2 Saamu'eeli13
Aminooninna Ti'imari'i Gurra Balleese
1Daawwitiki belti Abeseloomi Ti'imaari hiyyendaaxxa yo'oshsh dancha dayyo afeeman; iseenna Daawwitik belti Aminooni eeyye.2Aminoonninna dayyo ifixxa Ti'imaarii'i eeyyatenaa'ni kexxeexxa isexxe yortenn elagophe; isenna duuddo dubarichcho kaddeemmaxxee isee diipha dande'abaaxxa ege'ne.3Aminooninna Yonadaabi hiyyemaaka jaalo afeemman; isinna Daawwitika dayyo Saami'ake beltomman. Iyonadaabi yo'oshsha malameessakemman.4Isinna Aminoonii'i hiyyee qici, «Koo moyanjiinke belto ate'e barra barra'ni huqqisa'n hexxa'neexxa yaane, ane'n kula gophatechi mayeete?» hiyye laqe.Aminooninna, «Anke dayyixxa Abeseloomixxa dayyo Ti'imaari'i eeyyennaxxeeten» hiyye hiisse.5Iyonaadaabinna, «Yoona ‹Ela gopheennen› hite taqete'ni diiphi; anni atiki atee laqo'a dagaa wodda ‹Dayyo anxi Ti'imaari daggeexxi itannolcho ani'a uuteele gammadannan; isenna konnoo ani bira hexxe'e uuda'naa ita qophpheessite anga isexxenni itisso'a maganneten balloo eeti ani'a uwwi› hite iso'ni kuli» hiyye.6Tennexxe Aminooni ela gophee manjo fakkaate diiphe.
Moyanjinna isoo laqo'a dage; Aminooninna, «Dayyo anxi Ti'imaari daggeexxiuuda'naani lame quncisa qunciseexxi anga isexxenni anee itisaashsha atee kadhataannen» hiyye laqe.7Tennexxee Daawwiti mootummatike mi'ne'n hexxeexxe Ti'imaari'n «Atike dayyo Aminooniba marte ita isi'a qopohpheessi» hiyyaaka ajaja erge.8Tennexxe Ti'imaari dayyi Aminooni diiphemmake miniba'a marte; shiixxooxxa lixxe aaxxe qushshiteechchi uduma isi uuda'naanni qopheesite ra'isite.9Ookkoneechchi uduma isenna qunicissemmaka quncisa she'latenaa'ni aaxxexxi isi'a shiqishshe; isinna ita gibe.
Aminooninna «Manjo duuchcha kabaa'ni ani'a fulche» hiyye. Mine Hedhemmak manji duuchchingi fule.10Ookkoneechchi uduma Aminooni Ti'imaarii'i, «Anee anga atixxenni itisottaa dhiiphaannaxxe anxe taqebaa iyyedagi» hiyye. Ti'imaarinna qopheesitemmaka quncisa aaxxeexxi dayyi iseki Aminooni galammaxxe kuta giddi'a adhdhite e'yite.11Yaane kinni ita isi'a shiqishaa wodda sha'mi asse abideexxi, «Tee anxe dayyo amo welti diinpho» hiyye.12Isenna hitee qici, «Anke dayyo maganneten waali tinni kaddaaxxe yaanebaan ane'ni hunnattoxxee; iitta hexxeexxa shookishshaxxa yaane Isira'eeli giddo assende ege'nendebaan; tennexxee tenne yababulle assitoxxee.13Ani maa hiyyanno? Salphate ardi giddo hoone gurrinni me'anno? Atinna Isira'eelike ardixxe oddo'ni lumoshsha salphatetteke kaddatton; maganneten moyanjoke'ni isee aadhannoni hite kuli; isi ate'ni heerumabo'noshsha hoyyabaan» hite.14Isi kinni isexxa laqo'a hasebaan; ise irra isi jabake kadeemmaxxe'e isee hunnati abide diiphe.15Ookkoneechchi uduma Aminooninna isee yo'oshsha jibbe; edo iseee eeyyamma irra isee gibeemmaxxee tennexxee konne anke «Minenaa'ni fuli!» isee hiyye.16Isenna, «Tinni kaddabaan! Anee minii'ni fulchite shorra; edi wodda ane'ni assitettexxe balleesa irra saxxeexxa balleessa ane'ni geessisseten hiyyoten» isoo hite. Isi kinni isexxa laqa gibe.17Isinna ifika erganjo dargageessichcho ye'eexxi «Tenne manjichcho kabaa'ni fulchitettexxi hula cufi» hiyye.18Tennexxe erganji isiki isee gadhi'a fulcheexxi hula cufe; ookkone wodda Ti'imaarinna moyanjiink duuddo dubarruwwi oddo'waammaxxa seesinxa seemma oddo'witemamn.19Ti'imaarinna umo ifike'ni bululo filfilxite seesinxa seemma ifixxa darte umo abixxite hafuura gikki assite ooxxa'ni me'ite.20Dayyi iseki Abeseloominna isee uude wodda, «Tee anixxe dayyoo! Dayyi atik Aminooni atinni welti hedhemmaa? Tee anxe dayyo amo ta'a sammi hiyyi; isi atike dayyo kadeemmaxxe'e yaane godoba uggudhittoxxe'e» isee hiyye. Ti'imaarinna iseke dayyo Abeseloomike mine'ni qofittinn ofolde.21Moyanji Daawwiti tenne duuchcha laqeexxi yo'oshsha mufate.22Aminooni dayyo ifixxa Ti'imaari'i hunnati abide isenni welti diiphemmaxxee Abeseloomi Aminoonixxa ijje gibe. Isinna langaxxa elo yo'oxxa iso'ni haaso'a hasebaan.
Abeseloomi Aminooni'ni Halo Fule
23Lame wogga uduma Abeseloomi Efireemixxe gabala bira hedheeke Be'aalehatsorke qachcha'ni gedhebiinxa orda cira'emmani; ookkone wodda moyanjiinxa labbaxxa oose duuchcha ookkoo ite ha'watee ye'e.24Abeselooninna moyanjinba mareexxi, «Yoona erganji atik gedhebiinxa orda cirate'ni hedhennen; tennexxee moyanjinna hayyoole daggineexxi qophpheessenaxxee ita'ni afendino'a daga eetaboxxo?» hiyye laqe.25Moyanjikinna «Koo anke belto, no'o duuchchiingi daga hasissabaan no'oo duuchchiing dangonnole keesunsa ate'ni ha'urtaan» hiyye isi'a hiisse. Abeseloominna jaba qicinn laqe; moyaji kinni ifka yaada jijjjiira gopheemmaxxee Abesoloomi hobba'i hiyye.26Abeseloominna, «Yoona dayyi anki Aminooni no'onni welti me'uun» hiyye.Mayonjinna, «Isi ha'noonni welti mayeete me'a'nechchi?» hiyye laqe.27Yaane kinni Abeseloomi jabeesse isoo kadhateemmaxxee Aminoonninna wele moyanjiinxi labbaxxi oose duuchcha isinni welti me'itaashsha asse.28Abeseloominna eriganjuwwa ifika hiyyee qici; «Aminooni woyyinetixxa booka ha'we huffi hiyyaa wodda; ani Aminooni'i iso shiwwe ha'no hiyyanno wodda shiwwe; ha'no ajajenneki anten sodaatinoqqee; jabaatte; hara mandinoqqe» hiyye.29Tennexxe Abeseloomik erganjuwwi gootti insa'neeki insa'ne ajajemmaxxa Aminooni'ni assine. Ookkoneechchi uduma moyanjiinxi labbaxxi oose duuchchi kexxeexxi ifi ifixxa gaange guluffeexi baqatte.30Insa'nenna mine gennebaangi orake'n he'nee'naa, «Abeseloomi oose atixxa shiye bire; mittikinna gateeki hedhebaan» hitaaxxi odo Daawwiti'ni gelte.31Moyanji Daawwitinna ofo'lemmabaa'ni ke'e uurre; yaadoti seemma oddo'wemmaxxa dareexxi buttinake'ni wabbi hiyye ibe; okko isi bira hedhdhemaki eriganjuwi isiki duuchchinna yaaddotixxa seemma ifi ifixxa darre.32Daawwitik dayyi Saami'ak belti Yonadaabi hiyyee qici, «Moyanjiinxa labbaxxa oose duuchcha bireeshsha assee anki gootti hedoqqee; dayyo ifixxa Ti'imaari hunnati abide dubarrumma balleesseexxe yannanaa'ni ke'issee Abeseloomi mudhdhe ke'eexxe yaane kaddeemmaxxee reyeek Aminooni callan.33Yoona reyeek Aminooni calla kadeemmaxxee, ‹Moyanjiixxi labbaxxi oose duuchcha shiyende› hiyyendee kulendeemmaxxa ati anki gootti mayanji addatoxxee.»34Abeseloominna rake baqate. Hula heqqammaki manjichchinna toggi hiyye uudaa wodda isinna dhidhimii darre'ni hedheeke oranaa'ni heddi manni koobatena'ni butti'a dirraa'naa afe; hula heqqaammaki manjichchinna mare moyanjo hiyyee qici, «Horinayiim darree'ni tullichchinke kasana'ni manni adadde dirraa'naa uudennen» hiyye kule.35Yonadaabinna Daawwiti'i, «Kunnuuxxi mayanjo atixxi labbaxxi oose dagge'een; ani atik erganji hiyyennashanni kaddeen» hiyye.36Isinna haaso'e birebaangi moyanjiinxi labbaxxi oose hunbaashshite ooxxa'ni e'yite; iittanni moyanjikinna erganjuwwi duuchchi hinqilfante oo'ne.37Abeseloominna baqate Geshuurika moyanjo Amiihudika belto Telmayibaa'a me'e; yaane kinni Daawwiti reyemmake beltixxee duuchchi wodda oodha'nemman.38Abeseloomi baaje Geshuure'a me'eechchi uduma ookkoo sase wogga ofo'le.39Moyanji Daawwiti ifike belto Aminoonixxe reyoxxee yaaddo waale jabaatelchi uduma; Abeseloomibaa me'atee qalbe kexxe.
The Word for the World International