Angaramɔ (Genèse)16
Bhɛ pɛ Ismael, bem pɛ Abram hinɛ Agar
1Sarai, ko pɛ Abram, tɛ̂ bhɛ bem ha wɛnɛ na. Wɛnɛ dungɔ nɛ ma bhoko wantom mɔ kandɔnu Ezipte ka ling wa nɛ Agar.2Sarai tɔa ha Abram: «Hazu Wankpoo dola mi nɛ bhɛ, mɛgi mɛ nɛ̂ ha pɛ bhoko wantom pɔm, mana mi bekpa ma bem nɛ wal wa.» Abram mɛkara wen pɛ Sarai.3Hapata ɛngɛ ka mbwa ɔa bɛlɛ bhukɔ ha zang le Kanaan, Sarai, ko pɛ Abram, kuo bhoko wantom pɛa mɔ kandɔnu Ezipte ka ling wa nɛ̂ Agar, nɛ haa wɛnɛ nɛ bhoko ha Abram wei pɛa.4Abram dungɔ hinɛ Agar tuka bhoko nɛ wei, nɛ wɛnɛ baa zang. Ka Agar zɔka nde wɛnɛ tɛ bo nɛ zang, wɛnɛ tɛ bo ha sɛbhala wan pɛa Sarai.5Mɛgi, Sarai tɔa ha Abram nde: «Wen nyanlɔ ka Agar ha tɔa ha tɛ mi, atek ha zu mɛ. Yo nɛ̂ mi ha ku wantom pɔm gde ha lîsila mɛ. Nɛ sising, ka wɛnɛ zɔka nde ɛ nɛ zang, a tɛ bo ha sebhala mɔ. Wankpoo adung wan-gɔnkita ha soko mi hinɛ mɛ!»6Abram kiforo wen ha Sarai: «Wantom pɛ mɛ ha zang kɔ̂ mɛ. De mɔ ka sila mɛ ngoya ha tɛ wa.»Mɛgi, Sarai dea Agar nɛ bɔnɛ nɛ a yuomɔ pen nɛ nyɛa nɛ wɛnɛ.7Telenge pɛ Wankpoo kpaa Agar hapɛtɛ ma kɔli ha zang kpɛnu, sanga nɛ kɔli ka dung ha lîwal Sur.8A tɔa: «Agar, wantom pɛ Sarai, mɛ gutɛ ha ndo? Nɛ mɛ nɛ̂ ha ndo?» Wɛnɛ kiforo wen nde: «Mi yu nɛ̂ mɔ nɛ nyɛa nɛ Sarai, wan pɔm.»9Telenge pɛ Wankpoo tɔa ha wɛnɛ: «Nduki ha pɛ wan pɛ mɛ, nɛ mɛ de tɛ mɛ nɛ bebea ha si wa.»10Telenge pɛ Wankpoo tɔa ha wɛnɛ: «Mi beha hio bezang ha mɛ nɛ dɔka, nɛ ɛ lɛm tɔl mbwa na hazu gili mbwa.»11Telenge pɛ Sɔ tɔa ha wɛnɛ: «Zɔk mɛ nɛ zang. Mɛ bebhɛ nɛ bewei. Mɛ beha ling Ismaël ha wɛnɛ, hazu Wankpoo zea mɛ ha zang dea tɛ mɛ nɛ bebea.12Wɛnɛ bedung tuka ma toyfok mɔ kumbɔ. Kɔ̂ wa bedung sungiri hio wi fɛt, nɛ kɔ̂ hio wi fɛt bedung sungiri wɛnɛ. Wɛnɛ bede le nɛtɛ, ha lî hio ya wa.»13Agar sa ling Wankpoo ka tɔa wen ha wɛnɛ nde: «Ata-El-Roi-Sɔ ka zɔk mi», hazu a tɔa: «Nɛ ha kɛ ha mi zɔk nde nɛ wɛna ha zɔk mi nde?»14Yo nɛ̂ ɛngi, ka ɛ sa ling kɔli ɛngɛ nde: «Ndongli mɔ Lahai-Roi». Yo dung ha soko hio le Kades hinɛ Bered.15Agar bhɛa ma bewei ha Abram. Nɛ Abram haa ling bem ka Agar bhɛa ha wɛnɛ nde Ismael.16Abram dungɔ nɛ bɛlɛ bhukɔa mɔrkɔ zu bhukɔa tar zanga mɔrkɔ gbala ndang (86) ha ngimɔ ka Agar bhɛa nɛ Ismael ha wɛnɛ.
The Seed Company