Angaramɔ (Genèse)31
1Ka Zakob zea nde hio bewei pɛ Laban tɔa nde: «Zakob kaya hio wi mɔ ka dung nɛ pɛ bafa ɔ, yo nɛ ɛngi ka wɛnɛ tɛbo nɛ wankpamɔ.»2Zakob zɔka zangli Laban, a ingɔ nde Laban de mɔ fin hatɛ wa tuka mɔ Sɔngsi na.3Mɛgi Wankpoo tɔa ha Zakob: «Nduki ha le pɛ hio ngbabafa mɛ, hapɛtɛ hio nam pɛ mɛ, nɛ mi be dung hinɛ mɛ.»4Zakob hazang bɛlɛ hinɛ hio zugili hio sari. A tomsamɔ saa Rasɛl hinɛ Lea ha wɛnɛ.5Zakob tɔa ha mbwa nde: « Mi zɔka nde bafa ɛnɛ de mɔ nɛ dedea fin hatɛ mi tuka mɔ Sɔngsi na. Maa Sɔ pɛ hio ngbabafa mi dungo hinɛ mi.6Nɛ ɛnɛ ingɔ nɛ dedea nde mi dea tom ha bafa ɛnɛ nɛ ngaya pɔm fɛt.7Tangere, a ɔsara mi ha sanza hio kɛamɔ pɔm ze bhukɔ fɛt. Maa Sɔ tɛ haa wɛnɛ wal mɔ de gdangamɔ nɛ mi na.8Ka bafa ɛnɛ batɔ nde: «Hio sari fɛt ka dung nɛ hio bebe mana gasa dafu hatɛ mbwa nɛ kɛamɔ pɛ mɛ», hio nanambu hio saria angara bhɛa hio bea nɛ hio dafu hatɛ. Ka bafa ɛnɛ batɔ nde: «Hio sari fɛt ka dung nɛ hio dafu wal hatɛ mbwa nɛ kɛamɔ pɛ mɛ», hio nanambu hio saria angara bhɛa hio bea nɛ hio dafu wal hatɛ.9Sɔ guo hio zugili sari hakɔ bafa ɛnɛ yunɛ, nɛ haa yo ha mi.10Ha ngimɔ danga may pɛ hio saria, mi zɔka liSɔ mɛngɛ: Hio bafambu sami hinɛ hio bafambu mbori ka dang hio nanambua fɛt dung ka nɛ hio bebe dafu hinɛ hio dafu wal hinɛ hio bu dafu hatɛ mbwa.11Ha zang ma zɔka liSɔ ma telenge pɛ Sɔ tɔa ha mi nde: “Zakob!” Nɛ mi kɔa: “Ɛy mi ha zea mɛ.”12a bhɔna ha tɔa: “Zɔk! Hio bafambu sami hinɛ hio bafambu mbori ka dang hio nanambua fɛt dung ka nɛ hio bebe dafu hinɛ hio dafu wal hinɛ hio bu dafu hatɛ mbwa. Hio mɔa hɔ ka mɛgi ka hazu mi zɔka hio wi mɔ ka Laban de nɛ mɛ.13Mi nɛ Sɔ ka ba osi tɛ ha mɛ ha Bethel. Haki mɛ bɛa ma ta, nɛ mɛ aa nɔ̂ ha zua, nɛ haki mɛ gɔnanu ha mi. Sising, gutɛ nɛ mɛ baa wal, lak le ɛngɛ gde; nɛ mɛ si ha le pɛ hio nam pɛ mɛ.”»14Rasɛl hinɛ Lea kiforowen ha Zakob nde: « Ɔ bo fin nɛ mamɔ kade ɔ abaa hapata bafa ɔ na.15A zɔk ɔ tuka hio tombɔ hazu wɛnɛ gdonga ɔ, nɛ a gdangsa mboli ka lɛma kuo ha kɔ wa kari.16Mɛgi, hio wi mɔ fɛt ka Sɔ kuo yunɛ hakɔ bafa ɔ, nɛ pɛ ɔ nɛ hio bem pɛ ɔ. De ka nɛ mɔ fɛt ka Sɔ osa ha mɛ.»17Mɛgi Zakob bhɔngaratɛ nɛ gde hio kɔ hinɛ hio bem pɛa hazu hio zambala.18Wɛnɛ kaya hio zugili sari hinɛ hio wi mɔ fɛt ka dungɔ nɛ yo ha kala-Mezopotani, mɔ nduki ha Kanaan, le pɛ bafa wa, Izaak.19Laban pena ha gɔna bumɔtɛ hio sami pɛa, nɛ Rasɛl zuo hio bebe be Sɔ pɛ bafa.20Zakob osara Laban wi mɔ le mɔ Aram hazu a tɛ gbata zu Laban hazu pena pɛa na.21Zakob yuomɔ pen nɛ hio wi mɔ fɛt ka dung nɛ pɛa. A kuoli Ephrate, nɛ wɛnɛ pena nɛ wal ngarî Galaad.22Ha zetar yala, ma wi tɔa ha Laban nde Zakob yuomɔ.23Laban wesara hio nam pɛa hapɛtɛ wa. Nɛ a naka pata Zakob ha zang yala mɔrkɔ zanga bwa, nɛ a kpa wɛnɛ hasoko hio ngari Galaad.24Maa nɛ zɛ, Sɔ osatɛ wa ha Laban ka dung nɛ wi mɔ le mɔ Aram nɛwal liSɔ. A tɔa ha wɛnɛ: « Ka mɛ tɔ ma wen ndang ha Zakob na: gdanga mana dede wen.»25Laban ndara pata Zakob ka bɛa guru pɛa hasoko hio ngari Galaad. Laban hinɛ hio nam pɛa fɛt mɔsoykisi.26Laban ana Zakob: « Ɛngɛ nɛ ngetemɔ ka mɛ dea nde? Mɛ osara mi kay nɛ hio bebhoko pɔm fɛt pen nɛ tuka hio bala bulo.27Mɛ pena nɛ wuso. Hawen ge ka mɛ tɛ gbatazu mi na nde? Mɛ osara mi. Mi lɛma gdea mɛ pen nɛ totɛ ha zang hio gima, hio bio banɛ hio nzanga ka ɛ saa nde nzanga.28Mɛ tɛ gde wal ha mi mɔ zɔbhi num hinɛ bem pɔm hinɛ hio bewazang mi na. Tɛ mɛ deamɔ tuka wanbili.29Mi nɛ ngaya mɔ de gdangamɔ nɛ ɛnɛ, maa Sɔ pɛ hio ngbabafa mɛ tɔa ha mi zɛ ɛngɛ ka pena nde “Ka mɛ tɔ ma wen ndang ha Zakob na: gdanga mana dede wen.”30Maa sising, mɛ pena hazu mɛ hasatɛ mɛ mɔ si ha pɛ bafa mɛ. Maa hawen ge ka mɛ zuo hio bebe be Sɔ nde?»31Zakob kiforowen ha Laban: « Hazu mi dea ke nɛ mi tɔa nde: “A be kay hio bebhoko pɛa yunɛ̂ ha kɔ mi.”32Maa ka mɛ kpa hio bebe be Sɔ pɛ mɛ ha pɛ ma wi, wi ɛngi be fe. Hali hio nam pɛ ɔ fɛt, mɛ ngɛsirimɔ hasoko hio wi mɔ pɔm fɛt, nɛ mɛ ku mɔ ka dung nɛ pɛ mɛ.» Zakob tɛ̂ ing nde Rasɛl kaya hio bebe be Sɔ pɛ Laban na.33Laban lea ha zang twa pɛ Zakob ka a bɛa ha Lea, hapata, wɛnɛ lea ha zang twa pɛ hio bhoko wantom bwa fɛt. Wɛnɛ kpa mamɔ ndang na. Ka wɛnɛ gboa ha zang twa pɛ Lea, a lea sising ha zang twa pɛ Rasɛl.34Tangere, yo badung nɛ̂ Rasɛl ka kuo hio bebe be Sɔ ndɔng. Wɛnɛ wuso mbwa ha soko gdɔl zambala. Nɛ wɛnɛ dungo ha zua. Laban kio mɔ ha zang twa ɛngi gan nɛ a kpa mamɔ ndang na.35Rasɛl tɔa ha bafa nde: « Bafa mi, ha tiso ha mi, mi lɛm mɔ gu tɛ ha lî mɛ na. Hazu mɔ ka hɔ ha tɛ hio bhoko fɛt, yo ha tɛ mi.» Laban kio mɔ gan nɛ wɛnɛ kpa hio bebe be Sɔ pɛa na.36Zakob dea ngambi nɛ wɛnɛ sɛnawen ha Laban nɛ tɔa: «Ngete gdangamɔ ka dea nde? Ngete wi ka mi gbɛa mɔ tɔ nde mɛ anak nɛ pata mi mɛngɛ nde?37Mɛ kpa mamɔ pɛ mɛ ndang ha zang hio wi mɔ pɔm ka mɛ kio nde? Ka mɛ kpa mamɔ, mɛ osi yo ha dɛl hali hio nam pɔm banɛ hio nam pɛ mɛ kade mbwa agɔn kita ɛngɛ ha soko ɔ bwa!38Yo dea bɛlɛ bhuzebwa ka mi dea le hinɛ mɛ. Ma swe ndang hio sami hinɛ hio mbori pɛ mɛ tɛ̂ bhɛ ma bea nɛ wɔl na! Ma swe mi tɛ̂ yɔng hio bafambu namdalɛ pɛ mɛ na.39Ma swe, mi tɛ̂ ku tɛnɛ ha mɛ ma wɔl namdalɛ pɛ mɛ ka ma gdanga sari bɛlɛ gbɛa na. Mi ha gdea ma mbing sari halia swe fɛt. Hio sari ndɔng ka hio wi ha zuo nɛ zɛ mana nɛ swe, mɛa ha ana mi mɔ futi mbwa ha mɛ.40Nɛ swe mi ha zea bɔnɛ ha baangowe swe, nɛ ze mi ha zɔka bɔnɛ gangmɔ, nɛ mi lɛm ɔla na.41Yo dea bɛlɛ bhuzebwa ka mi ɔanɛ̂ ha si mɛ: Mi dea tom kɔfɛ ha zang bɛlɛ bhukɔ gbala nar hawen hio bebhoko pɛ mɛ, nɛ hio olo bɛlɛ mɔrkɔ zanga ndang dungo nɛ mɔ kiowal kpa zugili namdalɛ pɔm. Maa mɛ, mɛ sanza hio kɛamɔ pɔm ze bhukɔ fɛt!42Ka bose nde Sɔ pɛ ngbabafa mi Abraham hinɛ pɛ bafa mi Izaak, Sɔ ka de mɔ kifi hali hio wi, tɛ gbakiri mi na, mana mɛ gdea mi nɛ gele kɔ. Maa Sɔ zɔka yera ka mɛ ha dea hinɛ mi, banɛ hio ngaya tom ka mi ha dea ha mɛ. Yo nɛ ɛngi ka wɛnɛ gɔna soko wen ha soko mi hinɛ mɛ mɔmbalaSɔ.43Laban kiforowen ha Zakob nde: ‹‹Hiobhoko ndɔng nɛ hio bem pɔm, nɛ hio bem pɛ mbwa nɛ hio bewazang mi, nɛ hio sari ndɔng nɛ sari pɔm, hio wi mɔ ndɔng fɛt ka mɛ zɔk nɛ pɔm! Maa sising, mi lɛm fin mɔ de ma mɔ ha hio bebhoko ndɔng hinɛ hio bem zang mbwa ka mbwa bhɛa na.44Mɛgi, ngimɔ lɛma nde ɔ de mbon ha soko ɔ. Mɛgi lɛma nde ɔ akpa ma kɛamɔ ha soko mi hinɛ mɛ.45Zakob kuo ma gasa ta nɛ wɛnɛ bɛa yo ha ngɔn.46Hapata a tɔa ha hio nam pɛa: « Ɛnɛ kay hio beta.» Nɛ mbwa kaya hio beta nɛ mbwa wesara yo hazu may ndang. Mbwa fɛt dungɔ hazu hio ta ndɔng nɛ mbwa yɔngamɔ.47Laban saa ling bhandi ɛngi nde Yegar-Sahaduta. Nɛ Zakob saa pɛa yo nɛ nule pɛa nde Galɛd .48Laban tɔa nde: ‹‹Mɛsɛ, zuta ka ɛ wesara nɛ wankɛwi hasoko mɛ hinɛ mi.» Yo nɛ ɛngi ka ɔ saa yo nde Galed, yo ngoy mɔ tɔ nde « Zuta kɛ mɔ.»49Ɛ a saa yo fin nde Mispa, ka ngoy mɔ tɔ nde « Bhandi zɔkmɔ hazu mamɔ ». Laban tɔa fin nde: « Lɛma nde Wankpoo azɔk mɔ hazu ɔ ka soko ɔ nɛ nyɛa nɛ ka ɔ lɛm zɔk may na!50Ka hio bebhoko pɔm zɔka bɔnɛ ha kɔ̂ mɛ, ka mɛ baa fin hio ma mbing bhoko, mɛ pangay: Yo bo nɛ wi ka dung wankɛwen hasoko ɔ na, maa yo nɛ Sɔ wantɛ.»51Laban tɔa ha Zakob: «Mɛ zɔk zuta ɛngɛ ka mi gdea ha lî ɔ, mɛ zɔk ta ka ɛ bɛa ha ngɔn.52Zuta nɛ gasa ta ɛngɛ ka ɛ bɛa nɛ hio wankɛwen hasoko mi hinɛ mɛ. Mɔ pɔm, mi gɔna nû mɔ pen zu hio ta ndɔng nɛ mɔ de gdangamɔ nɛ mɛ na. Mɛ fin nɛ bhalkɔa, mɛ agɔn zu hio ta ndɔng mɔ de gdangamɔ hinɛ mi na.53Sɔ pɛ Abraham nɛ pɛ Nahor adung wangɔn kita hasoko ɔ!». Zakob gɔna nû nɛ ling Sɔ ka dea mɔ kifi hali bafa wa Izaak.54Mɛgi, Zakob haa ma sadaka hazu ngari ɛngi ha Sɔ. Wɛnɛ saa hio nam pɛa mɔ tɛ a yɔngamɔ. Hapata yɔngamɔ ɛngi, mbwa fɛt ɔa haki hazu ngari ki zang zɛ fɛt gboa ha mɔsaa.
The Seed Company