Angaramɔ (Genèse)32
1Mɔsa nɛ sutele sut, Laban guotɛ, fuki hio bebhoko pɛa banɛ hio bezang wa, a fana mbwa nɛ nduko ha le pɛa .2Ha ngimɔ ka Zakob ha pena pɛa, zɔk hio ma telenge pɛ Sɔ tɛa tɛ kpamay hinɛ wɛnɛ.3Ka wɛnɛ zɔka mbwa, a gdɔra: « Ɛngɛ nɛ guru pɛ Sɔ!» Nɛ wɛnɛ saa ling bhandi ɛngi nde Mahanaim .4Zakob tomsa hio ma wan-nɛtom ha ya wa Ezau ka ɔ ha zang bɛlɛ Edom, ha le mɔ Seir.5Zakob tɔa wen mɛngɛ ha hio wan-nɛtom ndɔng: «Ɛnɛ zɔk mɔ ka ɛnɛ benɛ tɔ ha Ezau: “Bebe ya mɛ Zakob tomsa ɔ mɔ tɔ ha mɛ nde: Mi gbinɔ le nɛ ɔ hinɛ Laban gbo sising.6Mi nɛ hio nday, hio toyfok, hio sami, banɛ hio mbori, mi nɛ hio bhoko nɛ wei wantom. Mi ngoy mɔ gbasi hio wi mɔ ndɔng ha mɛ tuka nde mɛ, wan pɔm ade ngɔtɛ tɛ mi.”»7Hio wan-nɛtom pea ha pɛtɛ Zakob. Nɛ tɔa ha wɛnɛ: «Ɔ nɛa nɛ kpa gasa ya mɛ Ezau. Wɛnɛ ha tɛa mɔ zɔk mɛ fin. Wɛnɛ nɛ hio wei gɔmay nar.»8Ka Zakob zea wen ɛngɛ, gasa ke baa wɛnɛ. A kapana soko hio wi ka dung hinɛ wɛnɛ ha zang zugili wi bwa, hio sami hinɛ hio mbori, hio nday hinɛ hio zambala.9Zakob takaramɔ nde: «Ka Ezau hɔa kpa bosi zugili wi, nɛ wɛnɛ ngbabhaka mbwa nɛ bulo, olo zugili wia lɛma yuomɔ kpasisi nɛ tɛ mbwa.»10Hapata Zakob gdea tɛ wa ha gɔamɔ: «Sɔ pɛ ngbabafa mi Abraham, Sɔ pɛ bafa mi Izaak, mɛ ka dung nɛ Wankpoo, mɛ tɔa ha mi nde: “Mɛ nduki ha le pɛ mɛ, hapɛtɛ hio nam pɛ mɛ, nɛ mi bede dedemɔ ha mɛ.”11Swe fɛt mɛ ha osi ngoy pɛ mɛ ha mi, mi ka dung nɛ wantom pɛ mɛ. Mi lɛm nɛ hio wi mɔ ka mɛ de ha mi na. Ha ngimɔ ka mi baku se li Zurdain, mi badung ka nɛ tongolo pɔm ha kɔ. Maa sising, mi pea nɛ zuguru ndɔng bwa.12Mi gɔ mɛ nde mɛ akpasisi mi ha kɔ ya mi Ezau. Mi nɛ ke tɛ wa, hazu a betɛ gbɛ mi, mi, hio ko mi banɛ hio bem pɔm.13Mɛ, mɛ tɔa ha mi nde: “Mi ngoya de dedemɔ nɛ mɛ. Hio bem pɛ mɛ banɛ hio bem zang hio bemɛ be yɛbhi tuka gbala lembe nana litɔng. Ɛ lɛm tɔl mbwa na tuku ɛngɛ wi lɛm tɔl lembe na.”»14Ha zang ze ɛngi, Zakob bhɔna ha bhandi ki. Nɛ a kuo ha soko hio namdalɛ pɛa hio ma sari mɔ haa ya wa Ezau:15Wɛnɛ baa hio nanambu mbori gɔmmay bwa, bafa mbwa bhuzebwa, hio nana sami gɔmmay bwa, hio bafa sami bhuzebwa.16Hio nana zambala bhukɔa tar ka bhɔna haa libele ha hio bea, nana nday bhukɔa nar, bafambu nday bhukɔ, hio nana toyfok bhuzebwa banɛ hio bafa toyfok bhukɔ.17Wɛnɛ gdea hio zugili sari ndɔng ndang ndang ha kɔ hio wantom pɛa. A tɔa ha mbwa: «Ɛnɛ pen ha Sɔngsi mi, lɛma nde soko hio zugili sari ndang ndang anyɛn nɛ may.»18Hapata, Zakob haa nu ha bosi wantom ka dung Sɔngsi: «Ka ya mi Ezau be kpa may hinɛ mɛ, a be ani mɛ nde: “Mɛ nɛ pɛ o? Mɛ nɛ ha ndo? Zugili sari ɛngɛ nɛ pɛ o?”19Mɛ be kifiriwen mɛngɛ ha wɛnɛ: “Yo nɛ pɛ wantom pɛ mɛ Zakob. Yo nɛ mɔ ka wɛnɛ tomsa ha mɛ, ha mɛ wan pɔm Ezau. Nɛ wɛnɛ wantɛ ha tɛa hapata ɔ.”»20Zakob tɔa ndangitɛ wen ha zebwa wantom hapata wɛnɛ tɔa fin yo ha zetar wantom banɛ hio olo wi fɛt ka nɛnɔ ha gdong hio zugili sari ndɔng: Ka ɛnɛ kpaa may hinɛ Ezau, ɛnɛ tɔ ha wɛnɛ wen ndangte wen ɛngɛ.»21Nɛ ɛnɛ be tɔ ha wɛnɛ nde: «Wantom pɛ mɛ Zakob fin ha tɛa hapata ɔ.» Takaramɔ pɛ Zakob nde: «Ka wɛnɛ tomsa hio wi mɔ Sɔngsi ha Ezau, mi lɛma dea nde sila Ezau aga. Hapata mi lɛma tɛ̂ ha lî wa. Ɔ ing na mana wɛnɛ be baa mi ha pɛa nɛ dede kɔ.»22Mɛgi, hio zugili hio sari ndɔng pena pɛ mbwa Sɔngsi, nɛ Zakob bhɔna pɛa ha nu guru ha zɛa fɛt.23Zakob guotɛ nɛ zɛ ki, a kuo hio ko pɛa bwa fɛt, hio bhoko wantom pɛa bwa banɛ hio bem pɛa bhuko gbala ndang ku nɛ le Yabok ha bhandi ka hio wi ha kuo li ang nɛ nanga.24Mbwa kuoli nɛ hio wi mɔ pɛ mbwa fɛt.25Zakob bhɔna kanɛ ndang Sɔna ha olo. Nɛ ma wi tɛa bitumbɔ hinɛ wɛnɛ teee gboa mɔsa.26Kɔmbɛ pɛ Zakob zɔka nde ha tumbɔa, ɛ pen zu Zakob na. Mɛgi wɛnɛ mɛla Zakob ha guntini wa nɛ kɔmbiri Zakob nɛ dalɛ ha guntini.27Hapata, a tɔa ha Zakob: «Mɔ ha saa, mɛ gde mi apen.» Zakob kiforowen ha wɛnɛ nde: «Ka mɛ tɛ wol dedewen hazu mi na, mi lɛm gde mɛ pen na.»28Wi ɛngi ana wɛnɛ nde: «Ling mɛ nɛ o?» Nɛ Zakob kiforowen nde: «Ling mi nɛ Zakob.»29Wi ki tɔa fin nde: «Ɛ lɛm sa fin mɛ nde Zakob na, maa sising ɛ be saa mɛ nde Israel hazu mɛ bio tumbɔ hinɛ Sɔ banɛ hio wi, nɛ mɛ gana mbwa.»30Zakob ana wɛnɛ nde: «Mi baa nanga mɛ fɛt, osi ling mɛ ha mi.» Wi ɛngi kiforowen nde: «Hawen ge ka mɛ ngoya ing ling mi nde?» Hapata, wɛnɛ wola dede wen hazu Zakob.31Zakob tɔa: «Mi zɔka zangli Sɔ, nɛ mi bhɔna fin nɛ tunɔ!» Mɛgi Zakob saa ling bhandi ɛngi nde Penuel. Ɛngɛ ngoy mɔ tɔ nde «Zangli Sɔ».32Ka swe ha guotɛ, Zakob kuoli Penuel nɛ nanga ha bhandi ka hio wi kuli ang. A nɛnɔ nɛ sinkara hawenzu gasa dalɛ ka wɛnɛ kpaa ha guntini wa.33Gbo swe mɛsɛ hio wi mɔ Israel yɔng mul guntini sari na. Hazu Zakob ba kpa gasa dalɛ ha mul guntini wa.
The Seed Company