2 Ximotoosi'a2
Kiristoosike Xuurameessa Loliinke Manjo Kaddati Rakko Adhdhaa
1Yoona anke belto! Yessuusi Kiristoosi'ni hedheeke badhaadha'ni jabaati!2Heddo dhugaa kula edo anenaa'ni baratettexxa yaane duuchcha wele manna barachchiisa dande'a afeeke xuurameessa manna'ni maganne sa'isitetexxi uwwi!3Atinna Yessuusi Kiristoosike eloke loliinke manjo kaddettexxi aninni welti rakko adhdhi.4Duulo fulaak duuchchi ifika ajajallo gammachchiiso'a hedaa malee wele yaanenni abidemaabaan.5Iittanni gongichchiinxe hokkoke'ni e'yaaki manji seeriinsha hokkokisa gopheexxe kaddoole injifachchotika kallachcha alfabaan.6Hujete'n elo'aak wiisalli eettene hujenaa'n afendaaxxe gummanaa'ni taakkaba alfaake kada hasissaan.7Ani hiyyannexxa hubattee uudi; Gootti yaane duuchchinxee ati'a qalbeeffachcho uwwo'o!8Reyotenaa'ni ke'eekanna Daawwitixxe sanne kadeeka Yessuusi Kiristoosii'i kassi hiyyi! Ani lallabannexxi wengeele tenneten.9Tenne badhaadhiinxe odonaa'ni kexxeexxa fuggoxxa hujaake manjishsha usuremmanno qico'ni rakkonna abara adhannon. Mageniinki hiyyichchi kinni usuremabaan.10Tennexxee insa'ne Yessuusi Kiristoosi ga'mii'ni afendaaxxa anjiranna duuchchi woddika ulfinna alfinaashsha hiyye'e duuchchiinxa yaane osseennen.11Addatemeemmake kunni hiyyichchi hiyyeemma qici:Isinni welti rennonnole,isinni welti hedhoti he'nannon.12Ti'ni hine he'nonnole,isinni welti moonannon.Isoo waakantoonnole,isinna no'oo waakataan.13Xuurameeyyete kande afema gonphonnoleisi ifi waakata gophaammaxxee,isi xuurameesake kadeeshshanni hedhaan.Jabaka Hujallo
14Manni hiyyichchuwwiinxe buutoxxee weli lolemabaashsha Mageni edo insa'nee xexxe'achchiisi! Iitta hexxeexxi moronsha laqaaka manna balleessitaa malee'e mittechchi'anna la'o affebaan15Dhugaatika Mageniinka hiyyichcho toggi assite barachchiisi! Uwwendeexxe huje'ni shookabaake hujallo kaddettexxi hega uudemmeeka umo atika Magenii edo shiqishatee jabaati!16Mageni ulfatabaaxxe lallabanaa'n bayyati! Tinninna kaddaachchi iitta hexxeexxe lallabanni abidemeek manni Magenokenaa'n bayyata'n me'ammaxxeeten.17Barachchiisa insa'nexxinna fayyammabaake luuxxishshaten. Hemenewoosinna Filixoosi ookkone mannike mannan.18Kunni manni mooggokenaa'n ke'a edo kaddee saxxe'een hiyya'n dhugaatike orinaa'n fulleexxi mitte mitte mannixxa amana lele'misaan.19Yaane kinni «Gootti ifike kadeekaara ege'needheen» iittanni «Goottiinka summa ye'aak manni duuchchi fuggoxxenaa'n bayyatowwaali» hitaaxxi maxxansa afe'eexxi lele'mitabaaxxi Mageniinxi booso ti'nitee hexxaan.20Mitte lumoke minni giddo worqetenaa'ninna sibilijo birrenni giisemeeke miya calla kadebangi haqqetenaa'ninna faarakenaa'ni giissemeek miyinna afeemaan. Ookkone miyi giddii'ni mitti mitti ulfinnakee mitti mitti kinni iittanni futti hiteenxe huje'a hosaan.21Yoona ayyinna tenne haaso'ennexxe yaanenaa'n ifi luqqasseexxe kaddoole isi ulfattaaxxe ergatensha'ni hosaake, woyyichchake, Goottakee la'o uwwaake, eloxxe huje duuchchi'anna qixxeessemeeke miya kadaan.22Dargaggeessummattixxe elobaaxxe gaabenaa'ni bayyati! Mitte godobinni Gootta ye'edhaake manninni welti hexxettexxi qullumma, amana, jaalalatanna nage'a halsi!23Lola iyyedaggaaxxa egendettexxi gowwummatenaa'ninna la'o affebaaxxe moromanaa'n bayyati!24Gootta Yessuusi Kiristoosike erganjo kadeeki manji duuchchiinge manni'a ba'lateeke kadeexxi barachchiisattixxa dande'a afedheekenna ossaammeesake kadiyyo hasisaa malee'e lolema hassissabaan.25Isoo gareeraka manna kinni shaqunteti gorsaake kada hassissaan. Iitta kaddoole akimagaada Mageni aade aagatixxanna dhugaa ege'natixxa yanna insa'ne'aa uwwaan.26Konne orinni insa'ne wodani giddi'a hingeexxi durrisiinxe fonxoronaa'ni fullaan. Durriisi kinni insa'nee abideexxi usudheemalchi isika hasito duuchcha assino'ate kaddeemmaxxee insa'nenna milinqaan.The Word for the World International