Issayaasikaa Raaga26

Injifachchotixxa Faaro

1Ettene barra tinni faaro Yihudiinke boga'n faarsendaan;No'o jabaka qachcha anfeennen;Mageni no'ok konne qachchika dalla'annaa kolluwwa,anjireshsha no'oxxe asseen.2Amana ifixxa heqqedheekgosa gosak qullichchi ardi e'yaashshagosa gosak ardi'a qachchiinxa huluwwa banne.3Duuchchi Woddike Gootta amandeemmaxxeeAtee irko assexxaaxxe lubbo'awo'ma nage'a uute isee heqqexxatton.4Duuchchi Woddik Gootta duuchchi woddi'a adde assedheDuuchchi Woddiki Gootti duuchchi woddixxe no'oxxe irkon.5Ulfateeke booncho'n hedhaaka manna salphisaan;lummedheeka qachcha diigaan;findigeexxinna buttiinki buttinake assaan.6Miicememmaki manninna hana mammaremaan;lekka ifixxenninna hirbeessinaan.7Duuchchi Woddike Gootta! Qulliyyeetika ora giissitatton;hodhdhichcha insa'neekanna qajelchitatten.8Duuchchi Woddike Gootta, seera atika heqqe'na'ni atee addantannen.No'oxxixxi halcha lumminne atika ardake'ni ege'nemaashsha assiyyoten.9Ati murte buttate'n uutattoxxa yannabuttatiki arduwwi qullumma barataan.Lubbo anxi hashshanna atee yortaan;giddixxe qalbenni atee hasanneen.10Fuggaalleeyyetee eloxxi assendoolenna middequllumma barantabaanTenne qullumma wo'miteexxe butta'n he'naa'nfuggoxxa huja waalabaan.Duuchchi Woddike Goottika lumminenna qaabbantabaan.11Duuchchi Woddike Gootta, xixxotta'a hirre atixxa iimi'a ke'issitetten;atee jibbaaki manni isee afabaan;Arda atike hitteexxa hinaaffe affettexxa uudeexxi salphatowwaal;naaphuwwa atike qophpheessitettexxe giiraa'n ba'nowwaali.
12Duuchchi Woddike Gootta, nage'a no'o'a bira sa'issiteten;huje no'oxxa duuchcha muuxxetteki ateten.13Duuchchi Woddike Gootta no'oke Mageno,ati gadho wele lumooxxi akeekanoole no'oo galchiteen;yaane kinni atinge summa calla ulfeesinaanneen.14Ta'a ikki duuchchingi reyen; hinge hedhoti he'nabaan;hinge ke'nabaan.Atinna insa'nee xixxeten insa'ne kutti assitetteninsa'ne qaabbatemmabaashsha assitetten.15Ee Duuchchi Woddike Gootta gosa gosaka arda bira sa'issitettegosaka arda bira sa'issitetteAtinna ulfaatettenbogi duuchchixxa gabala ba'lissetten.16Ee Duuchchi Woddike Gootta! Rakkantee wodda atiba dangeatinna insa'nee xixxette woddainsa'nenna atibaa soodachchote'n ke'ne.17Ee Duuchchi Woddike Gootta! Ciniinfattaxxi manjichcho ila shiqqaa woddaciniintoti rakkattammashshanna raartammashshan,no'onna ati edo iittanni kandeennen.18No'onna siila'witeexxe melaalleshsha siila'winennen, ciniinfante rakkanten;yaane kinni illenneki finni hedhebaan;Boga no'oke'n anjirensha iyyedangebe'nonbutta duuchchika ardanna illebe'non.
19Yaane kinni renne ke'neexxi hedhotike kandaan;renshi insa'neekinna ke'aanHa'no moogendine bale giddo hexxina'neek,kexxine gammashshotixxa faaro faarse!Atik woji bariisik fixeensiinshatenMageni lumooxxa yanna edo reyemmak manni ke'ehedhoti hedhaashsha assaan.

Murtenna Boji'emmeebaa'ni Higa

20Koo anke arda ke'i mine atikiba e'yi,e'yitine hulatanna culfe;Mageniinxi mufe saxxaa qico'nshiixxoxxa yanna ifi sho'we,21Buttate'n hedha'neek ardi hujemmaxxe cubbo'a mura woxisatee,kunnise Duuchchi Woddiki Gootti iimike galduma ifikenaa'n dagaan;Eettene yanna butta ise'ni hana dunedemmaxxa munde farri assite leellishshan;shiyemeemmaka ta'anni edi'a butta shoxxabaan.

The Word for the World International

https://app.library.bible/content/2b894378475c6aea