2 Moyanjuwwiinkaa Maxaafa24
1Iyyo'aaqemi moyemmake baro'ni Baabiloonik moyanji Naabukedenetsoori lole'e boga adhdhe; Iyyo'aaqeminna sase wogga irbo isi'a uwwe. Ookkoneechchi uduma yaada ifika jijjiireexxi Nabukedenetsoori'ni fuggoxxini ke'e.2Duuchchi Woddik Gootti Iyyo'aaqemi'ni Baabiloonika, Sooriyaka, Mo'aabitotanna Amoonito ole miidho'a erge; erganjuwwa ifixxe wabeeko darree'ni kulemeeke Duuchchi Woddike Goottike hiyyichchishshani Yihudaa'a biro'a konne manna erge.3Ifi edii'ni insa'ne bayyiso'a tenne yaanuwwa duuchcha Duuchchi Woddik Gootti ajajemmashshani Yihudake'ni dhugaaten muxemate dandeette'eni. Tinninna Minaase hujemmaxxe cubbo'anna assemaxxe duuchchi'ateni,4ittanni Minaase qajeeli manjixxa munde dunemmaxxeeteni. Iyyerusaalemi'ni qajeeli mannixxi munde wo'mitaashsha assemmaxxe Duuchchi Woddik Gootti gattowwaali hiyyo'a hasebaani.5Iyyo'aaqemi moyemmake baro'ni hujendeexxi; wele huje muuxeexxi huje duuchchi Yihudake moyanjuwwike jirtetike maxaafa'n borreessende hexxeexxebaata?6Iyyo'aaqeminna reye, belti isik Ikooniyaaninna isixxe baka'ni moye.7Baabiloonik moyanji Gibtseke galaananaa'ni Efiraaxisike galaani qico'ni hedheeka boga isika adhdheemmaxxe; Gibtseki moyanji boga ifikenaa'ni langaxxa duulo fulebaani.
Ettenee yanna Sedeqiyaasi Baabiloonike moyanjo'ni fuggoxxini ke'e.
Yihudak Moyanji Yo'aakin (2 Odo. 36:9-10)
8Ikooniyaani moye wodda, wogga isixxi tommenna saddeetatemman; isinna Iyyerusaalemi ofo'leexxi sase agenjo mowe galche. Ama isixxinna Nehushita hiyyendaaxxeni; issenna Iyyerussaalemike manjixxe Elinaataani hiyyemaake manjixxe beltommani.9Anni isiki assemmashshanni isinna Duuchchi Woddike Gootti edo elobaaxxa yaane asse.10Eettene yanna'ni Baabiloonike moyanjiki Naabukedenetsoorik loliinke manniki ajajalluwwi Iyyerusaalemi'a dangeexxi elqe kayyii'ni bunqe.11Loliinke manniki ajajalluwwi erqe kayyii'ni buqee wodda Naabukedenetsoori umi ifinginnini Iyyerussaalemi'a dage.12Yihudak moyanji Ikooniyaani, ama isixxi, isinni me'ammaki ulfeessemeeki ja'laabuwwinna jalqabuwwi Baabiloonike moyanji'a anga uune. Baabilooniki moyanji moyemmaxxe saddeetixxe wogga'ni Yo'aakini'i booji'e adhdhe me'e.13Duuchchi Woddik Gootti edi wodda haaso'emmashshani Nabukedenetsoori Duuchchi Woddike Goottike galmi giddixxanna mootummatike minixxa karra duuchcha bukki asse fe'edhe adhdhe me'e. Isira'eeliki moyanji Solomooni Duuchchi Woddike Goottike galmi'a hujisemmaka worqetika miyuwwa duuchcha adhdhe.14Higgeeni Iyyerusaalemika arda hedhemmashshani loliinka manna ajajammakaaranna, loliinka manna duuchcha; angatixxe oge ege'nemmakaranna sibilo tumammaka duuchcha; lebeexxi mitteba tomme kuma manna booji'eexxi ifike bogiba'a adhdhe me'e. Ookko'o gateeki hiyyeeyye manna callammani.15Naabukedenetsoor Ikooniyaanii'i ooji'eexxi Baabilooni'a adhdhe me'e; ittaani moyanjiinxa ama, aruwwa isixxa, Ja'laabuwwa isikanna bogi giddo ege'nemeeka lumollamma mannanna Iyyerusaalemi'ni Babillon'a adhdhe me'e.16Higgeeni Baabiloonik moyanji jajabba lola dande'aaka torbaane kuma loliinka manna, mitte kuma angatixxa oge muuxeekanna sibilo tumammakaara booji'eexxi Baabilloon'a adhdhe me'e.17Ookkoneechchi uduma Yo'aakinike annika dayyo Maataaniyaanii'i isixxa bakka moyashsha asse; summa isikanna Sedeqiyaasi hiyye fulche.Yihudiinka Moyanjo Sedeqiyaasi
18Sedeqiyaasi moye wodda wogga isixxi lame tommenna mittetemmani; isinna Iyyerusaalemi ofo'leexxi tommenna mitte wogga moye galche. Ama isixxininna Hamuuxxaali hinaaxxemmani; isenna Libinake manjixxe Ermiyaasixxe beltommani.19Iyyo'aaqimi assemmaxxa duuchcha; isinna Duuchchi Woddike Gootti edo elobaaxxa yaane asse.20Yooni tinni duuchchi Iyyerusaalemi'ninna Yihudake'ni geya dandeetteeki Duuchchi Woddik Gootti mufatemmaxxe'e insa'ne'e ifi edii'ni bayyise. Iyerussaalemixxa IbaEttenee yanna Sedeqiyaasi Baabiloonike moyanjo'ni fuggoxxini ke'e.
The Word for the World International