1 Tesalonika2
1Mbufo nditọ ete, emediọñọ ke idem mbufo ete, edidi emi ñnyin ikedide ndise mbufo ikedighe ikpuikpu.2Mbufo emefiọk nte mbon Filipai eketimerede, enyuñ esuñi ñnyin, mbemiso ñnyin ikedi ibine mbufo ke Tesalonika. Tutu ye oro Abasi ñnyin ama ọnọ ñnyin isọñesit ye ukeme nditiñ Eti Etop emi nnọ mbufo emi etode Enye, okposuk edi emi ubiọñọ okokponde eti eti.3Ebeñe emi ñnyin inamde inọ mbufo itoho ke ndudue, mme ke idiọk ekikere, mme ñnyin ndiñwana ndinam ñkari ye owo ndomokiet.4Ñnyin ikam itiñ ikọ kpukpru ini nte Abasi oyomde ñnyin itiñ, koro Enye ama enyime ñnyin, onyuñ ayak Eti Mbuk emi esin ñnyin ke ubọk. Ñnyin iñwanake ndinem owo esit, edi iñwana ndinem Abasi esit, emi odomode uduak esit ñnyin ese.
Mme Isuñ Emi Etode Abasi
5Mbufo emetim efiọk ete ke ñnyin ikedighe itiene mbufo ye nneminua, mme ndida mme ikọ mfuk idiọk itọñ ñnyin, Abasi edi ntiense ñnyin.6Ñnyin ikeñwanake ndibọ itoro nto owo baba kiet, mme otode mbufo mme mme mmọ efen.7Okposuk edi emi ñnyin ikenyenede unen nte mme Isuñutom Kraist ndibup mbufo ñkpọ ekededi. Edi ñnyin ikodu ifure ifure uwem ke ini emi ikodude ye mbufo, ukem ukem nte eka nditọ ekpemede nditọ esie.8Ke ntak ima emi ñnyin inyenede inọ mbufo, ñnyin ima ibeñe idem ndibuana ye mbufo, idighe Eti Mbuk emi otode Abasi ikpọñ edi uwem ñnyin nde. Mbufo ema eduk ñnyin esit eti eti.9Eneni iduhọ, mbufo emeti nditọ ete, nte ñnyin ikanamde utom inyuñ ibọ ufen! Ñnyin ikanam utom okoneyo ye uwemeyo, man ñnyin ididi ubiọñọ inọ mbufo kadaña emi ñnyin ikọkwọrọde Eti Mbuk emi otode Abasi inọ mbufo.10Mbufo edi mme ntiense ñnyin, ntre ñko ke Abasi edi. Edinam ñnyin ye mbufo emi enimde ke akpanikọ ekedi edisana, nnen nnen, ikonyuñ inyeneke ndo.11Mbufo emefiọk ete ke ñnyin ikanam ñkpọ ye mbufo kiet kiet kpa nte ete nditọ anamde ñkpọ ye nditọ esie.12Ñnyin ima idọñ mbufo esit, ima isọñọ mbufo idem, ima inyuñ ika iso ndinyik mbufo ndidu uduot uwem emi enemde Abasi esit, Enye emi okokotde mbufo edibuana ke Obio Ubọñ ye ubọñ Esie.13Ndien ke mme ntak eken ñko, ñnyin inọnọ Abasi ekọm kpukpru ini. Ke ini emi ñnyin ikadade Etop Abasi isọk mbufo, mbufo ema ekop enyuñ enyime ndibọ enye. Idighe nte etop owo, edi nte etop emi otode Abasi emi ke akpanikọ edide ntre. Koro Abasi akanam utom ke otu mbufo emi enimde ke akpanikọ.14Mbufo nditọ ete mi, ukem se iketibede ye ufọk Abasi ke Judia ye ikọt Abasi emi ekedude do emi ekedide inyene Kraist, ama etibe ukem ukem ye mbufo. Mbufo ema ekut ukem ukọbọ ke ubọk mbon obio mbufo, nte emi mmọ ekekutde ke ubọk mme Ju,15emi ekewotde Ọbọñ Jisọs Kraist, ye mme asiak uduak Abasi, enyuñ ekọbọ ñnyin. Mmọ ikenemke Abasi esit, enyuñ eduọ obom ye kpukpru owo.16Mmọ ema eñwana nditre ñnyin ndikwọrọ ikọ nnọ mme mmọ emi midighe mme Ju, kpa Eti Mbuk emi edidade ubọhọ isọk mmọ. Emi edi akpatre uyọhọ udomo idiọkñkpọ emi mmọ ekenamde kpukpru ini. Ndien ke emi, iyaresit Abasi ama ọduọ ofuk mmọ ke utit.17Edi ama edi ñnyin nditọ ete, kadaña emi ñnyin ikadianarede ye mbufo ke esisit ini, ke ikpọkidem idighe ke ekikere, ima ikpu mbufo eti eti, inyuñ iñwana nditọñọ ntak ndi — ndikut mbufo.18Ñnyin ima iyom ndifiak edem mbine mbufo. Ami Pọl mma ñwana ndifiak ndi, ndibe ini kiet, edi andidiọk ikayakke ñnyin idi.19Ke editim ntiñ, edi mbufo, kpa mbufo, idighe mme mmọ efen, edi idorenyin ñnyin, inemesit ñnyin, ye ntak edibure mbufo edikan ke iso Ọbọñ ñnyin Jisọs, ke ini Enye edide.20Ke ata akpanikọ, mbufo edi uku ye idara ñnyin!Biblica, Inc.