ኢስያሳ21
ባብሎነ ኩንደ በስያ ሳፃ
1አባ ማታን ደእያ ባዞ ኦደቴዳ ጾሳ ቃላይ ሀዋ።ገድሳ ባጋፐ ጎትያ ጫርኩ ሱራጊደ ይያዋዳን፥ ባሻይ መላ ቢታፐ፥ ያሽያ ጋድያፐ ዬ።2እት ያሽያ ሳጻይ ታዉ ቆንጬዳ። አ እምያዌ አ እሜ፤ ኦሞድያዌ ኦሞዴ፤ ኤላማ ቢታዉ፥ ዎራጃ! ሜዶና ቢታዉ፥ ካታማ ዶዳ! ባብሎነ ጋሱዋን ጋኬዳ ኦልያ ታን ግድሳና።3ሄዋ ድራዉ፥ ታ ጼሳይ ሳኮ ጻላላ ግዴዳ፤ ማጫ አሳ የሉ ኦይቂያዋዳን፥ ታና ኡንኡ ኦይቄዳ፤ ታን ስስያዋፐ ደንዴዳዋን ሆካድ፤ ታን በኤዳዋፐ ደንዴዳዋን ዳጋማድ።4ታና ዪጮዬ፤ ታና ያሻይ ኮኮርሴ፤ ታን አሞቴዳ ኦማርሳይ ታዉ ኮኮርሳዉ ላመቴዳ።5ታን በኤዳ ሳጻን ኡንቱንቱ ግብራ ጊግሴድኖ፤ ምንጻፍያካ ሂጼድኖ፤ ያቲደ ሚኖነ ኡሺኖ። ያትሽን፥ “ህንተኖ ካፓቶ፥ ደንድተ! ህንተ ጎንዳለቱዋ ቁጭተ!” ያግያ አዛዙ ዬዳ።6ጎዳይ ታና ሀዋዳን ያጌዳ፤ “ባ፤ ጾሞስያ አሳ ዎ፤ እ ባረ በእያዋ ኦዶ።7ጋማማ መህያ ቶግያዋንታ፥ ላኡዋ ላኡዋ ግዲደ ብያ ፓራ አሳቱዋ፥ ሀረቱዋ ቶግያዋንታነ ጋሎቱዋ ቶግያዋንታ በእያ ዎደ፥ ሎይደ ጼሎ፤ ሽ ጼሎ” ያጌዳ።8ሄዋፐ ጉይያን፥ ዎቼዳዌ ሀዋዳን ያግ ዋሴዳ፤ “ጎዳዉ፥ ታን ዎችያሳን ጋላስ ጋላስ ፓጭ ባይናን ኤቃድ፤ ታ ሳንታርያንካ ቃማ ሙልያ ቶለታድ።9በእተ፥ ጋማማ መህያ ቶግያ ፓራ አሳቱ ላአ ላአ ግዲደ ዪኖ” ያጌዳ። እ ቃይካ ሀዋዳን ያጌዳ፤ “ባብሎነ ኩንዴዳ፤ አ ጾሳቱዋ ምስለቱካ ኩንዴድኖ። ኡንቱንቱ ኡባይካ ሳኣን ዱገ ኩንዲደ ጋጨቴድኖ” ያጊደ ዋሴዳ።10ህንተኖ፥ ታ ኡዱማን ቆጸቴዳ ታ አሳቶ፥ ኡባፐ ዎልቃማ መና ጎዳፐ፥ እስራኤልያ ጾሳፐ ስሴዳዋ ታን ህንተንቶ ኤርሳይ።
ኤዶማባዉ ኦደቴዳዋ
11ኤዶማ ቢታ ጾሳይ ሀዋዳን ያጌዳ፤ “እት ብታኒ ኤዶማ ባጋና ታና ጼሲደ፥ ‘ላ ዎችያዎ፥ ሳአይ ዎንታናዉ አፑኑ አቴዴ? ላ ዎችያዎ፥ ሳአይ ዎንታናዉ አፑኑ አቴዴ?’ ያጌ።12ዎችያዌ ዛሪደ፥ ‘ሳአይ ዎንታና ሀኔ፤ ቃይ ቃማና፤ ህንተ ኦቻናዉ ኮዮፐ፥ ስም ዪደ ኦችተ’ ያጌ” ያጌዳ።አራባ ቢታባዉ ኦደቴዳዋ
13አራባ ግያ ቢታ ጎዳይ ሀዋዳን ያጌ፤ “ህንተኖ ዳዳና ዛልአንቻቶ፥ ህንተ ህንተ ጫንያ ጋሎቱዋናካ አራባ ጋድያ ባዙዋን አቃና።14ህንተኖ፥ ቴማ ግያ ጋድያን ደእያ አሳቶ፥ ሳመቴዳዋንቶ ሃ አህተ፤ በተቶ ምያዋ እምተ።15አያዉ ጎፐ፥ ኡንቱንቱ ማሻፐ፥ ሾኩዋፐ ሾዴዳ ማሻፐ፥ ዳፌዳ ዎንዳፍያፐነ ምኖ ኦላፐ ባቃቲደ ዬድኖ” ያጌ።16ሄዋፐ ጉይያን፥ ጎዳይ ታና ሀዋዳን ያጌዳ፤ “ኮንትራትያ ኦሳንቻ ዎድያዳን፥ መጽ እት ላይ ግዶን ቄዳረ ቦንቹ ኡባይ ዉራና።17ቄዳረ ጋድያን ደእያ ዎንዳፍያን ዱክያ ዎልቃማ ኦላንቻቱዋፐ ጉቱ አታና፤ ሄዋ መና ጎዳይ እስራኤልያ ጾሳይ ኦዴዳ” ያጌዳ።The Word for the World International