Faarotikaa Maxaafa30

Galatiinxa Soodachcho

(Galmiinxe Eebba'a Faarsendeexxa Daawwitixxa Faaro)

1Ee, Duuchchi Woddike Goottaa! Dhi'mo balenaa'n anee gatise'e naaphi ane'n gammadabaashsha assittetexxeeatee lummisee galateeffataannen.2Ee Duuchchi Woddike Gootta anke Magenoo! Anee gargaartota'a atee soodateennen;atinna anee fayyissete.3Ee Duuchchi Woddike Goottaa! Reyotenaa'n anee fulchittete;hiireesiinxe balenaa'ninna anee gatissete.4Duuchchi Woddike Goottike arda kaddineek, Duuchchi Woddika Gootta faaroti saadde;isika woyyichcha summanna galateeffate.5Mufe isixxi shiixxoxxe yanna'aten;Elle isixxi kinni hedhotike bari duuchchi'aten; hashsha oodhishshate kaddoolegorsa kinni gammashshote kadda.
6Yaane ani'a eldee'naa udenne wodda«Haranga lele'mabe'no» hiyyenne.7Ee Duuchchi Woddike Goottaa! Ati ani'a eldette wodda le'mitammabaaxxekoobashsha anee jabake assittete;dudduro ane'n wirri hittete wodda kinni alayyenne.8Ee Duuchchi Woddike Goottaa! Ani atee ye'edhenne;ani'anna marartota'a atee soodatenne.9Ani reyonnole maa alfittatoo?Reyonnole maa la'o hexxe?Reyeek manni atee galateeffataata?Xuurameessumma atixxa haaso'aata?10Ee Duuchchi Woddike Goottaa! Ani'a marartetexxi soodachcho anxa laqi;Ee Duuchchi Woddike Goottaa! Anee gargaar.11Ati gadda anka sirbake'n jijjiirtetten;dooniyya seemma anenaa'n mulqitette'egammashsho ane'n oddeesitette.12Yoona ani sammi hiyyabe'non ate galatiinxe faaronni sadannon.Ee Duuchchi Woddike Gootta anke Magenoo!Ani duuchchii wodda ati'a galata uwwannon.

The Word for the World International

https://app.library.bible/content/2b894378475c6aea