Issayaasikaa Raaga25

Galatiinxa Faaro

1Duuchchi Woddike Gootta! Ati anke Magenon;atee lummisaannen;summa atikanna galatefatannen;Ati haranga mambe'a kaddeexxa yaane assiteetten;sirendenaa'n ke'issite heddettexxa duuchcha,hara addachchiisaake orinni muxxetten.2Qachchuwwi diigeme onake kadaashsha assitetten;kolluwwa insa'neexxa diiggetten;Naphuwwi no'oki ijaaremmaka galchatika minuwwa hedhemmabaashsha kadeen;duuchchi woddi qico'n langaxxa ijaarabaan.3Jajjabba gosaaki ardi atee ulfeessaan;mararte affebaaxxe gosake qachcha'n hedhaaki duuchchi atee sodaataan;4Hiyyeeyyetee, irkorakkantaa wodda rakkiyyeetee gollaHobonbalte gollantaak;arishshotike holati'aanna gaaddisake kaddeetten;Mararte afebaake mannike hafuurgimote'n mare ganedammaxxe hobonbalteshshaten.5Insa'ne gammoojje hedhammake eebbinjishshaten; arda miinaani;Algiinxa raarenna bucuqqii kuttatton;eebbinji duumanchike gaadissinni qiidammashshamararte afebaake mannixxi faaronna iittanni sammi hitaan.

Mageni Jabaxxa Ita Qophpheessaan

6Dada Duuchcha Ajajaak Duuchchi Woddiki Gootti tenne Tsiyoonixxe kooba'n hedheen;ardi duuchchi lumoxxa ita ha'watixxa jilafuldeexxa woyinetixxe bookaxxa jilaha'yo maalannaa filendeexxa woyinetixxa booka qophpheessaan.7Tenne kooba'nardi duuchcha'n buyyemeeka seemmatika golomootummuwwatanna diriissemeeka buyyisanjo balleessaan.8Isi reyotixxa hunna duuchchi woddi'a balleessaanLumok Duuchchi Woddiki Goottimitti mittingixxa indiddo fiyaan;Arda isike'ni hedhemmaka shookobutta duuchchanaa'n hoyyaan;tenne hiyyeeki Duuchchi Woddike Goottan.
9Eettene barra ardi duuchchi hiyyaa qici,«Kunnise no'ok Mageni iitta hedheekeniso'ni amanenenni; isinna no'o anjireenDuuchchi Woddik Gootti konneden; no'onna iso'ni amannenenanjire isixe'ninna gammando; ililinso!» hinaan.

Mageni Mo'aabii Mura woxisaaxxa

10Duuchchi Woddiki Goottixxi anga tenne Tsiyoonixxe kooba'ni ofldaan;yaane kinni buuyyichchi dhoqqeti welti hirbeesemammashshaMo'aabik ardinna iittanni hirbeesemaan.11Wode'e daakammaki anga banammashshainsa'nenna giddo he'ne anga ifixxa bannaan;Yaane kinni Mageni insa'neexxe hujexxe shokkonni sobemebaangiholla insa'neexxa salphisaan.12Isinna Mo'aabixxa lumoxxa kinjiinxa kolluwwadiige salphisaan;Butti'a aadheexxihuurake'ni hunaan.

The Word for the World International

https://app.library.bible/content/2b894378475c6aea