Nehimiyakaa Maxaafa13
Nehimiya Isira'eelika Arda Alagaa Ardanaa'n Gargar Hiisse
1Eettene barra'n Muuseka Maxaafa haafura gikki assineexxi ardi laqaa'na haaseessine; Amoonitonna kadi Mo'aabito Mageniinke ardixxe buki'n hara e'yinabaashsha hiyyaki borreesemeeki borreessi afemen;2Tinni kadeechchi Isira'eeli itatinna wodi'iki qophedhatixxa bakka, Bele'aami insa'nee badino'a maallaqiki hidhdhineemmaxxeeteni; kaddo male'e Mageni no'oki yowwichcho eebbate asse.3Ardikinna konnee seera laqeexxa yanna, alagake kadeeka duuchcha Isira'eel giddii'n gargar hisse.Nehimiya Asseexxa Haaronsa
4Edi wodda no'oke Magenika miyuwwiinke minike akeekisanjo kade'e hariiremeemmaki qeesichcho Eliyaashibitemmani; isinna Xoobiyanni welti jaba qicinni jaalomeexxi,5konnechchi edo midhatika tolcha, hixaana, galmiinka miyyuwa, midhatixxa uuwwanna, Leewwitotike, faarsaaleeyyetenna hula heqqammakeri'a ajajendeexxa haaroxxa woyinenna zayite qeeseteenna iyyedangaammaxxa uuwwa ugginaammaka lumoka miyiinka mine uwwemmani.6Tinn duuchchi kaddaa wodda ani Iyyerusaalemi hedheennabaani; yane kinni Arixxeekisiissi Baabiloonike moyanjo kadeechchinni sase tommenna langaxxe wogga'n moyanjiinbaa hige mareennani. Shiixxoxxe yanna uduma moyanjo eeti laqedhennexxi,7Iyyerusaalemi'a higenne; ookkonna Eliyaashib Mageniinke minike ba'linanaa'n Xoobiyaa mitte hedhaaxxa kutta uwweexxi hujeexxa elobaaxxa huje ege'nenne.8Aninna yo'oshsha yaadenneni; Xoobiyake mine'n hedheemmaka miya duuchcha kuta giddii'n gadhi'a fulchenne.9Kutuwwatanna ca'a assendo'a ajajenneni; ookkoneechchi uduma Mageniinke minka miyuwwa, midhatixxa uwwanna hixaaniki welti mini'a hiisse uggenneni.10Ittanni Leewwitotee uwwemaammaka qoobbo uuneemmabaaxxanna Leewwitotinna faarsaaleeyye insa'nee uuddaammaxxa ergatensha waaldeexi ifi fike fichchibaa me'iteexxa wo'me.11Tennexxe Ja'laabuwwa xixennexxi «Mageniinke minixxe huje'n ga'ma'm hitineechi mayeete?» hiyye insa'nee qorenneni. Ookko'ninni insa'nee mitteba bukki assennexxi insa'ne'a uwwendeemmaxxe huje huje'n hingaashsha assenneni.12Yihudiinki manni duuchchi midhatika, harooxxe woyinekanna zayitetixxa tommitte miyuwiinke minibaa aassine.13Miyuwiinke minuwwi'a qeesichcho Selemiyanni, borreessanjo Saadooqinna Fedayate hinaaka Leewwichcho akeekisanjuwwake asse hariire hunjashsha assennene; ittanni Metaaniyaka belto Zekkurika belto Hanani'i tuke insa'neexxe assenne; yaane kinni kunn manni addatemeekemmani. Huje insa'neexxinna dayyuwwa insa'neekee geyaachcho qoodatemmani.14Anike Magenoo tenne yaane'a anee hedi; anike Mageniike mini'anna ergatenshatee hiyye addatenshati assennexxa balleessitoxxe.15Eettene barruwwa'n Yihudi giddo edi sanbatinxe barra'n woyine hirbeessat miicaaka, midha assedhakanna, woyinetixxa booka, woyinetixxa rodde, Balasetixxanna wele gargar gargar hexxeexxa ba'o duuchcha harrete'n fe'aaka manna uudenneni; konnechcho duuchcha Iyyerusaalemi'a e'inshaammaki edike sanbatinxe barrammani. Tennexxee eettenee barra ita gurgurrabaashsha insa'nee hoyyenneni.16Iyyerusaalemi hedhammaki Xiroosiki manninna Qulxxu'menna gargarti hedheechcho edike sanbatiinxa barra iyyedanga'n Yihudiinke ardi'a Iyyerussaalemi gurgura'nemnani.17Aninna Yihudiinke Ja'laabuwwa'n mufatenexxi hiyyenne qici, «Edika Sanbata battoonsitine tinni hujina'neexxi elobaaxxi huje maachcho?18Ediki annuwwi ha'nooki hujeexxi tennendemmaba? Mageni no'oki tenne ba'ne duuchcha no'o'ninna konne qachcha'n iyyedageechchi tenne ballessa no'oxxeeteba? Ta'anna ha'no edika sanbata battoonsati tennee saxxeexxa rakko Isira'eeli'ni iyyedaginaani» hiyyenneni.19Soodi sanbatake hina'na'a Iyyerusaalemixxe huluwa'n bogi siphphi siphphi hiyyaamma wodda huluwwa cufendaashshanna, sanbati sa'aa qico'n banedabaashsha ajajenneni; edika sanbatinxe barra'n feenechchi e'yabaashsha anike mannanaa'n mitte mitte hula hula'n uurrisenneni.20Gargarti hedheeka miyuwwa daddaldammaxxi daddaltonna gurgudhdhaammakiri Iyyerusaalemi gadho mitte yookaan lame yanna galeeni.21Aninna kinni «Dalla'in gadho galdina'neechchi mayete? Iitta hexxeexxa yaane langaxxa assitinoole hunnati ha'no'ni ke'annoni» hiyye insa'nee xexxe'achchiisenneni; insa'nenna eettene yannanaa'n edike sanbatinxa barra dangebaan.22Ookkoo'ninna Leewwito ifi ca'a assexxe, marreexxi dalla'inxa hula heqqinashshanna sanbatiinxa barra woyyonsinashsha insa'nee ajajenneni.Ee, anke Mageno; tennexxe anee hedi; atixxe lumooxxe jaalalaxxe birasa'nenni ani'a gattoowwaal hiyyi.23Eettene barruwwa'n Ashidoodixxa, Amoonixxann Mo'aabitotixxa melaalle Ayihudiinka manna aadheexxa womenne.24Oose insa'nexxi giddii'n gamisi Ashidoodika, yookaani wele mannika laagada malee Yihudiinka laagada haaso'a dandeetaammabaani.25Aninna mufatennexxi insa'ne badine; iittanna xixenne; welekanna ganenneni; umo insa'neekanna fooxenne. Mageniinke summinni hiyya'n kakachchiisenne qici, «Dubarra ha'nooka insa'neexxe labbaxxe oose'a herunsiissinoqqe; dubarra insa'nekanna labbaxxe ha'nooxxe oose'n aadhissinoqqe.26Isira'eeliki moyanji Solomooni cubbo hujeeki iitta fakkattaaxxe aadhanaa'n kexxeexxebaa? Heddi moyanjuwwi giddii'n isishsha hedheeki moyanji hedheemmabaani; Magenoke'ninna eeyyemeekemmani; Mageninna Isra'eeli duuchcha'n moyanjoke asseeni. Yaane kinni alaga melaalle iso'o cubbote'n ibiseeni.27Ha'noonna kinni alagiinxa melaalle aaxxine tenne fakkaattaaxxa lumoxxa balleessa hujine Mageno no'oke addatema gopha ha'nooxxa no'o laqiyyo hasissamma?»28Qeesetike akeekisanjiki Eliyaashibiki belti Yoyada'ixxe oosenaa'n mitti Horoonichchi Senbalaaxik balli hedhemmani; aninna isoo ani birii'n shorrenneni.29Ee, anike Mageno, kunni ardi qeesumma, qeesummatixxa aadanna ati Leewwitotee aaggeettaxxa kakko battoossineexxa uudi!30Tennexxe qeesenna Leewwito alaga battummanaa'n ca'a hinaashsha assenne; mitti mittingixxa huje gargar foyeenexxi huje huje insa'neexxe'n uggenne.31Ani murendeexxe yanna'n bukki assinaaxxe giiratixxe haqqexxenna umiinxe midhaxxee'e seera uggenneni.
Ee, anke Mageno elle atixxinni anee qaabbati.
The Word for the World International