2 Odotikaa Maxaafa10
Isira'eeli Robi'ami'n Fuggoxxinni Kexxe
1Isira'eelito duuchcha Roobi'aami moyanjoke assexxo'a Sekemi'a me'itemmaxxee isinna ookkoo me'e.2Moyanjo Solomooni baqate Gibtse'a me'emmaki Nabaaxxiki belti Iyyorbi'aami tenne laqeexxi Gibtsee'n hige dage.3Erginse Iyyorbi'aamii ye'isinse; ookkoneechchi uduma isinna Isira'eelito duuchcha Roobi'aamibaa marteexxi iso'n hitee qici,4«Ann atiki no'o'n jabaxxa ba'o ba'iseemmani; ati kinni rakkisaaxxa hujennaa no'o'n ba'iseemmaka jabaka qanbara no'onaa'n shollishshottole no'onna ati'a hiremme gallannon.»5Robi'aminna «Sase barra uduma higgine anibaa amme» insa'ne'a hiyye. Tennexxee manni hige me'e.6Ookkoneechchi uduma moyanji Roobi'aami ann isiki Solomoon lubboti hedhema wodda isoo gorsitaammaxxa Isira'eelixxa geedhe mitteba bukki asseexxi insa'nee, «Konne ardi'a hiissichcho hiissonaa maa hitina'ne?» hiyye qore.7Insa'nenna isoo, «Konne ardi'a eloke kadde insa'ne gammachchiissottolenna eloka hiissichcho insa'ne'a hiissitottole duuchchi wodda ati'a hireme galaani» hine.8Yaane kinni Robi'aaminna kinn geedhe gorsiteeka gorsa gibeexxi ifixxi hirrinna isi'a ergatendammaxxa dargageeyye qodhdhe.9Isinna insa'ne, «Ann atiki no'o'n ba'iseexxa ba'o no'onaa'n shollishi hiyya'neeke konne ardi'a ani'a gorstina'neeki gorsi maachcho? Maa hine hiissichcho insa'ne'a hiisinanno?» hiyye.10Isixxi Hiri'a dargageeyye hitee hiissichcho isi'a uutee qici, «Ate qoreeke ardi'a ‹Ann atiki no'o'n jabaxxa ba'o ba'iseeni; ati kinn ba'o no'onaa'n shollishshi› ate'e hiyya'nekeri'a hitato qici, ‹Anxe angaaki shuu'nichchi anke annike hidhi caala furidataan.11Ann anki jabaka qanbara ha'non ba'iseeni; ani kinn bira sa'isse qanbara ha'no'n aurisannon; ann anki ha'no halangeti jadhafeeni ani kinni gaaddotishsha idditaaxxe halangenni ha'noo jadhafannoni.› »12Moyanji «Sase barra uduma higgine dagge» hiyyemmashshanni Iyyorbi'aaminna ardi duuchchi sase barra uduma Roobi'aamibaa hinge dange.13Moyanjikinna geedhe gorsiteeka gorsa tuffateexxi insa'ne cee'ma'n hiissichcho insa'ne'a hiisse.14Isinna dargageeyyetika gorsa adhdheexxi, «Ann anki ha'noo'n qanbara ha'uriseeni; ani kinn ha'no'n caala qanbara ba'isannon; ann anki ha'noo halangeti jadhdhafeeni ani kinni gaaddotishsha idditaaxxe halangenni ha'noo jadhafannoni» hiyye.15Duuchchi Woddik Gootti Seeloo'ni dageeke wabeeka Akiya darree'n Naabaxxike belto Iyyorbi'aamixxee hiyyemaaki hiyyichchi muuxemmashsha Magenii darree'n murendemmaxxee moyanji ardi hiyyexxa laqebaan.16Isira'eeli duuchchi moyanji insa'ne hineexxa adhdha gibeexxa egennexxa yanna insa'nenna moyanjoke'n hinee qici,«Daawwitinni welti no'o mayiinke qoobbo anfeenne?Isseyyike beltinni maa mittooma anfeenne?Tee Isira'eel ifi ifike duunkaanbaa higge!Koo Daawwiti atinna mine atinga heqqedhi!»Tennexxee Isira'eeli duuchchi ifi ifinge minibaa higge.17Kaddo malee Yihudiinke qachchuwwa'n hexxammaxxa Isira'eeli moye galchammaki Roobi'aamindemman.18Moyanji Roobi'aami siso hujammake mannike akeekisanjo kademmaka Adoniraamini erge; Isira'eeli kinn kinjiki cancanqe iso shilte. Moyanji Roobi'aami kinni kadeenxa kadee ifika sarageella gulufeexxi Iyyerusaalemi'a baaje me'e.19Tennexxee Isira'eeli techchi qico'n Daawwitixxe hortenaa'n gargari higgeeshshanni hexxeen.The Word for the World International