimɔ ka mbwa ha hɔa ha zang fɔ, Kain buyo tek ha zu ya wa Abel, nɛ a gbɛa wɛnɛ.9Wankpoo tɔa ha Kain: «Ya mɛ Abel ha ndo?» A kiforo wen: «Mi ing na. Yo nɛ̂ mi ha pam ya mi nde?»10Mɛgi, Sɔ tɔa: «Mɛ dea mɔ mɛgi, hazu ge? Gɛl tɔktɛ ya mɛ ha gdɔra ha nu gbo ha pɔm mɔ ani kundokomɔ.»11Sising, mɛ bekpa fomi, nɛ mɛ bedung nɛ nyɛa nɛ nu ka bha nû mɔ kpaa ha kɔ̂ mɛ tɔktɛ ya mɛ ka mɛ gbɛa.12Ka mɛ ha gɔma nu mɔ fɔ, mɔ gun mɔ ha yo, hio wi mɔ ndɔng lɛm de tɛ nɛ dedea na. Mɛ lɛm dung nɛ twa zu mɛ na, nɛ mɛ benɛ nɔ nɛtum nɛtum ha zu nu.13Kain tɔa ha Wankpoo: «Kita ka ɛ gɔna ha zu mi, nɛ zioa pentɛ pen zu mi.14Mɛ yinɔ mi mɛsɛ nɛ nyɛa ha nu ɛngɛ. Lɛma nde mi awusitɛ mi nɛ nyɛa ha lî mɛ. Mi bedung nɛ̂ wan yal nɛ mbango nɛtum nɛtum ha zu nu, nɛ ka ma wi kpaa mi, wɛnɛ begbɛ mi.»15Wankpoo tɔa ha wɛnɛ: «Way, ɛ lɛm gbɛ mɛ na. Ka ma wi gbɛa mɛ Kain, ɛ begbɛ hio wi mɔrkɔ zanga mbwa lɛm nɛ may hinɛ mɛ.»
Nɛ Wankpoo gdea ma dafu ha tɛ wa nde hio wi fɛt ka bekpa wɛnɛ, a gbɛ wɛnɛ na.16Hapata, Kain pena nɛ nyɛa ha lî Wankpoo, nɛ a pena nɛ̂ ha dea le ha pɛ Nod ha wal gutɛ-swe mɔ Ɛden.
Hio bezang pɛ Kain
17Kain dungɔ hinɛ ko pɛa, nɛ bhokoa baa zang, bhɛ nɛ bem bewei ka ling wa nɛ̂ Enok. A dea ma le, nɛ a gdea ling bem pɛa Enok ha zu lea.18Enok nɛ̂ bafa mɛ Irad, Irad bhɛa Mehuyael, Mehuyael bhɛa Metusael, nɛ Metusael bhɛa Lemek.19Lemek sio bhoko bwa ka ling ma ndang nɛ̂ Ada, nɛ bwa bhokoa nɛ̂ Sila.20Ada bhɛa Yabal. Yo nɛ̂ wɛnɛ ha dung nɛ̂ ngbabafa mɛ hio wanpam hio sari ka yal nɛ ngɔn.21Ling ya wa nɛ̂ Yubal. Yo nɛ̂ wɛnɛ ha dung nɛ̂ ngbabafa mɛ hio wan mɛl hio nzanga nɛ dɔm mbia.22Sila bhɛa pɛa nɛ̂ Tubal-Kain ka doy pɛa nɛ̂ hio toy nɛ gbɛ bolo, hinɛ mɔsoykile bolo. Ya mɛ Tubal-Kain mɔ bhoko dungɔ nɛ̂ Naama.23Lemek tɔa ha hio ko pɛa: «Ada hinɛ Sila, ɛnɛ ze mi! Hio ko pɛ Lemek, ɛnɛ lɛngi zala, ɛnɛ ze mi! Mi gbɛa ma wi, nɛ ɛ mɛla mi. Mi gbɛa ma bhobem ndang, nɛ ɛ gdea dalɛ ha tɛ mi.»24Kpasawen, ɛ begbɛ hio ma wi mɔrkɔ zanga bwa ha lî pɛ Kain ka wɛnɛ bade. Nɛ pɛ Lemek, ɛ gbɛ hio wi bhukɔa mɔrkɔ zubhuzebwa zanga mɔrkɔ gbala bwa.»25Adam dungɔ hinɛ ko pɛa fin, nɛ bhokoa baa zang. Ɛvɛ bhɛa nɛ bewei, nɛ ling bema nɛ Set. Hazu wɛnɛ tɔa: «Sɔ haa ma bem ha mi ha bhandi pɛ Abel ka Kain gbɛa.»26Set fin bhɛa bem pɛa mɔ bewei. Ling wa nɛ̂ Enos. Yo nɛ̂ ha ngimɔ ɛngi ka hio wi angara gɔa Sɔ, Wankpoo.The Seed Company