2 Saamu'eeli7
Mageni Daawwiti'a Ageexxa Kako
1Moyanji ifike mootummatike mine'ni ti'ni hiyye ofo'lee'nanna Duuchchi Woddik Gootti isike qarqara'ni hedheeke naapha isike duuchchanaa'ni hafuura adhdhiseechchi uduma,2isinna wabeeka Naataani'n hiyyee qici, «Kunse, ani birbirsik ijaarremeeke mootummatike mini giddo hedhaannen; Mageniinki taaboti kinni duunkaani giddo hedha'neen» hiyye.3Naataaninna isoo, «Duuchchi Woddik Gootti atinni welti hedhemmaxxee ati heddettexxa duuchcha assi» hiyye.4Eettene hashsha Duuchchi Woddike Goottiki hiyyichchi Naataani'n dageexxi hiyyee qici,5«Martettexxi erganjo anka Daawwiti'i, ‹Duuchchi Woddik Goottti hiyya'nee qici; ani hedhannoka mine ani'a ijaartattoki atetebaan;6Isira'eelito Gibtseke boganaa'n fulchennexxe barranaa'n techchi qico'ni duunkaana galduma anke assedhee mitte boonchonaa'n wele booncho marene malee mini giddo galebe'noni.7Isira'eelito ardi duuchchinni welti me'ene booncho duuchcha'ni arda anka Isira'eeli'i heqqinaashsha ajajeneka akeekisanuwwi giddii'n mitte, birbinsiinke haqichchinni mayee ani'a mine ijaara gophphete? Hiyyennek meya hedhee?› » no'o'ni hiyye.8«Tennexxe erganjo anka Daawwiti'i hitatto qici, ‹Dad Duuchcha Ajajake Duuchchi Woddik Gootti Mageni hiyya'nee qici; ati horiinxa duuka me'ita'na'a arda anke Isira'eeli galchitotta'a atee ke'issennen; gedhebiinxe allale giddii'ni atee aadhenne.9Martetteke booncho duuchcha'ni ani atinni welti hedhennan; naaphuwwa atika duuchcha ati edii'ni fiisennen; ta'anna summi insa'neeki buttate'ni jajemeeke yo'oshsha lummedheeke mannanaa'ni mittiishsha summa atika lummisannon.10Ifika galdumiimika mine afaashshanna ta'inni elqe'a daaqabaasha arda anke Isira'eeli'a booncho uwwannon; jabeessannon. Konneechchi edo kaddeemmashsha ta'inni elqi'a fuggoki ardi isoo miicabaan.11Arda anke Isira'eeli'aanna akeekisanjuwwa hariirennexxe yannanaa'ni ke'isse assinemmashsha duuchcha ta'anni edi'a insa'ne'n assinabaan; iittanni atike naaphuwwa duuchchanaa'ni atee heqqannon.« ‹Duuchchi Woddik Gootti umi isingenninni mine ati'a ijaara'neexxa ate'ni kula'neen:12Cinde bututtee edike annuwwa atikishshanni lummexxatto wodda atixxa bakka gudeeda atikenaa'ni ilemaaka sanne atixxenaa'ni ke'issannon; mootumma isixxanna kutabelo hexxaashsha assannon.13Anke summi'a mine ijaaraki isoten; aninna mootumma isixxixxa moote duuchchi woddi'a jabeessannon.14Aninna isi'a annake kadannon; isinna belto anke kadaan. Isinna balleessoole kinni manji ganemammaxxe siqqonni isoo ganannon; anni belto ifika halangeti jadhafammashsha aninna iso'o jadhafannon.15Kaddo malee mararte anxa ati edo hedhemmake Sa'oolinaa'n bayyiseneeshsha isonaa'ni bayyisabe'non.16Atik mininna mootumma atixxi ani edo duuchchi wodda kutabelo hexxaan; moote atixxinna iittanni duuchchi woddi'a ti'nite hexxaan.› »17Naataaninna konne duuchchinge waleelaka hiyyichcho duuchcha Daawwiti'ni kule.
Daawwitixxa Soodachcho
18Ookkoneechchi uduma moyanji Daawwiti Duuchchi Woddik Gootti edo hiyyee qici:«Ee dada duuchchike Duuchchi Woddike Goottaa! Tenne duuchcha ani'a assitetteki ani ayyete? Hadi ankinna hoonte kade?19Dada duuchchike Duuchchi Woddike Goottaa tinni ati edo heenoxxe kaddee'nani ati kinni edi'a hexxeexxe atike erganjixxe hortexxee haasotteten; ee dada duuchchike Duuchchi Woddike Goottaa ati adana manjokee itta assitatte hiyotee?20«Ani Daawwiti konneechchi iima maa hiyya dande'anno? Ee dada duuchchike Duuchchi Woddike Goottaa anee erganjo atika atinni egendeettaxxee!21Atike hiyyichchixxeenna atike godobike yaadi'a tenne jabaxxa yaane assiteeten; erganji atike ege'nannoshsha assiteeten.22«Ee dada duuchchike Duuchchi Woddike Goottaa! Ati lumoken! Atishsha hedheeki hara ayyinna hedhebaan mansha no'oxxinni laqeneshshanni atee malee Mageni hedhebaan.23Arda afike kado'a anjireekee, Mageni isi edo me'eeke ardishsha, ifike summi ege'nemaashsha, gosa gosaka ardanna magenuwwa insa'neka ifi edii'ni shorree lumoxxanna sodaachchisaaka mambe'a isi'a assemmaashshanna Gibtsee'n anjiremmashshanni atike Isira'eelike ardishsha buttate'ni hedheeki ardi ayyete?24Arda atika Isira'eeli'i duuchchi wodda ti'ni hiyye hedhaashsha assitette; Duuchchi Woddike Goottaa atinna Mageno insa'neeke kaddeetten.25«Ta'anna Duuchchi Woddike Gootta Magenoo erganjo atikeenna mini hadi'a uutettaxxa addachchiisa duuchchi woddi'a heqqi; haasotteteshshanni muuxxi.26Tennexxe summi atik duuchchi woddi'a Gurri lumoke kadaani. Ookkoneechchi uduma mannikinna hiyyee qici, ‹Dada Duuchcha Ajajak Duuchchi Woddik Gootti Mageni Isira'eelike Magenon!› hina'neen. Erganjo atike Daawwitik mini ati edo ti'n hiyye hedhaan.27«Ee, Dada Duuchcha Ajajaak Duuchchi Woddike Gootta Isira'eelike Magenoo, ‹Ani ati'a mine ijaarannon› hite erganjo atikee ani'a barrise'eten. Tennexxe erganji atiki tenne soodachcho atibaa hunna alfeennen.28Ee dada duuchchike Duuchchi Woddike Goottaa ati Magenokeni hiyyichchi atikinna xuurameesaken; tenne elolla yaane assitotta'a anee erganjo atika addachchiiseten.29Ati edo duuchchi woddi'a tii'ni hiyye hedha ta'anna erganjo atikinna mini hado eebba atixxinni maganneten eebbisi. Dada duuchchik Duuchchi Woddike Goottaa tennee ati umi atinginninni haasotetten; eebba atixxenni erganji atikiki anki mini duuchchi woddi'a eebbisemaan.»
The Word for the World International