2 Saamu'eeli6
Kakotika Taabota Iyyerusaalemi'a Iyyedange
1Daawwiti higgeenna Isira'eelike ardi giddii'ni filemeeka sase tomme kuma manna mitteba bukki asse.2Daawwitinna welti isinni hedhemmaaki manni duuchchi Taaboti hana hexxeexxe Kirubeeli'ni hana ofo'leeke Dada Duuchcha Ajajaak Duuchchi Woddike Gootta Mageniinke summinni ye'emeeka Mageniinka kakotika taabota ookko'ni iyyedagatee Yihudake bogi giddo Be'aale hinaabaa me'ine.3Insa'nenna Mageniinka Kakotika taabota haaroxxe fadhadinxe gaare'ni uggineexxi tullichchake'ni hedheeke Abinadaabike minenaa'ni fulchineexxi iyyedange; fadhadiinxa gaare oonfammaxxi Abinadaabixxi oose Uuzanna Ahiyyo kandaa wodda,4Mageniink taaboti fadhadiinxe gaare'ni hana hedhe Ahiyyo edi edii'ni me'aamman.5Daawwitinna Isira'eeliki ardi hadi duuchchi faaroti, masiinqoti, kiraariki, okolik, bilibilikinna, suusu'leti anfeexxe hunna duuchchinni Duuchchi Woddike Gootti edo shimminsa'emman.6Naakoonniinxe aldu'mebaa gennee wodda koromme gugguffatteemmaxxee, Uuza anga qeerriseexxi Isira'eelika kakoti taabota abide.7Ooza soda'a gophati taabota tuqeemmaxxee Duuchchi Woddike Goottixxi iso'ni mufe iso'n bubbe; tennexxe Magenikinna isoo qoome; Oozanna Mageniinke taaboti bira reye.8Ookkoneechchi uduma Duuchchi Woddike Goottixxi mufe Oozaa qaxa'a assitemmaxxee Daawwiti aare; iikki boonchi techchi qico'n Pereezi Ooza hiyyemee ye'emeen.9Daawwitinna eettene barra Duuchchi Woddika Gootta sodaatemmaxxee, «Duuchchi Woddike Goottik taaboti hitta aniba daga?» hiyye.10Tennexxe Daawwiti Duuchchi Woddike Goottik taaboti'a isinni welti hedhaashsha Daawwitike qachchibaa taabota adhdhe me'atee'e hasebaan; eettenexxa bado welenga ora Gaatike qachcha'ni hedha'neeka manjichcho Abidaarake miniba adhdhe me'e.11Duuchchi Woddike Goottik taabotinna Gaatike qachchike manjichcho kadeeke Abidaarake mine'ni sase agenjo ture. Duuchchi Woddik Goottinna Abiduraanna isika mini hado duuchcha eebbise.12Konne wodda «Duuchchi Woddike Goottike taabotixxe buutonni Abidaarak mini hadinna horateelcho duuchcha Mageni isi'a eebisse» hineexxi insa'nenna Daawwiti'n kulle. Tennexxe Daawwiti ookko'a dirreexxi Mageniinka taabota Abiduurake minenaa'ni Daawwitike qachchibaa lumoxxe gammashshonni aadhe dage.13Iikki Duuchchi Woddike Goottika taabota dukeemmak manni jaanele takkaarro me'ineexxe qixxe'ni Daawwiti mitte jibichchanna mitte ha'yaxxa jabbe tolchaamman.14Daawwitinna layinoti giisendeexxa efuude hidhake'ni ussudheexxi isi afeexxe hunna duuchchinni Duuchchi Woddike Gootti edo burraaqaamman.15Konne qicinni Daawwitinna Isira'eeliki ardi duuchchi qeexala'ni malagata ufuufa'ni Duuchchi Woddike Goottika taabota alalle idange.16Duuchchi Woddike Goottik taaboti Daawwitike qachchibaa e'yaa wodda Sa'oolixxi belto Melkooli maskootette'ni hexxe uuda'nemman; moyanji Daawwitinna Duuchchi Woddike Gootti edo utaala'ninna shimmisa'naa uuddee wodda godobik isoo tuffate.17Ookkoneechchi uduma Duuchchi Woddike Goottika taabota aa'ne dange Daawwiti oteeke duunkaan giddo e'yineshsheexxi isi'aanni qophphesemeeke booncho'ni taabota uggine; Daawwitinna ciincatika tolchanna mittoomiinka tolcha Duuchchi Woddike Gootti edo shiqishe.18Daawwitinna ciincatika tolchanna mittoominka tolcha shiqisheechi uduma arda Dada Duuchcha Ajajatoke Duuchchi Woddike Gootta Mageniinke summinni eebbise.19Isira'eelixxe gamo kadeeke ardi duuchchi'a meyya labbangee mitti mittinge manji'a mitte mitte wodhaamo, mitte mitte guma maalanna mitte mitte woyinetixxe gummaxxa uwwe. Ookkoneechchi uduma duuchchingi ifi ifike minibaa me'e.20Daawwitinna mini hado ifika eebbiso'a ifike minibaa higee wodda, Sa'oolixxi belto, Melkooli isoo qophexxo'a fuldeexxi, «Telcho Isira'eeliki moyanji ja'laabuwwinxe garbituwwa edo woyifulabaake manjishsha saali belo hedhe leellati yo'oshsha ulfaatebaata!» hite.21Daawwitinna isee hiyyee qici, «Eeti atika annanna isike mini giddo hedheeke duuchchanaa'ni anee caalchise Duuchchi Woddike Goottika arda Isira'eeli'n moyanjoke assee ane'e fe'leeke Duuchchi Woddike Gootti edo shimmisannon; ta'anna lebe shimmisannon.22Wele waalinni tenne mannii'ni isi edo ifi heeshi assannon; konne caala ifi salphisannon; yaane kinni summissettexxe garbuwwa edo ulfaatannon.»23Sa'oolixxi belto Melkooli rertaaxxe barra qico'n ildebaan.The Word for the World International