Galatians1
1Yaraɗiya ɓechan mǝɗi Ɓulus tatǝ kimshaa. Tatǝ kimshaa ngga nafchǝ thlincha wa, paɗ ngga wa nafchǝ taɗcha wa. Yesu Kǝrǝsti, tǝ Farta Chinda, thla thlaˈanchǝ Yesu Kǝristi hur mǝmatecha.2Nggǝt nat tǝ wan manchǝmǝn tǝɗi nech thlǝmanna, nggaˈan ndowun ǝn fa, kun tǝɗi nat fǝrchǝ kit kǝ Farta ǝ hahi Galatiya.3Kaakǝta tǝ kǝɓikaɗi i Farta Chinmǝn, tǝ yi Chinda Yesu Kǝrǝsti kǝ chok tǝ wunchi.4Thla fǝrchi fatˈyan kǝthlǝm ɓǝɓifechˈyamǝn, kǝ hǝraˈaminchi hur ɓǝɓi yuwa heshiɗiya, tǝmɗi sakti Fartiyamǝn tǝ Chinmǝn.5Kǝmɗiyan maanda kǝ kweˈkǝchi, kǝ kweˈkǝchi. Kǝ chok kǝɗu.
Ndikti Farta thla nech mbinchan artǝ ndak
6Sakichǝ inda, weshet wun ha kǝ malwun thla ha ˈyech wunchi, kǝthlǝm kǝ nowun ha hur kaakǝti Kǝrǝsti, nakowun para yowun kwastǝ ndiktǝ samǝn.7Kittaˈan, yowun kwastǝ ndiktǝs samǝm wa, nechi mbuˈtǝ kǝɗu kǝthlǝm fowun si thlǝ nech hurandǝ hur inchi yowun, paɗ nakandǝ kweˈtǝ ha kǝ tǝɓrandǝ kwastǝ ndiktǝ ha mbinchan yi sǝkta, i Kǝristi.8Paɗaa chǝka nggaˈan, ndu yowun thlǝ thlǝndi Farta ǝ hulafǝrta, ma mbuˈowun tǝ kwastǝ ndiktǝ samǝn, mǝni thlat lat ǝn ɓasowun nda. Kǝ kǝsan chak meˈi Farta kǝ indiyan.9Kǝɗ thla mbuˈtǝ ǝn choh, kǝɗu paɗ nati nggǝr mbuˈta, ndat wa chǝka wun ɓassowun chǝ kwastǝ ndiktǝs mbinchan samǝn tǝ thla thlǝtwun, kǝ ɓi chak meˈi Farta kǝ indiyan.10Nggǝt tǝ ni ka yahti nefa ndu yi Farta wa? Ndu tǝni kweˈtǝ ha kǝ tǝrani wanɗǝkaɗati nafchǝ ha wa? Mamwa paˈkǝ nankanya tǝ ni yahta kǝ tǝranni wanɗǝkaɗati nafchǝ ha, mǝ chokwi kǝ mafati Kǝrǝsti wa.11Wanmanchina, yahchi si kǝ sǝnowunchi sǝ wa, kwastǝ ndiktiɗi mbinchan ɓassowun ndi si ngga yi pong nefa wa.12Kǝthlǝm ngga mǝɗi nef mbǝsti wa. Paɗ ngga tǝ chaˈichǝ fee har wa. Kǝɗu thlichi mǝɗi Yesu Kǝrǝsti, tǝmɗi pǝn indiyan kǝmɗinchi.13Sǝkwun kusheˈtǝ choktinchi choh hur para mbandi Yahudawecha. Sǝkwun mbanɗi ɓahandi fǝ tǝr mbanchi Farta tǝ alkǝtfa. Kweˈinchǝ ha kaan kǝthlǝm kǝ timmani tanda.14Paɗ ǝ mbǝrani mbǝrchin ha fee nech kǝ Yahudawecha kǝɗ nggǝta, ǝ hur chaˈati tǝr mbandi Yahudawecha. Fǝrinchi fatsǝ kaan kǝ para ǝna chiti kaakech na.15Paɗaa taɗ kǝ Farta nenchi kǝn fee nggǝt nenchi, ˈyakan nenchi tǝmɗi kafatˈyan, ɗǝpan kan wa kǝmsi,16pǝnkan Waˈyan tǝmɗinchi, kǝthlǝm kǝ ɓasi pǝthlǝr pong nafcha. Saka wi ha tǝ nefa wa.17Ɗǝwi kǝ Urshelima kǝ ni fee lech choktǝ kǝ tatǝ kǝmsicha, mǝ nggǝta wa. Kǝɗu, pǝɗaki kǝ hahi Larabawa, thlaˈtǝ minni nggǝrki nggǝranndǝ in kǝ Dimaska.18Kǝrsǝ hurat mahkan pǝɗaki kǝ Urshelima kǝ naa Kefas. Chokki tǝ ndi mǝndǝ kum nggǝrsǝ ɗǝrman.19Nawi chǝka artǝ hur takǝt tatǝ kǝmsicha wa, Yakubu ndak, wanman Chinda20Ənɗi nati yarowun ndǝs ya, kittaˈan nati mbuˈowun nda ǝ pangngǝn Farta, ngga lekta wa.21Kǝrsaɗan, pǝɗaki kǝ hahi Suriya tǝ hahi Kilikiya.22Kǝɗu paɗ kǝtǝn shichiɗi Kǝristi, thla nech ǝ hahi Judiya sǝn wandǝ nenchǝ kwaɗǝn wa.23Kusheˈtaˈan ndak sǝk tǝnda tǝ ndat wa, “Nafɗi choh thlǝ nech fǝranmǝn panchǝ yu, nakanya mǝthlan ɓas fǝrkit tǝɗi choh kweˈtǝn ha kǝ timanchi.”24Maanan kandǝ Farta kǝthlǝm nggǝta.The Seed Company