2 Ximotoosi'a1
1Yessuusi Kiristoosi darree'n afendeexxa hedhotixxe addachchiisashsha Mageniinke hasitinni Yessuusi Kiristosike ergemallo kadenneke Phawuloosinaa'n ergendeexxa erga.2Eeyyanneke belto anke Ximotoosi'a, Mageno Aabinnaa'ninna Gootto no'oke Yessuusi Kiristoosi badhaadhinna mararte nage'i ati'a kaduuni.
Ximotoosi'a Uwwemeeka Gorsa
3Duuchchi wodda hashshanna barra atee soodachchoti kassi hiyyanno wodda annuwwi ank assemmashsha aninna ca'itte sammonni ergatema'eenneka Mageno galateefataannen.4Indiddo atixxa kassi hiyyaannen. Tennexxee uudennexxi gammadannoshsha hashshanna barra atee uudiyyotee halchaannen.5Ate'ni hexxeexxa dhugaatixxa amana kassi hiyyaanneni. Tinni ate'ni hexxeexxi amana edonni akka'o atixxe'ni Loyidi'ninna ama atixxe'ni Ewwinqe'n hexxemmani; ate'ninna hexxeexxa ege'neennen.6Tennenaa'ni kexxeexxa anga anxa ate'ni hana uggenne wodda ati'a uwwendeemmaxxa Mageniinxa uwwa haaroba ha'ishattoshsha ate'n ege'nishaannen.7Mageni no'o'a uwweeki hafuuri hunnatike, jaalalatikenna umo ifika hiratike hafuura malee'e, soda'atikebaan.8Tennexxee no'oke Goottixxee dhuga kula shookkoxxe'e! Isixxee usuremenneke ane'ninna shookkoxxe'e! Eettene bakka Mageni ati'a uwweexxe hunnanni wengeeletixxee rakkonna abara aninni welti qoodemi!9Isi no'oo ye'eexxi anjire, ifike arda assedheechchi no'oo hunjeennexxe eloxxe hujexxeetebaan, yaada ifikenninna badhaadha ifikenni no'oo anjireexxi woyyoolete kandonnaa ye'edheeni. Kunni badhaadhi, heddi bari edi darre Yessuusi Kiristoosi ga'mii'ni no'aa uwwemeen.10Badhaadhi kunni no'ooka anijrallo Yessuusi Kiristoosixxe daganni leelleen. Yessuusi Kiristoosi reyotixxa hunna balleessexxi wengeelet ga'mii'ni reyo hexxebaaxxa duuchchi woddixxa hedho no'aa ifise.11Magenikinna anee tenne wengeeleke lassallo ergemallonna barachchiissallo assee baallonse.12Rakkotanna abara adhdhenneechchi tennenaa'n kexxeexxeniten. Addatenneki ayyete kadeexxa ege'neennaxxee sodaatabo'non. Ani isonaa'ni adhdheennexxa maganne eettenee barra qico'ni heqqa dande'aaxxa ege'neennen.13Ate'ni barachchiiseennaka dhugaatika hiyyichcho fakkeenniishsha assiteettexxi Yessuusi Kiristoosinni welti anfeenneke mittoommixxa amananna jaalala jabeesitettexxi abixxi!14No'o giddo hedhaake woyyichchi Hafuurixxe hunna ga'mii'ni ate'ni uwwendeemmaxxa eloxxa maganne heqqi!15Issiyake boga'n hedhemmaki manni duuchchi anenaa'ni gargari hegeexxi anee waakateexxa egende'eeten, insa'ne giddii'ni Figeluusinna Hermogenesiir he'neen.16Gootti Oenesifoorike mini hadi'a mararowwaal; Isi anee heddo yanna jajjabeseen, usurensha anixxe'ninna shookebaan.17Roomi'a dagee wodda jabaate haseexxi ani hedhennebaa afe.18Gootti dagaa baro isi'a mararo'o; Ani Efesoonike qachcha'ni hedhene wodda isi ani'a hitta ergatemeexxa ati umo atingeenninna giissite egendeeten.The Word for the World International