2 Moyanjuwwiinkaa Maxaafa25
Naaphiinxe Anga'n Iyyerssaalmixxa Iba
1Yihudiinki moyaji Sedeeqiyaasi moyemmake baro'n sallanixxe woggake tommike agenjixxe tomme barra'ni Baabiloonik moyanji Naabukedenetsoorinna ifika loliinka manna adhdheexxi Iyyerusaalemi'n duule; qachchinke dalla'i gadho booncho giissedhe ofo'le; qarqara duuchcha'ni buttina iimi'a tullube erqe kayii'ni buqe.2Qachchikinna Sedeqiyaasi moyemmake bari qico'ni tommenna mitte wogga'a erqe kayyi'ni buqeme hedhemmani.3Sholgake agenjixxe sallanixxe barra'n qachchi giddo jabaki solo'i e'yemmaxxe ardi itaachcho gophe.4Baabilooniki manni qachchiinka dalla'a enqe e'yee; Baabiloonik manni qachcha buqoolenna midde Isira'eelik loliinki manni duuchchi moyanjiinke hiddichchiinke fichchi bira hedheeke lame dala hexxeexxe hulanaa'ni fulleexxi hashshati baanje; baanjeebinna Yordanoosixxe dhooqaba'aatemmani. 5Kaddo malee kinni Baabilooniki loliink manni moyanjo hordofeexxi Iyyaarikoke diida'n dhaqqabe; isik loliink manni isonaa'n gargar higeexxi xexxeereme'emman.6Insa'ne moyanjokanna abindeexxi eettenne yanna'nini Baabiloonik moyanji hedheeba Ribla iso'o iyyedangeexxi murte iso'n murre.7Sedeqiyaasi ille ifixxini uudaa'naani oose isixxa isi edo shinne; ookkoneechchi uduma lamiinxa ille isixxanna giddi'n fulchine; sageettotike haachchabinni usurreexxi Baabilooni'a adhdhine me'ine.Woyyichchi Galmxa Diigensha
8Baabiloonik moyanji Naabukedenetsoori moyeexxe tommenna sallaane wogga'ni ondike agenjixxe torbaxxe barra'n Baabiloonike moyanjiki ulfeessemeeke heqqanjuwwiki ajajaallinna Baabiloonike moyanjike Ja'laaba kade'eki Nabuzardaani Iyyerusaalemi'a dage.9Isinna Duuchchi Woddike Goottika galma, moyanjiinka mootummatika minenna Iyyerusaalemi hedheeka minuwwa duuchcha gube; mitte mittenga lumollamma kinjiki ijaarremmeke mine'ni giira wore.10Ulfeessemeeke isike heqqanjuwwike ajajallinni welti hedhemmaki Baabilooniki loliinki manni duuchchi Iyyerusaalemike qarqara'ni hedhemmaka qachchiinka dalla'a duuchcha diinge.11Ulfeessemeeke heqqanjuwwik ajajalli Nabuzardaani qachchi giddo gate'emmaka mannanna Baabiloonike moyanjiba'a me'emmaka manna duuuchcha, wele gateeka mannanna Baabilooni'a booji'e adhdhe me'e.12Yaane kinni heqqanjuwwiinki ajajalli bogiinke mannanaa'n mittelcho affebaaxxa hiyyeeyye woyinetika hiddichcho kaansaashsha, fichcha hunjaashsha ookooni waalle.13Baabiloonik maninninna sageettotika utuphuwwa, galmi giddo mole afeeka miya masse'naachchuwwanna sageettoti hunjeeka wode'e ca'minaaka gonga butuchchineexxi sageettotanna Baabiloon'a adhdhine me'ine.14Iittanni odolchuwwa faafasujjo, bululo aa'namalchuwwanna mooqquwwa, wele sageettotike sibiljini giissineeka galmi giddo la'o uwwammaka miyuwwa duuchcha adhdhine.15Ulfeessemeeke heqqanjuwwiki ajajalli ca'itte worqenninna birretike sibiljini hujendeexxa, hixaana gunbaakanna, hubuqqitte qoruwwa adhdhe.16Solomoon Duuchchi Woddike Goottike galmi'a hujeeka sageetoti giissiseeka lame utupha, wode'e camaaka gonganna mole afeemmaka miyuwwa hana uggemmalchcho aadhe; konne miyuwwi duuchchi'a kiila dandeesisaakemmaba'a.17Mitte mitte utuphiki qeerinni tommenna saddeeta ciqile kadaa wodda, guutote'ni sageettotixxa bokko afe'eemmakemman; bokkotiki qeerrinninna sase ciqile kadaa wodda; qarqari duuchchi sageettotike sibiljixxe marabenna roomaanetixxe gumuuwwa fakkaata'nemmani; weli utuphinna konneni welti weli fakkaata'nemmani.Yihudak Moyanjuwwi Baabilooni'a Booji'emeexxa
18Ulfeessemeeke heqqanjuwwiki ajajalli umo qeesichcho Serayaa'a, iso'ni langaba aanaaki qeesichcho Sofoniyaasinna sasiinga hulatika heqqanjuwwa usuro'a aadhe me'e.19Ettene yanna qico'ni, qachchi giddo gatemmakinna, loliinke mannika ajajallonna onde moyanjiki mari'atammaka manna adhdhe me'e. Higgeeni boginke ardanaa'ni lolake duulaaka manna mellammaka; loliinke mannika ajajallo; borreessanjokanna qachchi giddo afemeeka, borreessanjiinka jaane tomme manna adhdhe me'e.20Loliinke manniki Ajajalli Nabuzardaaninna konne manna duuchcha aadheexxi Ribla hedheeke Baabiloonike moyanjiba'a Nabukedenetsooriba insa'ne iyyemare.21Moyanjikinna manna Hamaatike boga'n ookkonni Ribla giddo shilchiise. Yihudak ardinna konne qicinni ifike boganaa'n booji'eme me'e.Godoliyaasi Yihudake Moyanjo Kadeexxa
22Baabiloonik moyanji Naabukedenetsoori Saafaanika akka'o Ahiqaamika belto Godoliyaasi booji'emebaak gatemmake Yihudake ardike akeekisanjo asse baalloonse.23Duuchchiing loliinke manniki sooresuwwinna insa'neeki manni Baabiloonik moyanji Gedaliyaa'a galchanjoke assee hariireexxa lanqeexxi Mitsipha Godoliyaasibaa dange. Insa'nenna Netaaniyak belti Isima'eeli, Qaareehak belti Yohanaani, Nexoofichcho Tanihumeetik belti Seraaya, Ma'ikak belti Yezaaniyatemmani.24Godoliyaasinna insa'nenna loliinka insa'neeka manna hiyyee qici, «Baabiloonika ja'laabuwwa sodaattinoqee; konne boga'ninni hedhdhe; Baabiiloonike moyanji'a ergateme; duuchchiinxi yaane ha'no'a qajeeldaani» hiyyeexxi kakate.25Yaane kinni torbaake agenjo'n moyanjiinxe sanne kadeemmaka Elishaama'ike beltike belto kadeek, Netaaniyak belti Isima'eeli, tomme manninni dageexxi Godoliyaasinna Mitsipha isinni welti hedhemmaka Yihudakanna Baabiloonika manna shiye.26Baabiloonika manna sodaantemmaaxxe lumo shiixxoke hiyyebaaki ardi duuchchi looliinke mannike ajajalluwini welti Gibtse'a baaje.Yo'aakini Usurrakenaa'ni Tikeme
27Yihudak moyanji Yo'aakini booji'emeexxe sase tommenna torbaane woggaxxe, tommenna langake agenjo'ni, ookkone agenjixxe lame tommenna torbaane barra'ni Yoormaroodeki Baabilooni'ni moyeexxe woggaa'ni Ikooniyaanii'i usurrakenaa'ni tike.28Isoonna shaqqunteti haasesee Baabilooni isini welti hedhemmake moyanjuwwi caala; lumoka ulfinniinka booncho isi'a uwwe.29Yo'aakininna usurriinke mi'ne'n oddo'wemmaxxa seemmanna jijjiidhdhe;30Yo'akiminna hedheeke baro duuchcha'n duuchchi wodda moyanjiinxe qorenaa'ni ita'nemmani.The Word for the World International