Vafilipi3
1Ndena, vakolo vangu muhekelele mukuwungana na Mtwa. Sendifwaila kugawunyila gala gendigasimbile pamwandi, kwakuva ago dagidima ludikilo lwenu.2Muyilole na Vawulanichi veviswitilicha kuva vanu vevamdikiye Kilisito ving'ang'wa vadumule bina avo vegehe ngita mikeve, ndeni mwikale patali na vevigita uwofu uwo.3Nefwe nde vene kudumula bina va undakyene, ila sevene, kwakuva nefwe tukumsuka Nguluvi kwa ng'asi lya Muhe vake na kwidumbila mukwiwunga na Kilisito Yesu, vala setukwidumbila makani gya muvili.4Ata kangi nene ndigehe na kwakuva lya kuhuvila makani gya muvili. Ngita poyoli munu yeakwilola agehe na kwakuva lya kuhuvilila makani ga mvili, nene ndigehe na molofu ga kuhuilila kuchumba mwene.5Nene ndikadumulilwe bina kigono kya mnana pendibabilwe, nene ndi munu va inyi lya Isilaeli likabila lya Benjamini, nene nde Muibulania, nde Mufalisayo kwa kukolela lagilicho lya Nguluvi gyeamgavile Musa unofu.6Kangi ndikagangamile hilo kugita gyendikahochile kuva gyakumkelesa hilo Nguluvi, ago nde gakandigitile ndiligudise lipinga lya vanu vevamuidikiye Kilisito. Nene ndikali ndihela nongwa mulagilicho.7Ila ago gyonda gyegakali giwoneka kuva nde ganofu, nondee, ndiwona sekinu kwakuva lya Kilisito.8Seago hela, ila gyonda ndilola sekinu, kwakuva lya makani manofu hilo, kwa kumchela Kilisito Yesu Mtwa vangu. Kwa kuva lya mwene ndilamuwe kutagila patali kila kinu, ndigawene kuva ago gyonda ni wafu hela, neke ndimupate Kilisito,9sendihuvila ngita kudikilwa pautalo lya Nguluvi kwa kukolela malagilicho gya Musa, ila ndihuvila kudikilwa pautalo lya Nguluvi kwa kumdikila Kilisito. Nguluvi deyeakunilola kuva ndikwidikilwa pautalo lyake kwakuva ndimdikiye Kilisito.10Kyending'ang'a ndi kumchela Kilisito na kulola ludali lwa uchulubuko vake, ndisaka kuguda ngita mwene na kufuwa ngita mwene,11ndihuvilila kuva na nene dandichulubuchwa.12Sendikwigamba kuva ndipatile suwe awu nene ndivesile suwe ndihela lukolakola. Ndikwendelela kugangamala neke niwanuke fupo ambalyo Kilisito akandigavile nene.13Lukolo vangu, sendivalila kuva ndipatile suwe fupo, ila lukani lumwi ndigita, ndikugasemwa gala gegachumbile na kugangamala kugawanuka gala gyegagehe pautalo.14Suwe, ndigehe lunyilo kufikila natilo lyangu, neke ndiwanuke lila fupo, ambalyo nde lukemelo lwa Nguluvi neke ndikale ukoya kuluwano kwa ng'asi lya Kilisito Yesu.15Nefwe vonda vetugangamale mulidikilo tung'ang'wa kuimilicha lukani lulu. Ila ngita vamonga venu vehocha lungi, suwe Nguluvi dakuvakugubutula lukani ulu.16Kinu kinofu hilo nondee, yitung'ang'a kugafwata mukwikala kwa nefwe gala Nguluvi gyeatugubutulie.17Vakolo vangu, mufwate mufano vangu. Kangi mwiwulaniche kwa vanu vevifwata mifanu gyetukavagavila nyenye.18Ndivalongiye suwe lukani ulu mala chongofu, nondee ndiwuyila kuvalongela kangi kuno kuvemba, povali vanu volofu vevipinja mawulanicho gya Yesu kufuwa pakipindilihicho.19Umalilo vao ndi kuhanangwa, kwakuva nguluvi ndi ludoboko lwa mivili, vihocha makani gyawo gya nyoni na makani gyawo gya inyi.20Ila nefwe pakaye lyetu ndi kuluhano, tukumchindila kwa ludoboko lukomi hilo Mulowa ache kuhuma kuluhano, Mtwa Yesu Kilisito.21Mwene daihecha mivili gyetu misosumbafu na kuyigita iwane na mvili vake mkomi, kwa ludali lula lweiwesa kufivika finu fyonda panyi lya ulongochi vake.
The Word for the World International