2 Odotikaa Maxaafa9
Mootitte Saaba Solemonii'i Uushshotee Marte
1Mootitte Saaba Solomoonixxe'e kulema'neeka mambe'iinka beekkuma duuchcha laqqee wodda jabaka qortumuwwa qorte isoo hega uuddo'a Iyyerusaalemi'a dagge. Isenna qimamuwwa, heddo worqenna hiri fiixxeexxa kino gaaluwwake'ni fe'exxe hedo ulfesemeeke mannini welt marte gelte. Isenna Solomooniba marteexxi godoba affeemmaka yaada farri assiteexxi iso'ni haasootte.2Solomooninna ise qorteeka qortuma duuchcha hiisse; isinna hiissa gopheexxi mitte yaanenna hexxemmabaan.3Mootitte Saabanna Solomoonika beekumanna ijaareka mootumatika mine,4qorte'ni shiqa'neexxa ita, ja'laabuwwiinka ofo'lichcho, mini giddo ergatemaaka mannanna oddoonno insa'nexxa, booka ibisaaka mannanna oddonno insa'nexxa, ittanni Duuchchi Woddik Goottik galmi giddo shiqiseeka ciincatika tolchuwwa uuddexxi yo'oshsha mambe'a hite.5Isenna moyanji Solomooni hitee qici, «Huje atixxanna beekkumi atikixxee boga anke'ninni hedhenna wodda laqennexxi dhugaanden.6Yaane kinn dage ille anxinni uudano qico'n ane'n kulleexxa amaneennabaan; dhugaandinni atike beekkumika gamisa midde ane'n kullebaan. Ani laqenneke gurri iimi gama yo'oshsha lummexxeetten.7Duuchchi wodda ati edo uurreki beekkumiki wo'meeka atika haaso'a laqa'neeki ja'labuwwinna atiki erganjuwwi insa'nexxa wodo.8Duuchchi Woddike Gootta atike Mageni edo moyanjoke kaddee mootattoshsha, ate'ni gammadeekinna mootete'n ate ofo'lisheeki Duuchchi Woddiki Gootti atik Mageni saademowwaal. Mageni atiki Isira'eeli'a afeexxe jaalalanninna duuchchi woddi'a insa'nee jabeesso'a afeexxe eeyyanaa'n kexxeexxa; qixxoomikinna qullumma bira saxxaashsha asitotaa ateee insa'ne'n mootonse» hite.9Ookkoneechchi uduma moyanjokee shoole kuma killo saxxeexxa worqe, yo'oshsha bira saxxeexxa qimamuwwanna hiri fiixeexa kino isi'a uute. Mootitte Saabanna Solomooni'a uutemaxxe qimamuwwashsha hexxeexxi qimamuwwa hara hexxemmabaan.10Kiraamiki manninna Solomooniki manni woriqe Ofiirii'ni ittanni sandaalenna hiri fiixxeexxa kinuwwa iyyedange.11Moyanjikinna sandaaletika haqichcho Duuchchi Woddike Goottike galmi'ana moyatike mini'a lekkatika hadhisanjo giissinaaka, ittanni faarsaleeyyetee masinqonna kiraara giissise. Ookkoneechchi uduma iitta fakkattaaxxi yaane Yihudiinke boga'n haranga uudendebaan.12Moyanji Solomoon mootite Saabaa hasseechchonna laqqeechcho duuchcha ise'a uwwe. Ise'a uwweexxi uwwanna ise iyyedaggemmaxxe uwwanaa'n saxxeexxemman. Ookkoneechchi uduma isenni welti googeesse dagemmake manninni welti ifike bogiba'a higge.Solomoonixxa Durumma
13Solomoon wogga wogga'ninni adha'neexxe worqe lame tommenna sase kuma kiilomman.14Kunninna lumolla daddaltonaa'ninna heenoxxe daddaltonaa'ni bukki hitammaxxe irbo gadhi darremman: ittanni Arabiinke boga'n hedheeki moyanjuwwi duuchchinna isike bogiki jalqaabuwwi Solomooni'a worqenna birre iyyedanga'nemman.15Moyanji Solomoon lumollamma lame dhibba wonte worqeti giissise; mitte mitte wonte'n ugginemmaxxi tummeexxi woriqe torbaane killomman.16Iittanni sase dhibba shixxaramma wonte tummendeexxe worqenni giisse; tenne mitte mitte wonte'n uggineexxi tummeexxi worqe sase killomman. Moyanjiknna wontuwwa «Liibanoosike gongoma» hinaake moottumatike mini giddo ugge.17Ookkoneechchchi uduma moyanji arbiinxe issonni seesee ca'ite worqeni buqeexxi lumoxxa moote giisse.18Iitti mootetinna jaane iimi'a da'matixxanna butti'a dirratixxa koobbo affeexxe kadda wodda, mooteti welti abidisemeeki worqeti giissemeeki lekkati hadhisanji hedhemman. Eettenne moote'ninna middii'ninna bita'i darrenaa'n irikotichcho affeexxe kaddaa wodda ookkone irikotichchi bira mitti mitti neeqiinxi misile uurritteemmani.19Iittanni jaaniinxe koobbuwwa'n kasa kasake'n mitti mitti neenqiinxi misile urriteemman; mittenba tommenna lame neenqixxi misile urriteemman; tennee fakkataaxxa moote hoone bogixxe mootumma giissende egendebaan.20Moyanji Solomoon ha'wammaki miyuwwi duuchchi worqeti giissinekemman; «Libanoosike gongoma» hiyyemmaake mootummatike mini giddo hedhemmaki miyuwwi duuchchi luqqitte worqenni giissendeemman; Solomoonike baro'n birreti sibilji la'o afebaachchishsha uudemaammaxxee birreti sibiljinni giissemeechchi mittichchinna hedhemmabaan.21Moyanji Kiraamiki manni oofammaxxa Terseesi'a daddalakee me'itammaxxa markabuwwa afeemman; insa'nenna sase sase wogga'n mitte yanna worqe, birretika sibiljo, Aribiinxa isso, qamaluwwatanna galeduwwa abinda'n iyyedangaamman.22Moyanji Solomoon durummatinna kadi beekkumiki bogi duuchchike moyanjuwwa duuchchanaa'n caleekemman.23Bogi duuchchik moyanjuwwi duuchchi Mageni isixxe qalbe giddo uggeeka beekkuma laqo'a Solomooninni welti afemo'a hasa'nemman.24Wogga wogga'ninn isibaa dagaaki duuchchi birretika sibiljonnaa worqetika miya, seemma, loliinka miyuwwannaa qimamuwwa iittann fadhadiinxanna gaangetixxa uwwa isi'a iyyedanga'nemman.25Solomoon shoole kuma fadhadiinkanna sarageelluwwiinka galdumi mine afeemman; iittann isi hedha'neeke Iyyerusaalemike qachcha'ninna sarageelluwwiinke qachchuwwa'n tommenna lame kuma fadhado afeemman.26Isinna Efiraxxisike galananaa'n Filisixeemike bogi qico'n iittanni Gibtseke bogixxe gabala qico'n hedheeke moyanjuwwa duuchcha'n hana moye.27Iyyerusaalemi giddo moyanjke birreti sibilji kinotishsha, birbirsiinxe haqqexxi bira sa'ne tullichchuwwiinke qarqara'n futi hiyyeenba latammake odi'ishshatemman.28Solomooni'a Gibtse'nina wele boguwwa duuchchanaa'n fadhado iyyedanga'nemman.Solomoonixxa Reyo
29Weli Solomoonixxi jirte safokenaa'ni muuxamii qico'ni wabeeka Naataanixxe jirtenaa'ni Seeloke bogike wabeek Akiya raaganna Isira'eelik moyanjo Iyyorbi'aamik barixxee mootummaninni welti abidise haaso'a'neek wabeekichcho Idoxxi waleella giddo borreessendeexxebaata?30Solomooni Iyyerusaalemi ofo'lexxi Isira'eeli duuchcha'n shoole tomme wogga moye.31Ookkoneechchi uduma isike edike annuwwishsha reye; anna ifike Daawwitike qachcha'n mogeme; belti isiki Roobi'aami isixxe bakka'n moye.The Word for the World International