Read Nehimiyakaa Maxaafa 12

Nehimiyakaa Maxaafa12

Qeesoletanna Leewwito

¹Selaatiyaalike belti Zerubaabeelinna Iyyaasunni welti higgeexxi qeesenna Leewwito konneechchinni butti'a hedheeken;²Seraaliyya, Erimiyaasi, Izira, Amaariya,³Meluuki, Haxuushi, Sekeniya, Rehuumi, Meriimooti,⁴Iido, Ginetoon, Abiya,⁵Miyaamini, Me'adiya, Biliga,⁶Shemaya, Yeyoraabi, Yida'iya,⁷Selu, Amooqi, Hilqiyaasinna Yida'iya.
Insa'ne Iyyaasuke baro'n qeesetikenna dayyuwwa insa'neekike akeekisanjuwwammani.

⁸Leewwito kinni Iyyaasu, Biniwwi, Qadimi'eeli, Seeraabiya, Yihuda, ittanni dayyuwwi ifikini welti galatiinxe faaroke akeekisanjo kadeeki Maataaniyatemmani.⁹Dayyuwwa insa'neeke kandeeki Baaqibuqiyanna Uniimi ergatemma wodda insa'neeke gama'n uurina'emmani.

Umo Qeesichcho Iyyaasuxxa horte

¹⁰Iyyaasu Yo'aaqimi'i i'le, Yoyaaqimi Eliyaashibii'i i'le, Eliyaasebi Yoyada'i i'le,¹¹Yoyada'i Yonaataani i'le, Yonaataaninna Yaadu'a i'le.

Qeesetixxe Gosaka Akeekisanjuwwa

¹²Yoyaaqimike baro'n qeesetike mini hadiki akeekisanjuwwi konnechchinni butti'a hedheekeni,Serayake mini hadonaa'n, Miraya,Ermiyaasike mini hadonaa'n, Hanaaniya,¹³Izirake mini hadonaa'n, Mesulaami, Amareyake mini hadonaa'n, Yihohaanaani,¹⁴Mulukike mini hadonaa'n, Yoonaataani, Sebenyake mini hadonaa'n, Yoosefi,¹⁵Hariimike mini hadonaa'n, Adinna, Merayootike mini hadonaa'n, Helqayi,¹⁶Adoke mini hadonaa'n, Zekkariyasi, Ginetonike mini hadonaa'n, Mesulaami,¹⁷Abiyake mini hadonaa'n, Zikir, Miniyaaminikenna Mo'aadiyake mini hadonaa'n, Felxxayi,¹⁸Biligake mini hadonaa'n, Saamusi, Shemayake mini hadonaa'n, Yonaataani,¹⁹Yeyoraabike mini hadonaa'n, Metinayi, Yodaheke mini hadonaa'n, Aazi,²⁰Salayike mini hadonaa'n, Qalayi, Amooqike mini hadonaa'n, Eebeeri,²¹Hilqiyaasike mini hadonaa'n, Hashabiya, Yodaheke mini hadonaa'n, Natina'eeli.

Qeesetikanna Leewitotike Mini Haduwwika Summuwwa

²²Eliyaashibike, Yoyada'ike, Yohananikenna Yadu'ake baro'n Leewwitotinke mini hadiki akeekisanjuwwinna qeese, Faarsiki Daariyoosi moyeemmake baro'n borreessemeemmani.²³Leewwitotixxe sannuwwa giddii'n Eliyaashibike beltika belto kadeeka Yonataani qico'n hedheeki mini miniki akeekisanjuwwi wabeekotike Maxaafi giddo borreeseemeemmani.

Woyyichcha Galm Giddika Ergatenshatika Qooddo

²⁴Leewwitotiki akeekisanjuwwi Hashabiya, Seeraabiya, Qedmi'eeliki belti Iyyaasutemmani; insa'nenna dayyuwi insa'neeki gama'n he'neexxi Mageniinki manji Daawwiti uwweemmaxxe akeetteshshani bado badoti adhdhina'ni galatakanna faaro shiqinsha'nemmani.

²⁵Woyyichcha Galmike dalla'iinxe huluwwa bira hedheeka miyuwwiinka minuwwa heqqaaki heqqanjuwwi kinni Metaaniya, Baaqibuqiya, Abdiyu, Mesulaami, Xalmooninna Aquubitemmani.²⁶Insa'nenna Iyyooseedeqik belti, Iyyaasuki belti Yoyaaqimi, boga galchammaki Nehimiya, qeesichchonna seeriinka barsiisanjo Izirake baro'n ergatemme.

Iyyerusaalemike Dalla'ixxe Eebbaka Ayyaana

²⁷Iyyerusaalemika dalla'a eebbinse wodda Leewwito galatiinxe faaronni; bilbiliki, kiraarikinna masinqoti meellinni eebbatika ayyaana gammashshoti ulfeessino'a he'neeke bonchonaa'n hasemme Iyyerussaalemi'a dange.²⁸Faarsaaleeyyetanna ittanni Iyyerusaalemi qarqara hedheeke Nexoofitotike ola'anaa'n mitteba bukki assine.²⁹Insa'ne Iyyerusaalemike qarqara'n ifi'anni minuwwa ijaadhdhineemmaxxe faarsaaleeyye iyyedangeemmaki Beetigilgaali'ni, Geba'inna Aziimiti qarqari'niteni.³⁰Qeesenna Leewwito seeriinshanni ifi ca'a assineechchi uduma arda, dalla'akanna huluwwa ca'a assine.

³¹Aninna Yihudiinka akeekisanjuwwa kinjiinke dalla'i hana sa'naashsha assenneni; higeenna galata shiqinsho'a lame jajabba faarsaalleeyyetika qorba qophpheesseenneni. Mitte gamo kinjiinke dalla'i hana middi darree'n «Kora Hunnammaxxe hula» hinaammaba me'ite.³²Insa'ne'a Hoshaa'iyakinna Yihudiinke akeekisanjuwwik gamisi insa'neexxa duuka me'ineeni;³³Duuka insa'neexxa me'ineerikinna Azariyaasi, Izira, Mesulaami,³⁴Yihuda, Biiniyaami, Shemaya, Ermiyaasinna;³⁵ittani malagata abixxiteexxi heenoxxi qeesenna Asaafike beltinni, Zekkurike beltinni, Mikayake beltini, Metaaniyake beltinni, Shemayake beltinni, Yoonaataanike beltinni, Zekkariyasike beltini welti he'nemmani.³⁶Dayyuwwi insa'neeki Shemaya, Ezeri'eeli, Milaalayi, Giilelayi, Me'ayi, Natina'eeli, Yihudanna Hanaani Mageniinki manji Daawwiti ajajemmashshanni faarotika miyyuwwa adhdhine me'ine; gogeessa akeekammakinna seeriink barsiisanji Iziratemmani.³⁷«Muummetixxe Hulabaa'n» ke'neexxi toggi hine'e Daawwitike qachchibaa qabante; ookkoo'ninna dalla'akenaa'n gadhi'a fullammaxxe hulabaa'n me'ineexxi Daawwitike mini aligamii'n boroti darre'n hexxeexxe wodi'inxe muummebaa me'ine.

³⁸Langaxxi faarsaaleeyyetik qorb bita'i darre'n me'ite; aninna gamisi ardinni welti hedhe kinjiinke dalla'anaa'ni Itoonika Dalla'a sa'eneexxi Ba'lake Dalla'i qico'n insa'neexxa duuka me'enneni.³⁹Ookkoo'ninna Efireemixxe hula ali darre, dullatte hulabaa'n, qulxu'metixxe hula, Hanaani'eelike Dalla'ibaa'n, dhibba geltaaxxe hulabaa'n sa'e «Gedhebiinxe Hula» qico'n duuka insa'neexxa me'enneni. Insa'nenna «Heqqanjuwwiinxe Hula» bira genneexxi uurrine.

⁴⁰Konne qicinni galata shiqishsheexxi lamiinxi faarsaaleeyyetixxi gamuwwa Mageniinke mine'n booncho abixxine; aninna gamisi ja'laabuwwinni welti booncho abixxenneni.⁴¹Itanni qeesichchi Eliyaaqeemi, Me'iseeya, Miiniyaamini, Mikaya, Eliyo'eenayi, Zekkariyasinna Hanaaniya malagatuwwa abixxineexxi,⁴²Me'iseeya, Shemaya. Ali'aazaar, Aazi, Yihonaani, Melikiya, Elaaminna Etseer bakka bakka abixxine; faarsaaleeyye Yizirhiyaxxe akeekisanjummanni faarsite.⁴³Mageni insa'nee yo'oshsha gammandaashsha asseemmaxxee eettene barra gammanda'n heddo tolcha shiqinshe; melaallenna oose ittanni gammande; tennenaa'n kexxeexxa Iyyerusaalemi giddo hedheemmaki gammashotiki haafuri bayyi qico'n laqisa'nemmani.

Woyyichchi Galmixxe Ergatensha'a Shiqqeexxa Uwwaara

⁴⁴Etenne barra'n uuwwa, midhatika umonna tommitte massinaaka miyuwwiinka mine heqqaaka manna hariirre. Insa'nenna qachchuwwi qachchuwwiinke qarqara'n hedheeka huccinaaka fichchuwwa seeri ajajaammashshanni qeesetikanna Leewwitotika qoobbo miya massinammake minibaa iyyedaga hasissaammani; Yihudiinki manni ergatenda'neexxe qeese'ninna Leewwitote'n gammande.⁴⁵Insa'nenna Faarsaaleyyenna hula ookkone heqqammakaara, insa'neke Magenixxa aada ca'a assatixxa aada Daawwitinna belto isike Solomoonishsha ajaja heqqe'ne.⁴⁶Edike baro'n Daawwitikenna Asaafike baro'n Magenokee shiqqaaxxa saadinotixxanna galatiinxa faaruwwa akeekkaammaxxe faarsaaleeyetike aakekisanjuwwaman.⁴⁷Zerubaabelikenna Nehmiyake baro'n Isira'eeli duuchchi faarsaaleeyyetenna hula heqqaamake'ria barra barratika qoobbo uta'nemmani; wele Leewwitotika qoobbonna qofinni uggina'nemmani; Aaroonixxe sanne kadeeke Leewwitoti'anna geyaaka qoobbo insa'ne'anna uggina'nemmani.

The Word for the World International

https://app.library.bible/content/2b894378475c6aea