Angaramɔ (Genèse)15
Mbon ha soko Sɔ hinɛ Abram
1Hapata hio wi mɔ ndɔng, Wankpoo tɔa wen ha Abram ha zang zɔa zu mɛgi: «De ke na, Abram! Mi nɛ tɛ mi nɛ̂ kɛlɛ pɛ mɛ, nɛ kɛamɔ pɛ mɛ bedung nɛ gasa pentɛ.»2Abram kiforo wen: «Wankpoo Sɔ, mɛ beha nɛ̂ ngetɛmɔ ha mi ge nde? Mi bo nɛ bem na, nɛ mi ha nɛa mɔ fe, nɛ wi ka bedung nɛ hio wi mɔ twa hapata fio pɔm, yo nɛ̂ Eliezer mɔ Damas.»3Abram tɔa fin: «Mɛ tɛ̂ ha hio bezang ha mi na, nɛ wi ka ɛ bhɛa ha twa pɔm bedung wi ka bedung nɛ hio likɔ̂ pɔm.»4Maa, Wankpoo tɔa wen ha wɛnɛ nɛ a tɔa: «Yo bo nɛ̂ wɛnɛ ka bedung nɛ̂ wi ka bedung nɛ hio wi mɔ twa pɛ mɛ hapata mɛ na, maa, yo bedung nɛ̂ tɛ be wazang mɛ, wi ka begbo ha zang mɛ ha bedung nɛ hio likɔ̂ pɛ mɛ hapata mɛ.»5A kuo Abram gbo nɛ̂ ha dɛl, nɛ a tɔa ha wɛnɛ: «Zɔk mɔ ha ngɔn, nɛ mɛ tɔl hio Sɔla, ka mɛ lɛma tɔl mbwa.» A tɔa fin: «Bezang mɛ bedung mɛgi.»6Abram mɛkara Wankpoo ka zɔka wɛnɛ nzeng ha lî wa.7A tɔa ha Abram fin: «Mi nɛ Wankpoo, ka dea nde mɛ gbo ha Ur pɛ hio wi mɔ le Salde mɔ ha le ɛngɛ ha mɛ nɛ pɛ mɛ.8Abram kiforo wen: «Sɔ Wankpoo, mi bede mɛng mɔ ing nde mi bedung nɛ le ɛngɛ nde?»9A tɔa ha wɛnɛ: «Mɛ ku bebe nana mbu nday ndang mɔ bɛlɛ tar, nana mbu mbori ndang mɔ bɛlɛ tar, bafa mbu sami ndang mɔ bɛlɛ tar, bondo ndang hinɛ gbakuli ndang, mɔ ha yo ha mi.10Abram kuo hio sari ndɔng. Wɛnɛ gɔna soko mbwa bwa bwa, nɛ wɛnɛ gdea bhala ndang, ndang tan may nɛ ma bhalkɔa, maa, a gɔn soko hio nɔya na.11Hio nɔy ka ba mɔ tuka hio fambɛlɛ teka ha zu hio saria, maa, Abram yinɔ mbwa.12Ha ngimɔ ka swe ha lea, Abram teka ha zang ma gdɔng gdɔng la, nɛ ha zang ma gasa ke fin ha gduko tutum.13Wankpoo tɔa ha Abram: «Ing ha zu mɛ nde hio bezang mɛ bedung nɛ̂ hio ma gɔngɛnɛ wi ha zang ma le ka bo nɛ̂ pɛ mbwa na. Mbwa bedung bala haki, nɛ ɛ bede mbwa nɛ bɔnɛ ha zang bɛlɛ gɔmmay nar.14Maa, mi begɔn kita ha zu le ka bede mbwa nɛ bala, nɛ hapata mbwa begbo nɛ hio dɔka kpamɔ ha kɔ̂ mbwa.15Pɛ mɛ , mɛ befe ha zang gaamɔ, nɛ ɛ begun mɛ ha pata ma dede ngimɔ gbɛla pɛ mɛ.16Ha zenar tanga hio bezang mɛ, mbwa be nduki hakɛ, hazu ha ngimɔ ɛngi, hio gdangamɔ pɛ hio wi mɔ le Amori tɛ̂ dɔk kade mi ayin mbwa yu nɛ̂ na.17Ka swe ɔa nu, tutum tɛ bo nɛ̂ ngɛngɛngɛ, mɛgi, gasa we ka ba nɛ zɛwe ha gboa ha yo, nɛ yo ha pena ha soko hio kɛtana soko sari ndɔng.18Ha swe ɛngi, Wankpoo nɔa ma mbon hinɛ Abram nɛ a tɔa: «Mi haa le ɛngɛ ha hio bezang mɛ, angiri ha gasa bhale mɔ Ezipte gbo ha gasa bhale mɔ Efrate,19le pɛ hio wi mɔ Keni, pɛ hio wi mɔ Kenizi, pɛ hio wi mɔ Kadmoni,20pɛ hio wi mɔ Hiti, pɛ hio wi mɔ Perizi, pɛ hio wi mɔ Refa,21pɛ hio wi mɔ Amori, pɛ hio wi mɔ Kanaan, pɛ hio wi mɔ Girgasi, banɛ le pɛ hio wi mɔ Zebus.»The Seed Company