ኤራንቻ4
ናቁዋ፥ ዳቡራነ ላግያ ዩሳ
1ታን ቃይካ፥ ሳሉዋ ጉፋንን አሳይ አሳ አያ ኬሻ ናቂንቶነ ጼላድ። ናቀቴዳዋንቱ ባረንታ ምንያዋ ዪደ ዬኪኖ። ናቂያዋንቶ ዎልቃማ ማታይ ደእያዋፐ አትና፥ ናቀትያዋንታ ማድያዌ ኦንነ ባዋ።2ሄዋ ድራዉ፥ ታን፥ “ሀእ ፓጻ ደእያዋንቱፐ ካሰ ሀይቂ ክቼዳዋንቱ ኬካ” ያጋድ።3ግዶ ሽን፥ ሀ ላኡዋፐካ አደ ቃይ፥ ሙለ የለትቤናዋንቱ ካጫይ ሎአ፤ አያዉ ጎፐ፥ ኡንቱንቱ ሳሉዋ ጉፋንን ኦሰትያ ናቁዋ ሙልያ በእበይክኖ።4አሳይ ባረ አሞቴዳባ ደማናዉ ሎይ ዳቡሪደ ኦ፤ ሽን ሄ ዳቡራይ ባረ ላግያ ቦላን ቃናትያ ቆፋፐ ደንዴዳዋና ግድያዋ ታን አኬካድ። ሄዌካ ቃይ መላ፤ ጫርኩዋ ኦይቃናዉ የደርስያባ ማላ።5ባረ ኩሽያ ጻጺደ፥ ኡት አግያ አዛላይ፥ ኮሻን ሀይቄ።6ዳቡራንነ ጫርኩዋ ኦይቃናዉ የደርስያባ ማላ ጃማን ዳቡሪደ ደምያ ላኡ ኩሽያፐ፥ ዎፓን ደምያ እት ኩሽያ ዳሬ።7ቃይ ታን፥ ሳሉዋ ጉፋንን መላ ግደዳዋ እት ሀራባካ በኣድ።8ሄዌካ እት ባረካ ዴእያ ብታንያባ፤ አዉ አቱማ ናአይ ዎይ እሽ ባዋ። ሽን እ ዳቡርያ ዳቡራዉ ዛዋይ ባዋ፤ ቃይ ባረዉ ደእያዋን አለና። እ ባረካ ባረና ኦቺደ፥ “እ ታ ሀዋ ኦሲ ዳቡራይታ? ታና ታ ሁጲያ አያዉ ናሸቻ ድጋይታ?” ያጊደ ኦቼዳ። ሄዌካ ቃይ ሀዳባነ ቱጋ ደኡዋ።9እቱዋ ግድያዋፐ ላአ ግድያዌ ሎአ፤ አያዉ ጎፐ፥ ኡንቱንቱ ኦሱ እቱዋዋፐ አደ፥ ሎኦ አይፍያ እማናዉ ዳንዳዬ።10ቃይ፥ ላኡዋፐ እቱ ኩንዶፐ እቱ ደን፤ ሽን ባረካ ደእያ ኡራይ ኩንዶፐነ አ ደንያዌ ባይና ድራዉ፥ አዉ አየ አና!11ሜጎ ዎድያን ላኡ እትፐ ግሶፐ ሆኤ፤ ሽን ባረካ ግስያ ኡራ ሀቃፐ ሆአናዉ ዳንዳዪ?12እት አሳይ ባረካ ተአናዉ ዳንዳየና መቱዋ ላኡ አሳቱ እትፐ ኤቀቲደ፥ ተአናዉ ዳንዳዪኖ። ሄዙ ኩን ዶቀቴዳ ዎዶሩካ ኤለ ዱጸና።13ሎኦ ዞርያ አከና ጭማ ካትያፐ ህዬሳ ግዶፐነ፥ አዳ ኤራንቻ ያላጋይ ኬካ።14አያዉ ጎፐ፥ እ ሄ ህዬሳ ግድያ ሳኣፐ ደንዲደ፥ ዎይ ቃሾ ጎልያፐ ከሲደ፥ ባረ ቢታን ካተ ግድያ ሳኣ ጋካናዉ ዳንዳዬ።15ሳሉዋ ጉፋንን ደእያነ ሀመትያ አሳ ኡባይ ካትያ ካዉተ አራታ ላትያ ያላጋ ካልያዋ በኣድ።16እት ካቲ ሞድያ አሳይ ፓይዱ ባይና ጮራ ግዳናዉ ዳንዳዬ። ሽን ካዉታፐ እ ክችያ ዎደ፥ እ ኦዳባዉ ኦንነ አ ጋላተና። ሄዋ ድራዉ፥ ሀ ኡባይካ መላ፤ ጫርኩዋ ኦይቃናዉ የደርስያባ ማላ።The Word for the World International