ኤራንቻ3

ኡባባዉካ ዎዲ ደኤ

1ኡባባዉ ዎዲ ደኤ፤ሳሉዋፐ ጋርሳ ባጋና ኦሰትያባዉ ኡባዉ፥አ ላይይ ላይይ ደኤ።2ሄዋ ድራዉ፥ የለታናዉ ዎዲ ደኤ፤ሀይቃናዉካ ዎዲ ደኤ።ቶካናዉ ዎዲ ደኤ፤ቶኬዳዋ ሾዳናዉካ ዎዲ ደኤ።3ዎናዉ ዎዲ ደኤ፤ፓናዉካ ዎዲ ደኤ።ኮላናዉ ዎዲ ደኤ፤ቃይ ኬጻናዉካ ዎዲ ደኤ።4ዬካናዉ ዎዲ ደኤ፤ሚጫናዉካ ዎዲ ደኤ።ካዮታናዉ ዎዲ ደኤ፤ቃይ ናሸቲደ የጻናዉካ ዎዲ ደኤ።5ሹቻ ላላናዉ ዎዲ ደኤ፤ሹቻ ሺሻናዉካ ዎዲ ደኤ።ቆመታናዉ ዎዲ ደኤ፤ቃይ ሻከታናዉካ ዎዲ ደኤ።6ኮዪደ ደማናዉ ዎዲ ደኤ፤ባይዛናዉካ ዎዲ ደኤ።ሺሽ ኦይቃናዉ ዎዲ ደኤ፤ላላናዉካ ዎዲ ደኤ።7ፔናዉ ዎዲ ደኤ፤ስካናዉካ ዎዲ ደኤ።ጮኡ ጋናዉ ዎዲ ደኤ፤ቃይ ሃሳያናዉካ ዎዲ ደኤ።8ዶሳናዉ ዎዲ ደኤ፤እጻናዉካ ዎዲ ደኤ።ኦላዉ ዎዲ ደኤ፤ሳሮ ዎዲ ደኤ።
9ያትና፥ ኦሳንቻይ ባረ ዳቡሬዳ ዳቡራፐ አያ ዎያ ደሜዴ?10ታን ቃይ፥ አሳ ናናቱ ዳቡሪደ ኦና ማላ፥ ጾሳይ እሜዳ ገዲ ሎይ ዴጾ ግድያዋ በኣድ።11ጾሳይ ኡባባ አ ዎድያን ዎድያን ሎይደ ኦዳ። ጾሳይ አሳ ዎዛናን መናተ ኦዳ፤ ሄዋ ግዶፐነ፥ ጾሳይ ኦዳዋ ኡባ ኮይሩዋፐ ዉርሰይ ጋካናዉ፥ አሳይ ዉርሲደ ኤራናዉ ዳንዳየና።12ሄዋ ድራዉ፥ አሳይ ባረ ደኤዳ ላይን ሎእያዋ ኦያዋፐነ፥ ናሸትያዋፐ አያዌ አያይነ ባይናዋ ታን አኬካድ።13ቃይ፥ አሳዉ አዉ አ ዳቡራዉ ዋጋ ግድያዌ ሙሳንነ ኡሻን ባረና ናሸችያዋ፤ ሄዌካ አዉ ጾሳፐ እመቴዳ እሞታ።
14ጾሳይ ኦዳዌ ኡባይ መናዉ ደእያዋ ግድያዋ ታን ኤራድ፤ እ ኦዳዋ ቦላን ጉጃናዉ ዎይ አፐ ሃ ጉናዉ ዳንዳየተና። ጾሳይ ሄዋ ኦዳዌ፥ አሳይ ባረዉ ያዪደ ቦንቻናሳ።15ሀእ ሀኒደ ደእያባይ ዎይ ስንፐ ሀናናዉ ደእያባይ ኡባይ ካሰ አዳ ዎድያን ሀኔዳዋ፤ አያዉ ጎፐ፥ ጾሳይ ካሰ ሀኔዳዌ ዛር ዛሪደካ ሀናናዳን ኦ።

ሀ ሳኣን ፕርዳይ ጌላቴዳባ

16ቃይ ታን፥ ሳሉዋ ጉፋንን ጌሻ ፕርዳ ሳኣን ኢታተይ፥ ጽሎተ ሳንካ ናጋራይ ደእያዋ በኣድ።17ታ ዎዛናን፥ “ጾሳይ ጽሉዋነ ኢታ ላኡዋካ ፕርዳዉ ሺሻና፤ አያዉ ጎፐ፥ ጾሳይ አላለ ኡባዉነ ኦሱዋ ኡባዉ ዎድያ ኬር ዎዳ” ያጋደ ቆፓድ።
18ቃይ ታን ታ ዎዛናን፥ “አሳይ ዶአቱዋፐ ኬከናዌ ኡንቱንታ በሳናዉ፥ ጾሳይ ኡንቱንታ ፓጬ” ያጋድ።19አያዉ ጎፐ፥ አሳ ግድና፥ ዶአቱዋ ግድናካ፥ ኡንቱንቱ ካጫይ እቱዋ፤ እቱ ሀይቂያዋዳን፥ የንኩካ ሀይቄ። ቃይ ላኡካ እት ጫርኩዋ ሸምፒኖ፤ ሄዋ ድራዉ፥ አሳቱካ ዶአቱዋፐ ኬክክኖ፤ ሄዌካ መላ።20ኡንቱንቱ ላኡካ እት ሳኣ ቢኖ፤ ላኡካ ቢታፐ መቴዳ ድራዉ፥ ቢታዉ ስሚኖ።21ያትና፥ አሳ ሸምፑ ሳሉዋ ፑደ ከስያዋነ ዶአቱዋ ሸምፑ ቢታ ጪማዉ ዱገ ዎያዋ ሻኪደ ኤራናዉ ዳንዳይያዌ ኦኔ?22ሄዋ ድራዉ፥ አሳይ ባረ ኦዳ ኦሱዋን ናሸትያዋፐ ኬክያዌ ሀራባይ አዉ ባይናዋ በኣድ። አያዉ ጎፐ፥ አዉ ደእያ ሎኦ ካጫይ ሄዋ ጻላላ። አስ ሀይቂ ክቾፐ አፐ ጉይያን ሀንያዋ በሳናዉ፥ አ ሀይቁዋፐ ጉየ አሀናዉ ዳንዳይያዌ ኦኔ?

The Word for the World International

https://app.library.bible/content/812ecd29a9e60fdc