1 Pita4
1Sia Kraist okokutde ukut ke obukidem, mbufo ñko enyene ndidọñ idem mbufo esit ye uduot ekikere emi, koro owo ekededi emi okutde ukut ke obukidem isañake nsaña aba ye idiọkñkpọ.2Ọtọñọde ke emi, ndien, mbufo enyene ndidu uwem mbufo emi ọsuhọde ke isọñ emi ke idak ukara Abasi, idighe ke idak idiọk itọñ obukidem.3Mbufo ema ebebiat ini emi ekemde ke mme ini emi ekebede ke edinam se mme mmọ emi mibakke Abasi emade ndinam. Ekebiat uwem mbufo ke ndedehe ido uwem, idiọk udọñ obukidem, ukpammin, etime etime ido, ñka uñwọñ mmin, ye ke mbubiam edikpono ñkpri abasi emi ubọk owo anamde.4Ndien ke emi, mme mmọ emi mibakke Abasi edu ke ñkpaidem ke emi mbufo mibuanake aba ye mmọ ke ñkani mbiara ye obukpo uwem emi mmọ edude; ke ntak emi mmọ esuñi mbufo.5Edi mmọ eyenam ibat idem mmọ ke iso Abasi, emi odude ke mbeñeidem ndikpe ikpe mme odu uwem ye eke mme akpaña ñkpa.6Ntak edi oro ekekwọrọde Eti Mbuk emi enọ mme akpaña ñkpa ñko, ekwọrọ enọ mmọ emi ema ekekpekpe ikpe mmọ ke obukidem emi nte ekpede ikpe kpukpru owo. Ekekwọrọ enọ mmọ man otodo ke uwem mmọ ke spirit, mmọ ekpedu uwem nte Abasi odude.
Ima Ofuk Ediwak Idiọkñkpọ
7Utit kpukpru ñkpọ ekpere. Mbufo enyene ndifara ke idem, ñnyuñ nda ke ikpat mbufo man ekeme ndibọñ akam.8Akakan ñkpọ edi, ema kiet eken ke ofuri esit, koro ima ofukde ata ediwak idiọkñkpọ.9Eberede usuñ ufọk mbufo enọ kiet eken, ekunyene se etiñde.10Owo kiet kiet, nte eti akama nsio nsio mme enọ Abasi, enyene ndida asaña asaña enọ emi enye ọbọde oto Abasi nsin ke edinam, ke ufọn mme mmọ efen.11Owo ekededi emi ọkwọrọde ikọ, enyene ndikwọrọ ikọ Abasi, enyemi ọnọde uñwam, enyene ndinọ uñwam ke ukeme emi Abasi ọnọde enye, man otodo ke kpukpru ñkpọ enọ Abasi ubọñ oto ke Jisọs Kraist emi ubọñ ye odudu enyenede Enye ke nsinsi nsinsi. Amen.12Mme ndima ufan mi, ekuyak idem akpa mbufo kabaña mme ikañ ikañ idomo emi esimde mbufo, nte ñkpọ emi akananam mitibeke, etibe ọnọ mbufo:13Utu ke oro, edara ete ke mmimọ ke ibuana ke ukut Kraist, man otodo esit mbufo ọyọhọ ye idara ke ini emi ediyararede ubọñ Esie.14Ọfọfọn ọnọ mbufo, edieke esuñide mbufo ke ntak emi mbufo edide mme anditiene Kraist, emi owut ete ke spirit ubọñ oro, kpa Spirit Abasi odoro mbufo ke idem.15Owo mbufo ndomokiet okubọ ufen ke ntak emi enye edide owot owo, mme inọ, mme abiat ibet, mme esin enyin ke mbubehe mmọ efen.16Edi edieke mbufo ebọde ufen koro mbufo edide ikọt Abasi ekukop but ke esit, edi ekọm Abasi koro mbufo ekamade enyiñ Kraist.17Ini edi emi ikpe editọñọde, ndien mme ikọt Abasi edidi akpa ndida ke ikpe. Edieke ọtọñọde ye ñnyin, editie didie ke utit ye mme mmọ emi minimke eti Mbuk emi otode Abasi ke akpanikọ?18Kpa nte ikọ Abasi ọdọhọde, “Edieke edide ata ọkpọsọñ ñkpọ ndinyaña nti owo, didie ndien ke edidi ye mme mmọ emi mibakke Abasi ye mme mmọ emi esinede ke idiọkñkpọ?”19Ke ntre mme mmọ emi ebọde ufen ke ntak emi edide uduak Abasi ọnọ mmọ enyene ndida nti ido mmọ ñyak idem nnọ andibot mmọ ofuri ofuri, emi anamde eñwọñọ Esie kpukpru ini.Biblica, Inc.