Galatians2
Thlǝ takǝt tatǝ kǝmsichǝ Bulus
1Kǝrsǝ hurech kum nggǝrsǝ foɗɗa, nggǝrki ngǝrandǝ in kǝ Urshelima, nggaˈan tǝ Barnabas. Paɗ ɗǝf ki Titus kǝ para nenchi.2Nggǝta ɗichi kafǝr kǝ Urshelima, kǝthlǝm tǝ pǝnichǝ Farta fata kǝɗ sǝnaˈta kǝɗi. Mbuˈani fee tǝrtǝ fee tanda wa, fen nech kǝ paktechi fǝ tǝrmbancha tǝ wuɓtǝ fa. Ɓaas ɗi chiti hur pong nafcha. Kǝthlǝm kǝ sǝni kweˈtǝ ɗi ha nati chita, tǝ thla lati chita, kǝ chok kǝ kohaɗan wa.3Chǝka Titus tǝɗi nech tǝ nenchi, kweˈ ˈya wu fee kaf kǝ hecha wa, chǝka nakan wa mǝthlan kǝ thlǝ Helenawata.4Thlaˈchǝ ndiktǝɗiya kǝthlǝm fowun wanmancha kǝ fǝ lekcha, fee yimandǝ fee tandǝs ǝ wuɓtǝ fa. Fee yircha kǝthlǝm kǝ ɓandǝ tawus chokta, yi indiyaˈan, thla nech si yaˈan hur Kǝrǝsti Yesu. Kǝthlǝm kǝ nggǝraˈanchǝ ndǝ kaɗ kǝ mafecha.5Chǝka kǝɗu, kalawa ǝn fat tandǝ ha wa chǝka ngguɗyeh. Kǝthlǝm kittaˈan i kwastǝ ndikta kǝ chokowunchi fa.6Fee tǝrtǝ fee choh wa fen nech kǝ Paktechaˈan (Chǝka nechandǝ kǝ micha, nat arta mǝɗinchi, kǝthlǝm taɗwu Farta har wa). Chekawandǝ ǝn kǝ ɗar ǝnɗi ɓasi wa.7Kǝɗu, nii ndǝ tǝ ndat wa, Farta fǝritǝ heˈta yi ɓassa ndǝ pong nafcha, kǝɗ thla fǝrandǝn Biturus kǝ ɓassan tǝ fee hechecha.8Kǝthlǝm Farta thla chich tera hur wanɗǝkaɗati Biturus ɗǝftǝn anchi kǝ tatǝ kimshaa, kǝ ɗar fee hechecha, mǝthlan paɗ chǝt ter hur wanɗǝkaɗatinchi ɗǝf kan nenchi kǝ choki kǝ tatǝ kimshaa kǝmɗi fee heche wakcha.9Kǝ nak Yakubu, tǝ Biturus, tǝ Yohanna fee sǝndǝ fee wa Fen nech kǝ paktecha, fee nech kǝ njin fǝ tǝr mbancha, kǝ nakandǝ kaakǝɗ ɗi chitǝ Farta, thlǝ kandǝ nggaˈan tǝ Barnabas harchǝ chap chap, nggǝman kanda wa kǝ chǝ ǝn ter nat ǝn. Nggaˈan kǝ ɗǝ ǝn kǝmɗi pong nafcha, fen paɗ kǝmɗi fee hechecha.10Nat ǝnɗi nda ǝn ndǝ ndak wa, kǝ kuɗukta tǝ fǝ ɓahcha, kapa ǝnɗi ɗǝfti kǝfatsi kǝ chi hacha.Yanan Bulus, Biturus ha ǝ Antakiya
11Kǝ ɓak Kefas kǝ Antakiya, yaananki ha kǝ hur chimandiyan, kǝthlǝm ǝnɗi chǝtǝn keˈkeˈ wa.12Kǝn fowun nafchǝ ɓata thlaˈtǝ mǝɗi Yakubu, thlǝ sǝmchan ɗǝsǝmnda tǝ pong nafcha. Kǝɗu kǝ saˈkanda, nggǝrang kan fat kǝrsǝn mǝɗi pong nafchaˈan, sǝm wa ǝn tǝ tandǝ paɗ wa, kǝthlǝm mǝthlan lekandǝ nafcha fee thlǝ ndech wa, nwaat kǝ hechan fee nafcha.13Kǝɗu takǝt Yahudawechaˈan fǝ tǝr mbancha, pǝn kandǝ kumi fǝrkit kǝ mǝthlan, chǝka Barnabas hurandǝ indiyan kaɗi tǝ wenikǝt ˈyanda.14Paɗaa kǝ naki tandǝ para kittaˈan i kwastǝ ndiktaˈan kaan wa, ndang ki Kefas ǝ pangǝn chika wuni nat ndat wa, “Cha thlǝ Yahudawat nako, chǝka kǝɗu, natˈyo ha kǝɗ pong nefa, ngga kǝɗ thlǝ Yahudawata wa, michicha natu kweˈyandǝ pong nafchǝ fa kǝ parandǝ tar raˈati Yahudawecha?15“Nggǝmǝn tǝɗi nggǝttǝ fǝ kǝ Yahudawecha, ngga pong nafcha fǝ chǝt ɓǝɓifecha wa,16sǝnmǝn wa, nefa nggǝch mbǝs hǝraˈta tǝmɗi para kusiˈ, maangga tǝmɗi fǝr kit kǝ Yesu Kǝrǝsti ndak wa. Kǝthlǝm ndaˈan nggǝmǝn paɗ, fǝrmǝn kit kǝmɗi Kǝrǝsti Yesu, kǝ chapamǝn chǝ fee kaɗi tǝmɗi fǝr kit kǝ ndi, ngga wa tǝmɗi tarchi kusiˈ wa. Kǝthlǝm tǝmɗi tarchi kusiˈ yowunsi nech mbǝs hǝraˈta wa.17“Maa ǝ hur kweˈtǝ yamǝn ha kǝ hǝraˈmǝn tǝmɗi Kǝrǝsti, mbǝsamǝn kǝ fee nggǝmǝn Yahudawecha kǝ fǝ ɓǝɓifecha, chokchan wa Kǝrǝsti tǝthl ndiksantǝ ɓǝɓifat hacha wa? Auwa, ngga kǝɗu wa.18Maa ǝ nggǝrinchi tǝnandǝ ǝnɗi foha ndi ha choh, tǝni wathla ndǝ ha wa nggǝt thlǝ ɓǝɓifata.19Kǝthlǝm nggǝta tǝmɗi kusiˈ kǝ choki kǝ mǝrta kǝmɗi kusiˈ, kǝthlǝm maˈ ni nat ha tǝ shishingndǝ fa kǝ Farta.20Kukwichi fee nat tǝ Kǝrǝsti. Nakanya ngga nggǝt peˈchǝ ha wa, kǝɗu Kǝrǝsti nech tǝ shishingnda ǝ hwirinchi. Naɗi ha nati chit nakanya ǝ hur fata, nggǝt chǝta ǝ hur fǝr kit, ǝ hur Waˈi Farta thla yahchǝ nenchi, thla fǝrchǝ shishingndiyan kǝthlǝm nggǝta.21Ɗǝf wi kaakǝti Farta kǝ kǝlar wa, kǝthlǝm mamwa naa fee mbǝs kakǝti Farta tǝmɗi para kusiˈ, pinchan wa, mǝrti Kǝrǝsti kohaɗan.”The Seed Company