2 Saamu'eeli12
Wabeekichchi Naatani Daawwiti'i Xixe
1Duuchchi Woddik Gootti Naatani Daawwitiba'a erge; Naataaninna Daawwitiba mareexxi hiyyee qici, «Mitte qachchi giddo lami manni hedha'nemman; ookkone lamenaa'ni mitti dureessakemman langaki kinni hiyyeessakemmani.2Iikki dureessi manjichchi yo'oshsha heddo lalonna heddo gedhebo afeemman;3Hiyyeessi manjichchi kinni hidhdheexxa mitte shiixxoxxa gedhechcho malee mitti afeechchi hedhemmaba'a. Iseenna oose ifixxen welti isiba nophphite; isi iteechcho ittee ha'weechchonna ha'wita'emman; diipha woddanna midde luu'medhe welti diipha'emman; isenna isi'a i'leexxe beltoshshatemman.4Ookkone dureessi manjiba keesumma dagge; iikki dureessi manji keesummatee ittaachcho giissino'a ifike gedhebonaa'ni yookaani jibichcha mitte aadhe daggeexxe keesumma'a dulo'a eeyyebaan; ifika dulammaxxa bakka ookkone hiyyeessi manjichchixxa gedhechcho aadhe dule daggeexxi keesumma itto'a qophpheesse.»5Daawwitinna ookkonne manjo'ni yo'oshsha aareexxi Naataani'n hiyyee qici, «Hedhaake Duuchchi Woddike Goottixxa tenne asseeki manjichchi reya hasissaan!6Mararte mitte belonna tenne yaane assemmaxxee eettene gedhechchoxxee iikki manjichchi shoole anga caala hiisse uwwa hasissaa» hiyye.7Ookkoneechchi uduma Naataaninna Daawwitii hiyyee qici: «Iikki manji ateteni! Duuchchi Woddik Gootti Isira'eeil Mageni hiyya'nee qici: ‹Ani atee Isira'eel'ni moototta'a hariirennen; Sa'oolixxe anganaa'ninna atee aniirennen.8Atike goottika minenna atike goottixxa aruwwa anga atixxe'ni sa'isse uwwenene; Isira'eelixxanna Yihudaxxa horte ati'a uwwennnen; tinni duuchcha atee hanqatechcho kaddoole konne caala lebe ati'a uwwannan.9Mayeeta Duuchchi Woddike Goottika hiyyichcho shollishette? Tenne fuggoxxa mayee assitette? Hiitichcho Ooriyo'o wolaantichchik shiltette; are ifixxe assexxotta'a are isixxa adhdhitetten; isoonna Amoonitotike wolaantichchinni shiltetten.10Ati anee tuffate are ifixxe assexxotta'a Hiitichcho Ooriyoxxa are ifi'a adhdhiteettaxxee wolaantichchi duuchchi woddi'a mine atikenaa'ni gophemabaan› hiyye.11«Duuchchi Woddik Gootti hiyya'nee qici, ‹Yoona atike menenaa'ni fuggoxxa yaane ate'ni ke'issannon; ille atixxi uuda'naa'n aruwwa atixxa fira atike kadeeke manji'a mittekee uwwannon; isinna barra saafo'a atixxe aruwwanni welti diiphan.12Ati tennee sho'iki assiteetten; ani kinni tenne yaane barra saafo'a Isira'eeli duuchchi edo farri assee leellishannon.› »13Ookkoneechchi uduma Daawwitinna Naataani'n «Duuchchi Woddike Gootta'n cubbo huje'ennen» hiyye.Naataninna hiyyee qici, «Duuchchi Woddi Gootti cubbo atixxa gattowwaal hiyye'een; rertaboxxon.14Tenne assa kinni Duuchchi Woddike Goottik naaphi isoo tuffaatemashsha assiteetaxxe'e ati'a ilemeemmak belti reyaan.»
Daawwitike Beltixxa Rewo
15Naataani ifike minibaa me'eechchi uduma Ooriyoxxi are Daawwiti'a ildeemmake belto'ni Duuchchi Woddik Gootti jabbaxxa dhibo ibise.16Daawwitinna beltokee Duuchchi Woddika Gootta soodate; agabo goddonna hose; ookkoneechchi uduma galammaxxe kuta giddixxe'ni e'ye buttinna duwwike'n dhiiphe.17Isike moottummatike minixxi ja'laabuwwa isoo buttii'ni ke'issino'a isi bira uurite; isi kinni buttii'ni ke'a gibe; insa'neninna mittelchonna itebaan.18Torbaxxe barra'ni beltikinna reye; Daawwitiki ergajuwwinna, «Yoona belti lubbo hedhemma wodda kulleennexxa Daawwiti laqebaan; ta'afa'i beltiinxa reyo hitta assine iso'ni kula dandeennanno? Isinna ifi'n fuggoxxa assedhaaxxe hexxeen» hiyyoti iso'n kula sodaante.19Daawwitinna eriganjuwwi isiki weli'anni weli hashanshaa'n'aa uudeexxi belti reyeexxa ege'ne; tennexxe «belti reyee?» hiyye insa'ne qore.Insa'nenna, «Eeti reyee'en» hine hiissine.20Ookkoneechchi uduma Daawwitinna buttinake'ni diiphemmabaa'ni ke'e biso anshedhe; buurokanna issate; seemmatanna jijjiidhdhe oddo'wechchi uduma Duuchchi Woddike Goottike minibaa mare sagade. Ookkoneechchi uduma mini ifikibaa e'ye; itaachcho uuno'a qoreexxi shiqinsheenaa ite.21Isike moyatike minixxi erganjuwwi, «Iitta assitettelchi mayyeete? Belti lubboti hedhemma wodda agabo goddo hossette, ooxxette; belti reyeechchi uduma kinni kexxe ittetten» hine isoo qorre.22Isinna hiyyee qici: «Dhugaandinni belti lubboti hedhe'naa, ‹Duuchchi Woddik Gootti ani'a gattowwaal hiyyeexxi belto lubbo gatisaaxxe hexxeen› hiyyee agabo goddo hedhee oodhennen.23Ta'a kinni belti reyemmaxxee mayee agabo goddo hedhanno? Reyeeka langaxxa hiissa dande'annota? Ante isiba me'anno malee'e isi anibaa'a hige dagabaan!» hiyye hiisse.
Solomonixxa Ilensha
24Ookkoneechchi uduma Daawwitinna are ifixxa Berissaabehi jajjabeesse; isebanna mareexxi isenni welti diiphe; isenna labbaka belto isi'a ilde; isinna beltinka summa Solomooni hiyye fulche. Duuchchi Woddik Goottinna isoo eeyye.25Duuchchi Woddik Gootti belto eeyyemmaxxee summa isikanna Yidiidiya hiyyeme ye'emaashsha wabeeka Naataani darree'n hiyyichcho erge.Daawwit Ra'aba Hiyyemaaka Qachcha Injifate Abide
26Ookkone wodda Iyyo'aabi Amoonitotika qachcha Raaba'a lolee mootetike minixxa kollo abixxe.27Ookko'ni Iyyo'aabi Daawwitiba'a hiyye erga ergee qici: «Raaba'a lole wode'i hedheboonchixxa kollo abideennen.28Yoona gateeka sannachcha bukki assite qachcha elqe kayyii'ni buqqe abidi; iitta assa gophphotole ani qachcha abidee'na'a anke summinni ye'emaan.»29Tennexxe Daawwiti sannachcha duuchcha bukki asseexxi Raaba'a mareexxi lole abide.30Daawwitinna insa'neeke moyanjike umonaa'ni kallachcha aadhe; kallachchikinna sase tommenna onde kiilo a'urittaaxxe worqe kaddaa wodda isinna Daawwitike umo'n uggeme; iittanni ookkone qachchanaa'ni lumoxxa booji'o booji'e.31Ookko'o hedhemmaka arda fulcheexxi magaazeti, qottotinna maxarabik huje hunjaashsha asse; iitaanni buttinna qabandee bolokeete hunjaashsha asse. Iitta hexxeexxa huje wele Amoonike qachchuwwa duuchcha'ni hujendaashsha asse. Ookkoneechchi udumna Daawwitinna sannachchi duuchchi Iyyerusaalemi'a hinge.The Word for the World International