ኢስያሳ22
የሩሳላመባይ ኦደቴዳ
1ሳፃ ዎምባ ግያ ሳኣባዉ ጾሳይ ኦዴዳ ቃላ። ህንተ ኡባይ ጎልያ ቦላን ደምባዪደ ኦዳ ሳኣ ከሴዳዌ አያሴ?2ኔኖ ዋሱ፥ ድርባይነ ጫቡ ኩሜዳ ካታማዉ፥ ነ ግዶን ሀይቄዳ አሳቱ ማሻን ሀይቂበይክኖ፤ ዎይ ኦላንካ ሀይቂበይክኖ።3ህንተ ካፓቱ ኡባይ እትፐ ባቃቴድኖ፤ ኡንቱንቱ ዎንዳፊ ባይናን ጮ ኦሞደቴድኖ፤ ኡንቱንቱ ሃኮ ሳ ባቃቶፐነ ቤቴዳ ኡባቱ ኦይቀቴድኖ።4ሄዋ ድራዉ፥ ታን ሀዋዳን ያጋድ፤ “ታና ጼሎፕተ፤ አነ ታን አፎጻደ ምሾ ዬኩዋ ዬካይ፤ ዬዳ ታ አሳዉ ዬክያ ታና ምንና ጊደ ዳቡሮፕተ” ያጋድ።5ጎዳይ፥ ኡባፐ ዎልቃማ መና ጎዳይ ሀ ጋላሳ ሳፃ ዛንጋራን ዳጋማ፥ የደርሳነ ሻቢርሳ ጋላሳ ኦዳ፤ ቃይ ግምበቱካ ኮለትያ ጋላሳነ ደረቱዋኮካ ዋስያ ጋላሳ።6ኤላመ ባረ ፓራ ጋረቱዋናነ ፓራ አሳቱዋና ባረ ዎንዳፍያ ኦይቂደ ዬዳ፤ ቂራ ጋድያ ዎታዳራቱ ቃይ ባረንቱ ጎንዳለቱዋ ጊግሴድኖ።7ሎይ ሎእያ ህንተ ዛንጋራቱ ፓራ ጋረቱዋን ኩሜድኖ፤ ፓራ አሳቱ የሩሳላመ ካታማ ፐንግያ ስንን ኤቄድኖ።8እ ይሁዳ ጌሶቱዋ ቃሬዳ። ሄ ጋላስ ህንተ ዎራ ጎልያን ደእያ ካትያ ኦላ ሚሻቱዋ ጼሌድታ።9ቃይ ህንተ ዳዊታ ካታማ ግዶን ኮለቴዳሳይ ዳሬዳዋ በኤድታ፤ ዝቃ ሳኣ ሺቄዳ ሃ ዳጋይ ደኢታ።10ያቲደ ህንተ የሩሳላመን ደእያ ጎለቱዋ ፓይዴድታ፤ ግምቢያ ምንናዉ ጎለቱዋ ኮሌድታ።11ካሰ ኤጫ ዳልባንን ደእያ ሃ ዛሪደ፥ አ ምንጅያሳ ላኡ ግምበቱዋፐ ግዱዋን ጊግሴድታ። ሽን ህንተ ሄዋ መዳዌ ጾሳ ግድያዋ አኬክበይክታ፤ ዎይ ዳሮ ዎድያፐ ካሰ ሄዋ ሀልቼዳዋ ያይንበይክታ።12ሄ ጋላስ ጎዳይ፥ ኡባፐ ዎልቃማ መና ጎዳይ ህንተና ዬካናዉነ ዝላላናዉ፥ ህንተ ሁጲያ ሜደታናዉነ ዋሩዋ ማያናዉ ህንተና ጼሴዳ።13ሽን በእተ፥ ህንተ ናሸቲታነ ፖጩ ጊታ፤ ቦራነ ዶርሳ ሹኪታ፤ አሹዋ ሚታ፤ ዎይንያ ኤሳካ ኡሺታ፤ “ኑን ዎንት ሀይቂያ ድራዉ፥ አነ ሜቶነ ኡሼቶ” ያጊታ።14ኡባፐ ዎልቃማ መና ጎዳይ ሀዋ ታዉ ኦዴዳ፤ እ፥ “ህንተ ሀይቃና ጋካናዉካ ሀ ናጋራይ ህንተንቶ አቶ ጌተተና። ታን ጎዳይ፥ ኡባፐ ዎልቃማ መና ጎዳይ ሀዋ ኦዳይ” ያጌዳ።ሼብና፥ “ኔና ኤራ!” ጌዳዋ
15ጎዳይ፥ ኡባፐ ዎልቃማ መና ጎዳይ ሀዋዳን ያጌዳ፤ “ባ፤ ካትያ ጎልያን ሱንቴዳ ካፑዋ ሼብናኮ ባደ ሀዋዳን ያጋ፤16‘ሀዋን ኔን አያ ኦይ? ቃይ ኔን ሀዋን ነዉ ዱፉዋ ቦካናዉ፥ ነዉ ሀዋን ኦኔ ደእያዌ? ኔኖ ቃ ሳኣን ነዉ ዱፉዋ ማስያዎ፥ ቃይ ሹቻ ጎምፓን ነዉ ደእያ ሳኣ ዎጭያዎ፥17ነኖ ምኖ ብታንያዉ፥ ኔና መና ጎዳይ ዎልቃን ዎራ ዛሪደ ኦላና። ኔና እ ጲርጾ ኦይቂደ፥18ዩሽ ዩሽ አደ ኩዋዳን፥ እት አኮ ጋድያን ኦል አጋና። ኔኖ ነ ጎዳ ጎልያዉ ዬላ ግዴዳ ብታንያዉ፥ ኔን ያን ሀይቃና፤ ነ ቦንቾ ፓራ ጋረቱካ ያን አታና።19ታን ኔና ነ ኦሱዋፐ ከሳና፤ ነ ዳናተፐካ ኔና ሻራና’ ያጋ።20“ሄ ጋላስ ታን ህልቂያ ናኣ ታ ቆማ ኤልያቂማ ጼሳና።21ነ ማዩዋ አ ማይዛና፤ ነ ዳንጭያዋንካ አ ዳንጭሳና፤ ነ ሱንተካ አዉ አደ እማና። እ የሩሳላመን ደእያ አሳዉነ ይሁዳ አሳዉ አዉዋ ግዳናዋ።22ታን ዳዊታ ጎልያ ቁልፕያ አ ሀሽያን ዎና፤ እ ዶያና፤ ኦንነ ጎርደና፤ ቃይ እ ጎርዳና፤ ኦንነ ዶየና።23ታን አ አማንያ ሳኣን ሽካልያዳን ጋና፤ እ ባረ አዉዋ ጎልያዉ ቦንቾ ካተቱዋ አራታ ግዳናዋ።24ዋንጫፐ ቢደ፥ ቃባ ጋካናዉ ኮጫን ካቄዳዋዳን፥ ኡንቱንቱ አ አዉዋ ጎልያ ቦንቹዋ ኡባ፥ ናናቱዋ፥ ናኣ ናናቱዋካ፥ አ ቦላ ዎና” ያጌዳ።25ኡባፐ ዎልቃማ መና ጎዳይ ሀዋዳን ያጌ፤ “ሄ ጋላስ አማነትያ ሳኣን ጌዳ ሽካሊ ክቻና፤ ቃንጸታናነ ኩንዳና። አ ቦላን ካቄዳ ቶኩዋ ኡባይ ዱጽ ዎና” ያጌ። ሀዋ መና ጎዳይ ኦዴዳ።The Word for the World International